ދުންފަތް އެކުލެވޭ އެކި ބާވަތްތަކާއި ވޭޕް ރާއްޖެ އެތެރެކުރުން މަނާކުރުމަށް މޯލްޑިވިއަން މެޑިކަލް އެސޯސިއޭޝަން (އެމްއެމްއޭ) ގޮވާލައިފިއެވެ.

ދިވެހި ޑޮކްޓަރުންގެ ޖަމްއިއްޔާއިން މިފަދައިން ގޮވާލާފައިވަނީ އެ ޖަމްއިއްޔާއިން ނެރުނު ބަޔާނެއްގައިއެވެ.

އެ ބަޔާނުގައި ދުނިޔެއާއި ރާއްޖެއަށް ކުރިމަތިލާން ޖެހޭ އެންމެ ބޮޑު އެއް ގޮންޖެހުމަކީ ގައިންގަޔަށް ނާރާ ބަލިތައް ފާހަގަކޮށްފައިވެއެވެ. އެގޮތުން، ދުންފަތުގެ ބާވަތްތައް ބޭނުން ކުރުމަކީ ގައިންގަޔަށް ނާރާ ބަލިތައް ޖެހެން މަގުފަހިވާ ކަމެއް ކަމަށް އެތައް ދިރާސާއަކުން ސާބިތުވެފައިވާ ކަމަށް އެ ޖަމްއިއްޔާއިން ބުނެފައިވެއެވެ.

ރާއްޖޭގެ ތަފާސްހިސާބުތަކާ ހަވާލާދީ އެބަޔާނުގައި ބުނެފައިވާ ގޮތުން އާންމުކޮށް ދުންފަތުގެ އިސްތިއުމާލު ކުރަން ފަށަނީ އުމުރުން 18 އަހަރުގެ ކުރިންނެވެ.

ދުންފަތަކީ އެތައް ހާސް ކެމިކަލް މާއްދާއަކާއި 250 ވިހަ އެކުލެވޭ އެއްޗަަކަށްވާއިރު، އޭގެ 70 މާއްދާއިން ކެންސަރަށް މަގުފަހިވާ ކަމަށް ދިރާސާތަކުން ދައްކާ ކަން ބަޔާނުގައި ފާހަގަކޮށްފައިވެއެވެ.

އިތުރަށް އެބަޔާނުގައި ބުނެފައި ވަނީ، ވޭޕާއި އީ ސިނގިރޭޓަކީ ގެއްލުން ކުޑަ އެއްޗެއް ކަމަށް ބުނާ ނަމަވެސް، އެ ބާވަތްތަަކަކީ ސިއްހަތަށް ގެއްލުން ހުރި ބާވަތްތައް ކަމަށް އެތައް ދިރާސާއަކުން ސާބިތުވެފައިވާ ކަަމަށެވެ.

އެ ޖަމްއިއްޔާއިން ބުނާ ގޮތުން، ވޭޕާއި އީ ސިނގިރޭޓުގައި މަސްތުވާތަކެތި ގަޑުބަޑު ކުރުމުގެ ފުރުސަތު ބޮޑު ކަމަށާއި މަސްތުވާތަކެއްޗަށް ދެވި ހިފުމަށް ވެސް މަގުފަހިވާކަމަށެވެ.

އެހެންވެ، ދުންފަތުގެ ބާވަތްތަކާއި ވޭޕް ރާއްޖޭގައި މަނާ ކުރަން ފިޔަވަޅުތަކެއް އެޅުމަށް ކަމާ ބެހޭ އިދާރާތަަކަށް އެ ޖަމްއިއްޔާއިން ވަނީ އިލްތިމާސްކޮށްފައެވެ.

ދުނިޔޭގެ 34ގައި ގައުމެއްގައި ވޭޕް މަނާކޮށްފައިވާކަން ފާހަގަކޮށް އެ ޖަމިއްޔާއިން ބުނީ، ރާއްޖޭގައި އެކަން ކުރުމުން ދިވެހިންގެ އާންމު ސިއްހަތު ރަނގަޅުވެ، މުޖުތަމައުގެ ސިއްހީ ހާލަތަށް ހެޔޮ ބަދަލުތަކެއް އަންނާނެ ކަމަށެވެ.

ދުންފަތުގެ ބާވަތްތައް ބޭނުން ކުރުމުން ޖެހޭ އެފަދަ ބަލިތަކުގެ ތެރޭގައި ނޭވާލާ ނިޒާމުގެ ބަލިތަކާއި ހިތުގެ ބަލިތަކާއި ހަކުރު ބަލީގެ އިތުރުން ސްޓްރޯކް ހިމެނެއެވެ.

ދުންފަތުގެ ނުސީދާ ދުމަށް (ސެކަންޑް ހޭންޑް ސްމޯކިން) ހުށަހެޅުމުން ކުޑަކުދިންނަށް ނޭވާ ހިއްލުމާ ފުއްޕާމޭގައި ޖަރާސީމް އަށަގަތުމާއި ލޭގެ ކެންސަރު ޖެހުން ފަދަ ސިއްހީ މައްސަލަތައް ދިމާވެއެވެ. މާބަނޑޫ މީހުންނަށް ބައިގެން ދިޔުމާއި ދުވަސްނުފުރާ ވިހެއުން، އުފަންވާ އިރު ދަރިފުޅުގެ ބަރުދަން ލުއިންވުން ފަދަ ހާލަތްތައް ކުރިމަތިވެއެވެ.

ހަމައެހެންމެ، ޑަބްލިއުއެޗްއޯއާ ހަވާލާދީ މެޑިކަލް އެސޯސިއޭޝަނުން ބުނީ، ޕުއްޕާމެއަށް ޖެހޭ ކެންސަރު ބަލީގެ 85 ޕަސެންޓު ސަބަބަކީ ދުންފަތުގެ ސީދާ ދުން ކަމަށާއި އަހަރަކު އަށް މިލިއަން މީހުން ދުންފަތުގެ އިސްތިއުމާލު ކުރުމުގެ ސަބަބުން އެކި ބަލިތަކުގައި މަރުވާ ކަމަށެވެ.

އޭގެތެރެއިން، 1.3 މިލިއަން މީހުން މަރުވަނީ ދުންފަތުގެ ނުސީދާދުމުން ދުނިޔެ ދޫކުރާ މީހުންކަން ޑަބްލިއުއެއްޗްއޯއިން ފާހަގަކޮށްފައިވެއެވެ.