ރައީސް އަބްދުﷲ ޔާމީން އަބްދުލްގައްޔޫމް ޖަލަށް ލިޔަސް ޖަލަށް ނުލިޔަސް މި ސަރުކާރަށް ދެ ދައުރު ނުލިބޭނެ ކަމަށް ކުރީގެ ދާޚިލީ ވަޒީރު ޢުމަރު ނަސީރު ވިދާޅުވެއްޖެ އެވެ.

އުމަރު ވިދާޅުވީ ރައީސް ޔާމީނަކީ ސިޔާސީ ގޮތުން އަދިވެސް ވަރަށް މަޤްބޫލު ޝަޚުސިއްޔަތެއް ކަމަށެވެ. ޚާއްސަކޮށް ޕީޕީއެމް އާއި ޕީއެންސީގެ އާންމު މެންބަރުންގެ މެދުގައި އެންމެ މަޤުބޫލް ސިޔާސީ ޝަޚްސިއްޔަތަކީ ރައީސް ޔާމީން ކަމަށް އުމަރު ފާހަގަކުރެއްވިއެވެ.

މި ސަރުކާރަށް އެމްއެމްޕީއާރްސީ މައްސަލައެއް ނުބެލޭނެކަމަށް އަދި ސަރުކާރުން ދައްކަމުން އެދަނީ ރައީސް ޔާމީން ޖަލަށްލާ ވާހަކަ ކަމަށްވެސް ޢުމަރު ވިދާޅުވިއެވެ.ސަރުކާރުން މަސައްކަތް ކުރަމުން ދަނީ ވީހާވެސް އަވަހަކަށް ރައީސް ޔާމީން ޖަލަށް ލުމަށް ކަމަށާއި ސަބަބަކީ މާ ލަސްވެއްޖެނަމަ އެކަން ނުވާނެތީ ކަމަށްވެސް ޢުމަރު ވަނީ ވިދާޅުވެފައެވެ.

އުމަރު ވަނީ މި ސަރުކާރުގެ ޚާރިޖީ ސިޔާސަތަށް ފާޑު ވިދާޅުވެ ފެންނަމުން ދަނީ މި ސަރުކާރުން އިންޑިއާގެ އުނގަށް ވެއްޓިފައިވާ މަންޒަރު ކަމަށް ފާހަގަކުރައްވާފައެވެ.

މި ސަރުކާރުން ވެރިކަމަށް އައީ ރައްޔިތުންނަށް ވަރަށް ބޮޑަށް އޮޅުވާލައިގެން ކަމުން ދެވަނަ ދައުރެއް ރައްޔިތުންނެއް ނުދޭނެކަމަށްވެސް އުމަރު ވިދާޅުވިއެވެ.