ވެރިކަމުގައި ހުރި ވެރިޔާއަކީ ވަރަށް މާތް މީހެއްގެ ގޮތުގައި ދެއްކުމަށް ސަރުުކާރުގެ ބޮޓުން ކިތަންމެ ވަރަކަށް މަސައްކަތް ކުރި ނަމަވެސް އެ މަސައްކަތަކީ ބޭކާރު މަސައްކަތެކެވެ. ވެރިކަން ހޯދީ ރައްޔިތުންނަށް އޮޅުވާލައިގެންނެވެ.މޫނަށް ރުލެއް ވެސް އަރުވާލުމެއްނެތި ހެދީ ކިތައް ދޮގުހެއްޔެވެ. ހައިރާނެއް އަޅެ މީހަކު ނުވާނެހެއްޔެވެ.

ރިޔާސީ އިންތިޚާބްގެ ކެމްޕެއިން ދުވަސްވަރު ރައްޔިތުން ކައިރިއަށް ގޮސް ވޯޓު ހޯދުމުގެ ނިޔަތުގައި މި ވެރިޔާ ހެދި ދޮގުތަކަށް ބަލާއިރު، އެންމެ ފުރަތަމަ ދޮގަކީ ރައީސް އަބްދުﷲ ޔާމީން އަބްދުލްގައްޔޫމް މިނިވަން ކުރައްވާނެކަމަށް ވެވަޑައިގެންނެވި ވައުދެވެ. އެމަނިކުފާނުގެ ހުސް ގޮނޑިއާ، ފޮޓޯ ފުޅާ އެމަނިކުފާނު ތަރައްގީ ވިއްކައިގެން ވެރިކަން ހޯދުމަށްފަހު އެ ވައުދު ކަފުންކޮށް ވަޅުލިއެވެ. މިއީ އެންމެ ފުރަތަމަ ވައުދެވެ. ދެން ހުރި ވައުދުތަކުގެ ވާހަކަ ރަނގަޅުވާނީ ނުދެއްކިއްޔާއެވެ. އެގޮތުން އިންޑިޔާގެ އަސްކަރިއްޔާ މިގައުމުން ބޭރުކުރުމާއި ގެއްލުނު ކަނޑު އަނބުރާ ހޯދުމަށް ވީ ވައުދުތައް ހޯދަން ޖެހޭނީ އިންޓަރޕޯލް ރެޑް ނޯޓިސް ނެރޭށެވެ.

ކުރީގެ ރައީސް އިބްރާހިމް މުހައްމަދު ޞާލިހްގެ ސަރުކާރުން އަވައްޓެރި ގައުމު އިންޑިޔާއާއެކު ހަދާފައިވާ ގޮތް ނޭނގޭ އެއްބަސްވުންތައް ހާމަކުރާނެ ކަމުގެ ވައުދާއެކު އައިސް މިހާރު ވިދާޅުވަނީ އެކަން ކުރީމަ ގައުމީ ސަލާމަތައް ނުރައްކާވާނެކަމަށެވެ. ދެން އިދިކޮޅުގައި އޮވެ އޭރު އެ ދެއްކެވީ ކޮން ހޮޅި ވާހަކަތަކެއްތޯއެވެ. މިވަރު ވީމާ ކުދިންކޮޅު މިއީ ބަރާބަރު ރައީސްއެކޭ ބުންޏަސް ގަބޫލުކުރާނެ މީހެއް ނުވާނެކަން ޔަގީނެވެ.

ނޫސްވެރިންގެ މެދުގައި ތަފާތުކުރުންތައް ގެންގުޅުމާއި ވެރިކަމުގައި ހުރެ ބާރުގެ ބޭނުން، ބޭނުންތަނަކަށް، ބޭނުންމީހަކަށް ކުރާ މަންޒަރަކީ އޮޅުވާލާފައި ވަޔާ ހޫރާލެވޭނެ ފަދަ މަންޒަރުތަކެއް ނޫނެވެ. އެހެން ގައުމުތަކުގެ ވެރިންގެ އަރިހަށް ގޮސް ދެއްްކޭ ނުދެއްކޭ ވާހަކަ ނޭނގުނީމާ ދެން ތިމާފޭހުނު އިލޮށިގަނޑު ހެރޭނީ ތިމާގެ ލޮލަށެވެ.

ރައްޔިތުންގެ މަޖިލީހުގެ ސަރުކާރުގެ މެމްބަރުންނަށް ކޮންމެ މަހަކު 50،000 ރުފިޔާ ދީފާއި ނުދޭކަމަށް ބުނީމާ ދެން އެ ގޮވަނީ ލޮލަށެވެ. ބޮޑެތި ކަޅު ދަބަސްތައް ހިފައިގެން ދިމްޔާތުން ނިކުމެގެން ދިޔަ މަންޒަރު ފެނުނީމާވެސް އެކަން ވެސް އެއީ އަގުވައްޓާލަން ކިޔާ އެއްޗަކަށް ވެނިމުނެވެ.

ވެރިޔާ ވެރިކަމުގައި ހުރެ ކުރާ ކޮންމެ ގޯސްކަމަކީ ރަނގަޅު ކަމެއްގެ ގޮތުގައި ހަދައިގެން އެ ވާހަކަ މީސްމީޑިޔާގައި ދައްކާ ތައުރީފް ކުރާތީ ހައިރާންވެސް ވެއެވެ. މަގާމަކަށްޓަކައި މީހާގެ އަގު ވައްޓަމުންދާއިރު ހަމަ ރެޔަކާ ވެސް ނުލަނީތޯއެވެ. އެހެންތާވާނީ ރުހުމުގެ ލޮލަކަށް އައިބެއް ނުފެންނާނެއެވެ.

ވެރިކަމަކީ ތާއަބަދަށް އޮންނާނެ އެއްޗެއް ނޫނެވެ. ވެރިމަަށް އަހަރެއް ނުވަނީސް ރައްޔިތުންގެ ނަފްރަތު އަމާޒުވާން ފެށި މިއީ ފުރަތަމަ ވެރިކަންކަން ހަނދާނުގައި ބެހެއްޓުން ވަރަށް މުހިންމެވެ.