ވެރިކަމުގެ ކުރީ ކޮޅު ރައީސް ޑރ. މުހައްމަދު މުއިއްޒުއާ ސަރުކާރުގެ ވަޒީރުންވެސް ހިމެނޭހެން ބޮޑޫ ވަފްދެއް ޗައިނާއަށް ކުރެއްވި ދަތުރުގައި ރައީސް މުއިއްޒު އާ ވަފްދު ވެސް ވަނީ ދިވެހީންގެ ފައިސާ ނަހަމަ ގޮތުގައި ބޭނުންކޮށްފައި ކަމަށް ޕީއެންއެފްގެ ސެކެރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެއެވެ.

މަލީހު މިފަދައިން ވިދާޅުވެފައިވަނީ ބުރާސްފަތި ދުވަހުގެރޭ އޮތް ޕީއެންއެފް ޖަލްސާގައި ވާހަކަ ދައްކަވަމުންނެވެ.

ގައުމުގައި ފައިސާނެތް ކަމަށް ސަރުކާރުން ބުނަމުންދިޔަ ނަމަވެސް ސަރުކާރުގެ ބޭފުޅުންގެ ކިބައިން ފެންނަމުން ދަނީ ސަރުކާރުގެ ކަރަދުގައި އެކި ގައުމުތަކަށް ދަތުރުކުރުމާ ބުރުޖެހުމުގެ ސިޔާސަތެކެވެ.

މިކަންކަމަށް އިޝާރާތްކުރައްވަމުން މަލީހު ވިދާޅުވީ، ޖެނުއަރީ މަހުގެ ތެރޭގައި ރައީސް މުއިއްޒުއާ ސަރުކާރުގެ ވަފްދުން ޗައިނާއަށް ކުރި ދަތުރުގައި ރިޓާން ޓިކެޓު ނަގާފައި ވަނީ ދިގު ރާސްތާއަކުން އަގު ބޮޑުކޮށް ކަމަށާ އެއީ ވަރަށް ބޮޑު ގޯހެއް ކަމަށެވެ. އަދި އެއީ ދިވެހީންގެ ފައިސާ ނަހަމަ ގޮތުގައި ބޭނުންކުރުން ކަމަށް މަލީހު ވިދާޅުވިއެވެ.

މަލީހު އިތުރަށް ވިދާޅުވީ، ސަރުކާރުގެ އިދާރާއަކުން ޓިކެޓެއް ނަގާކަމުގައި ވަންޏާ ރޫޓު ޕްލޭނިންގައި އޮންނަން ޖެހޭނީ އެންމެ ކައިރިން އެންމެ އަގު ހެޔޮ ދެވޭނެ ގޮތަކަށް ޓިކެޓު ނެގުން ކަމަށާ އެކަމާ ވެސް ރައީސް މުއިއްޒުގެ ސަަރުކާރުން ޗައިނާ ދަތުރުގައި ޚިލާފުވެފައި ކަމަށެވެ.

މަލީހު މިފަދައިން ވިދާޅުވެފައިވާއިރު، ޗައިނާއަށް ރައީސް މުއިއްޒުއާ ވަފްދުން ކުރެއްވި ދަތުރުފުޅުގައި ޕޮކެޓް މަނީގެ ގޮތުގައި އެކަނިވެސް ތިންލައްކައަށް ވުރެ ގިނަ ރުފިޔާ ޚަރަދުކޮށްފައިވެއެވެ.