ދިވެހި ރާއްޖޭގެ ރައީސުލްޖުމްހޫރިއްޔާ ޑރ މުހައްމަދު މުއިއްޒު އަކީ ކާކު ކަމާއި އެއީ ކިހާ ވަރެއްގެ ދޮގު ވެރިއެއްކަން ދުނިޔޭގެ އެހެން ގައުމުތަކުގެ ލީޑަރުންނަށްވެސް އެނގިވަޑައިގަންނަވާނެ ކަމަށް ކުރީގެ ކޮމިޝަނަރ އޮފް ޕޮލިސް އަދި ޕީއެންއެފްގެ އިސް ސަފުގައި ހަރަކާތްތެރި ވަމުން އަންނަ ހުސައިން ވަހީދު ވިދާޅުވެއްޖެއެވެ.

ފްރޮންޓް އޮފީސް ޖަލްސާގައި ވާހަކަދައްކަވަމުން ހުސައިން ވިދާޅުވީ އިންޑިޔާގެ ޖަޔަޝަންކަރާއި، ޗައިނާގެ ފޮރިން ސެކްޓަރުގެ ތަންތަނާއި ހަވާލުވެގެން ތިއްބެވި ބޭފުޅުންނަށާއި އަދި ސްރީލަންކާގެ ވެރިންނަށްވެސް މުއިއްޒު އަކީ ދޮގެވެރި މަކަރުވެރިއެއްކަން އެގިލައްވާނެ ކަމަށެވެ.

މިގޮތުން މުއިއްޒު ވެރިކަމަށް އައީ ރައީސް ޔާމީނުގެ ފޮޓޯ ދައްކަވައިގެން ކަމަށާއި ވެރިކަން ލިބުމުން މިހާރު އެހުރީ އެމަނިކުފާނުގެ ބޮލަށް ފައިން އަރައިގެން ކަމަށް ހުސައިންގެ ވާހަކައިގައި ފާހަގަކުރެއްވިއެވެ.

ރައީސް ޔާމީނަށް ދޯކާ ދިނުމަށްފަހު މުއިއްޒު އުޅުއްވަނީ ފިލައިގެން ކަމަށާއި މުއިއްޒު ހޯދުމަށް އިންޓަޕޯލް އިން ރެޑް ނޯޓިސް ނެރެގެންވެސް ހޯދަން ޖެހޭ ކަމަށް ބުނެ ހުސައިން ވަނީ މުއިއްޒަށް ފާޑު ވިދާޅުވެފައެވެ.