މީހަކު ނުވަތަ ބަޔަކު ކަމެއް ހާސިލް ކުރުމަށްޓަަކައި ކުރެވެން ހުރި ހުރިހާ މަސައްކަތެއް ކުރާނެކަން އެއީ ޔަގީންކަމެކެވެ.

އެގޮތުން ނިމިދިޔަ ރިޔާސީ އިންތިހާބު ކާމިޔާބު ކުރުމަށް ޕީއެންސީގެ ކެންޑިޑޭޓު ލައްކަ ގިނަ ޗައްކަރު ޖައްސަވާ ލައްކަ ގިނަ ދޮގުވެސް ހެއްދެވިކަން މިއަދު ދަނީ ހާމަވަމުންނެވެ.

އެގޮތުން 2023 ވަނަ އަހަރުގައި ބޭއްވި ރިޔާސީ އިންތިހާބުގެ ދުވަސްވަރު ގައުމުގައި ހުރި ބޮޑެތި މައްސަލަތައް ކަމަށް ބުނެ ލައްކަ ގިނަ މައްސަލަތައް ރައްޔިތުންގެ ސަމާލުކަމަށް ގެނެސް މުޅީ ސިޔާސީ އޮއިވަރު ބަދަލުކުރުމަށް އެ މައްސަލަތަކުގައި ހިފާ ވައުދުތައް ވަމުން މިހާރުގެ ރައީސުލްޖުމްހޫރިއްޔާ ވަޑައިގެންނެވިއެވެ.

އަލަތު ލޯބި ހޯދުމަށް ބިޓު މަންޖެއްއަށް ވައުދު ވަމުންދާހެން ރައީސް މުއިއްޒުވެސް އަލަތު ރިޔާސީ އިންތިހާބަށް ނުކުތުމަށް ރައްޔިތުންނަށް ވައުދުވެ ތަރި ހަނދާ އިރުވެސް ނަގާ އަތަށް ލައިދޭނެ ދަރަޖައަށް ވައުދުވެވަޑައިގެންނެވިއެވެ.

2023 ވަނަ އަހަރު ރާއްޖޭގެ ސިޔާސީ މަސްރަހު ބަދަލުކޮށްލި އެންމެ ވަރުގަދަ ކަންކަމުގެ ތެރޭގައި ފާހަގަކޮށްލެވޭ އެންމެ ބޮޑު ކަމަކީ އޭުރގެ ހުރި ހަމައެކަނި ސިޔާސީ ލީޑަރު ނުހައްގުން ޖަލަށް ލާ ބަންދުކޮށް ރިޔާސީ އިންތިހާބުގައި ވާދަކުރުމުގެ ފުރުސަތު ނިގުޅައިގަތުމެވެ.

އެއާއެކު ތަންވަޅު ބަލަން ހުންނަވާފައި ނުކުމެވަޑައިގެން އަދުގެ ރައީސުލްޖުމްހޫރިއްޔާ އިންތިހާބަށް ޖެއްސެވި ފުރަތަމަ ކަނޑައަކީ ރައީސް އަބްދުﷲ ޔާމީން މިނިވަންކުރާނެ ކަމަށް ވިދާޅުވެ ޖެއްސެވި ކަނޑައެވެ. އެއާއެކު އެމަނިކުފާނަށް އިންސާފު ލިބެން އެދި އެދި ތިބި އެތައް ބަޔަކު ރައީސް މުއިއްޒުގެ ފަހަތަށް އަރާ ރިޔާސީ އިންތިހާބު ކާމިޔާބުކޮށްދިނުމަށް ރެޔާ ދުވާލު ވަރުވަލިކަމެއް ނެތި މަސައްކަތްކުރިއެވެ.

ނަމަވެސް އިންތިހާބު ކާމިޔާބުވެ ވެރިކަމަށް ވަޑައިގެންނެވުމާ އެކު ރައީސް މުއިއްޒު ކަނޑިކި ބުރި މަތިން ހަނދާން ނެތުނެވެ.

މީގެ އިތުރުން ދިވެހިންގެ މިނިވަންކަމާ އިސްތިގުލާލު ނިގުޅައިގަތުމަށް، ބޮޑު ބޭބެއިން ކަމަށް ހެދިގެން ތިބި އަވައްޓެރިން ކުރަމުން ދިޔަ މަސައްކަތް ފަނު ފުލުން ދުއްވާލި "އިންޑިއާ އައުޓު" އަކީވެސް ރައީސް މުއިއްޒު ވެރިކަމަށް ވަޑައިގެންނެވުމަށް މެދުވެރިވި އެއް ކަނޑައެވެ. އެގޮތުން ދިވެހިންނަކީ ޒަމާނުއްސުރެވެސް މިނިވަންކަމާއި އަމިއްލަވަންތަކަމުގެ ފަހުރުވެރި ވިންދު ޖަހަމުން އަންނަ އަޒްމު ވަރުގަދަ ބަޔަކަށްވުމުން ކާބަފައިން ގެނެސްދީފައި އޮތް މިނިވަންކަމުގެ އަގު ހުރި ނިއުމަތް ދެމެހެއްޓުމަށް ޖިހާދުކޮށް 2023ގެ ރިޔާސީ އިންތިހާބުގައި ކާމިޔާބު ދިވެހީން އިންޑިއާގެ މައްޗަށް ހޯދާ އުފާފާޅުކުރިއިރު މިއަދު ސަރުކާރުން ވަނީ ބޮޑު ތަނުން އިންޑިއާ "އިން" ކޮށްފައެވެ.

"ވީ މައިޓް ބީ ސްމޯލް ބަޓް ދެޓް ދަޒުންޓީ ގިވް ދަ ލައިސަންސް ޓު ބުލީ އަސް" އޭ ވިދާޅުވުމަށް ފަހު ބުލީ ކުރަން ފުރުސަތު ހުޅުވާލަ ދިނީ ޚުދު ރައީސް މުއިއްޒެވެ. ފެހި ސިގްނަލުތަކުން ލޯނުތައް ދެއްކޭނެ ކަމަށް ދެއްކި ހުވަފެން ބިލާހަކަށްވެ ރެޑް ސިގްނަލުގައި ޖެހި މޯދީ ޖީގެ ފައި ބުޑަށް ވެއްޓި ދިވެހީންގެ ރައީސް ދިވެހީން އަނެއްކާވެސް ރެޑް ސިގްނަލަށް ވައްޓާލީ އިންޑިއާއިން ދޫކޮށްފައި ހުރި ލޯނުތަކުގެ އަލުންނަށް ދިވެހިން ހަދަމުންނެވެ. ޕްރޯ މޯލްޑިވްސް ވާނެ ކަމަށް ވިދާޅުވި ޚާރިޖީ ސިޔާސަތު ފަނު ފުލުހުން ދުއްވާލާ ދިވެހީން ބައިނަލްއަގްވާމީ ދުނިޔޭގައި ލަދު ގަންނުވާލައިފިއެވެ.

ދެން އޮތީ " ޗަ ގޯސް" ވެގެން ގޮސް އުފެދުނު ޗާގޯސްގެ މައްސަލައެެވެ. މިއަދު އެ މައްސަލައިގެ ހިލަމެއްވެސް ނެތެވެ. "ޗަ ގޯސް" ވެގެން އަޑު ގަދަ ކުރި ބޭފުޅުން ވަޒީރުކަމުގައި ތިއްބަވާ، ކުރީ ސަރުކާރުން ވިއްކާ ދިވެހީންގެ ކަނޑުގެ މައްސަލައަށް ކަތި ނަޒަރަކުން ވެސް ނޫނީ ވަށްކަޅިންވެސް ބަލާނުލުން އަދި މާ ގޯހެވެ.

މި ކަންކަން މިހެން ހުރިއިރު ވެރިކަމަށް އަހަރެއް ނުވަނީސް އޭރު އިންތިހާބު ކާމިޔާބު ކުރަން ދެއްކި ވާހަކަތައް ސައިބޯނި ބޮކިތަކަށްވެ ނިމިއްޖެކަން ހާމަވެއެވެ. އެ ވާހަކަތަކަށް އަމިއްލައަށް އިއުތިރާފުވެވަޑައިގަތުމުގެ އިތުރުން އަމަލުން ވެސް ރައީސް މުއިއްޒު އެމަނިކުފާނުގެ ދެފުށްދެގޮތްކަން ސާބިތު ކޮށްދެއްވައިފިއެވެ.

ރިޔާސީ އިންތިހާބާ ދިމާކޮށް ސިޔާސީ ބޯކެޔޮވަލުގައި ލީ ހުރިހާ ހުޅަކަށް މިއަދު އަމިއްލައަށް ފެން އަޅާ ނިވަމުންދާއިރު މިކަން ވެގެން މިދަނީ އަދުވެ ވެރިން ސަންދޯކުގައި ޖަހާނެ ފަހު މޮހޮރަށް ކަމަށްވުމަކީ އެކަށީގެން ވާ ކަމެކެވެ.