ނޭވާލާ ނިޒާމަށް ޖެހޭ ވައިރަހަކުން ޖެހޭ ބައްޔެއް ފެތުރުން އިތުރުވާތީ، ސަމާލުވާން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އިލްތިމާސްކޮށްފިއެވެ.
ނޭވާލާ ނިޒާމަށް ޖެހޭ ރޯގާއެއް ކަމަށްވާ "ރެސްޕިރޭޓަރީ ސިންސިޝަލް ވައިރަސް" ކުޑަކުދިންގެ މެދުގައި ހަލުވި ކަމާއެކު ފެތުރެމުންދާތީ އެކަމަށް ސަމާލުވުމަށް އިލްތިމާސްކޮށް އެޗްޕީއޭއިން ނެރުނު ބަޔާނުގައި ބުނެފައިވަނީ، ކުޑަކުދިންގެ މެދުގައި މި ވައިރަސް ފެތުރެމުންދާތީ، ވަރަށް ކައިރިން މޮނީޓާ ކުރަމުންދާ ކަމަށެވެ. އަދި ބަލިން ރައްކާތެރިވުމަށް އަމިއްލައަށް ފިޔަވަޅު އެޅުމަށް ވެސް އިލްތިމާސްކޮށްފައިވެއެވެ. ހާއްސަ ގޮތެއްގައި ކުޑަކުދިން ބަލިން ރައްކާތެރިކުރުމަށް ހާއްސަ ފިޔަވަޅުތައް އެޅުމަށް ވަނީ އިލްތިމާސްކޮށްފައެވެ.
އެގޮތުން ގިނައިން އަތް ދޮވެ، މީހުން ގިނަ ތަންތަނަށް ނުދިއުމަށާއި މާސްކު އަޅައި ރައްކާތެރިވުމަށް އެޗްޕީއޭއިން ވަނީ އިލްތިމާސް ކޮށްފައެވެ. އަދި ވަކިން ހާއްސަކޮށް ކުޑަކުދިން ބަލިން ރައްކާތެރިކުރުމަށް ފިޔަވަޅު އެޅުމަށް އެދިފައިވެއެވެ.
މީގެ އިތުރުން ހުން އައިސް، ކެއްސައި، ނޭވާލާ ލުމަށް އުނދަގޫވުމާއި މޭގައި ރިއްސުން ފަދަ އަލާމާތެއް ދިމާވާ ނަމަ ލަސްނުކޮށް ޑޮކްޓަރަށް ދެއްކުމަށް ވެސް އިލްތިމާސްކޮށްފައިވެއެވެ.
އެ އިދާރާއިން ބުނީ ބައްޔަށް ފަރުވާ ހޯދުން އަވަސްކޮށްފި ނަމަ ބަލިން ސަލާމަތް ވުން އަވަސްވާނެ ކަމަށެވެ.
ކުރުކޮށް ކިޔާ ގޮތުންނަމަ އާރްސީވީއަކީ ނޭވާލާން އުނދަގޫވާ ވައިރަހެކެވެ. މި ވައިރަހުގެ ސަބަބުން ނޭވާލާ ނިޒާމުގައި އިންފެކްޝަން އުފެދެ އެވެ. އެގޮތުން މި އިންފެކްޝަނުގެ ސަބަބުން ނޭފަތާއި ކަރުތެރެއާއި ފުއްޕާމޭއަށް ބަލި ޖެހެއެވެ.
މި ވައިރަސް ޖެހޭ މީހާ ބަލިން ރަގަޅު ވިޔަސް ބައެއް ފަހަރު ގިނަ ދުވަސްވާންދެން ނޭވަޔަށް އުނދަގޫ ކުރެ އެވެ. މި ވައިރަހަކީ އާންމުކޮށް ރޯގާ ޖެހުމުން ވެސް ބަލި ފެތުރޭހެން، ކެއްސާ ކިނބިލިއަޅާއިރު ނުކުންނަ ކުޅުފަދަ އެއްޗެހިން ޖެހޭ ވައިރަހެކެވެ. މި ވައިރަހަކީ ބައެއްފަހަރު ކުޑަކުދިންނަށް ނުރައްކާ ވައިރަހެކެވެ.
