ގަވާއިދާ ހިލާފަށް މަސައްކަތް ކުރާ ބިދޭސީން އަތުލައިގަތުމަށް ހިންގާ އޮޕަރޭޝަންގެ ތެރެއިން ދެ ދުވަސް ތެރޭ އިމިގްރޭޝަނުން ހިންގި އޮޕަރޭޝަން ތަކުގައި 16 ބިދޭސީން ހައްޔަރުކޮށްފައިވާ ކަމަށް އެ އިދާރާއިން ހާމަކޮށްފިއެވެ.
އިމިގްރޭޝަނުން ބުނީ މި މަހުގެ 24 އަދި 25 ވަނަ ދުވަހު އެ އިދާރާގެ ހާއްސަ ޓާސްކު ފޯހުން ހުޅުމާލޭގެ ފޭސް އެކެއްގައި ހިންގަމުންދާ 06 ކެފޭ/ހޮޓާ ބަލައި ފާސްކޮށްފައިވާ ކަމަށާއި މިތަންތަނުގައި ގަވާއިދާ ހިލާފަށް ތިބި 16 ބިދޭސީއަކު އިމިގްރޭޝަން ބެލުމުގެ ދަށަށް ގެނެވިފައިވާ ކަމަށެވެ.
ނަގަންޖެހޭ ބައެއް ހުއްދަތައް ނުނަގާ ހިންގަމުންދިޔަ ތިން ކެފޭއަކަށް ކަމާގުޅުންހުރި އިދާރާތަކުން ނޯޓިސް ދީފައިވާ ކަމަށް ވެސް އިމިގްރޭޝަނުން ވަނީ ބުނެފައެވެ.
ބުދަ ދުވަހު އިމިގްރޭޝަނުން އާންމު ކުރި ތަފާސްހިސާބުތައް ދައްކާގޮތުން ދިހަ މަސް ތެރޭގައި އިމިގްރޭޝަނުން ވަނީ ގަވާއިދާ ހިލާފަށް އުޅޭ 4،054 ބިދޭސީން ޑީޕޯޓްކޮށްލައިފައެވެ.
