ހުކުރު ދުވަހުގެރޭ ބޭއްވި ގޯތި އެއްވުމަށް ސަރުކާރުން ހުރަސް އެޅި ނަމަވެސް އެއްވުން ކުރިއަށް ގެންގޮސް މާލެ ސިޓީގެ މަޖިލިސް މެމްބަރުންގެ އިސްތިއުފާއަށް ގޮވައިފިއެވެ.

ރަސްފަންނުގައި ރޭ 9:00 އިން ފެށިގެން ކުރިއަށް ދިޔަ މުޒާހަރާ ނުދިއުމަށް އެދި މެސެޖުކޮށްފައިވާ ކަމަށާ އަދި ބައެއް މީހުންނަށް ވަޒީފާގެ ބިރުވެރިކަން ވެސް ދައްކާފައިވާ ކަމަށް ތޭރަ އޮންލައިނަށް މައުލޫމާތު ލިބިފައިވެއެވެ.

އެގޮތުން އެއްވުމުގެ ބައިވެރިން ބުނެފައިވަނީ، 2 ސެޕްޓެމްބަރުގައި ފަހި ޔޫނިއަންގެ އިސް އޮފިޝަލުންނާއި، ސިލްސިލާ މުޒާހަރާތައް ކުރިއަށް ގެންދިއުމުގައި އިސްކޮށް އުޅުނު ފަރާތްތަކުން ރައީސް ޑރ. މުހައްމަދު މުއިއްޒާ ބައްދަލުކުރި ކަމަށާ އެއަށް ފަހު ފަހި ޔޫނިއަންގެ ވެރިންގެ ޚިޔާލު ބަދަލުވެގެން ދިޔަ ކަން ހާމަވެފައިވާ ކަމަށެވެ. ނަމަވެސް އެއީ ބަލައިގަނެވޭނެ ކަމެއް ނޫން ކަމަށާ އެމީހުންގެ ކަންބޮޑުވުންތަކަށް ހައްލު ނުލިބޭ ކަމަށާއި، މަގުސަދު ހާސިލް ނުވާ ކަމަށެވެ.

މުޒާހަރާގެ ބައިވެރިން ބުނެފައިވަނީ މިސަރުކާރުން ރައްޔިތުންނަށް ވަރަށް ބޮޑަށް އަނިޔާވެރިވަމުންދާ ކަމަށާއި، ހައްގުތައް ހިފަހައްޓަމުންދާ ކަމަށެވެ. ގޯއްޗާއި، ފްލެޓު ނުދީ ލަސްވާ ކޮންމެ ދުވަހަކީ އެތައް ހައްގެއް ގެއްލިގެންދާ ދުވަހެއް ކަމަށް އެމީހުން ބުނެއެވެ. އަދި ދިރިއުޅެމުންދަނީ ވަރަށް ދަތިހާލުގައި ކަމަށާއި، ދަރިންގެ މުސްތަގުބަލު ބަނަވެފައިވާ ކަމަށެވެ.

ބޯހިޔާވަހިކަމުގެ ހައްގަށް މިސަރުކާރުން އަރައިގަނެފައިވާކަން ފާހަގަކޮށް މުޒާހަރާގެ ބައިވެރިން ބުނީ ކުޑަކުޑަތަނެއްގައި ދިރިއުޅެން މަޖުބޫރުވެފައިވާ ކަމަށާއި، އިޖްތިމާއީ ގިނަ މައްސަލަތައް ކުރިމަތިވަމުންދާ ކަމަށެވެ.

އެތައް ހުރަސް އެޅުމަށް ފަހުވެސް ފްލެޓާއި ގޯތި ދޫނުކުރާ މައްސަލާގައި ރަސްފަންނު ސަރަހައްދަށް ގިނަ އަދަދެއްގެ އާއްމު ރައްޔިތުން ވަނީ އެއްވެ އަޑު އުފުލާފައެވެ. އެގޮތުން ރައީސް އިބްރާހިމް މުހައްމަދު ސާލިހުގެ ސަރުކާރުގައި ދޫކޮށްފައިވާ ގޯތިތައް ހަވާލު ކުރުމަށް ވެސް މުޒާހަރާގެ ބައިވެރިން ވަނީ ގޮވާލާފައެވެ. އެގޮތުން ގުޅީފަޅު، ގިރާވަރުފަޅު އަދި ހުޅުމާލެ ފޭސް-3 ގެ މަސައްކަތްތައް ކުރިއަށް ގެންގޮސް މަސައްކަތުގެ އެންމެފަހުގެ މައުލޫމާތު ހިއްސާ ކޮށްދިނުމަށް ގޮވާލާފައިވެއެވެ. ނަމަވެސް އެމަސައްކަތްތައް ކުރިއަށް ނުގެންގޮސް ފުށިދިއްގަރުފަޅުގެ މަޝްރޫއު ކުރިއަށް ގެންދާ ކަމަށާއި، އެއީ ރައްޔިތުން ބަލައިގަންނާނެ ކަމެއް ނޫން ކަމަށް އެމީހުން ބުނެފައިވެއެވެ. ބޭކާރު މަޝްރޫއެއްކަން ފާހަގަކޮށް ބުނެފައިވަނީ ގޯތީގެ މައްސަލާގައި އިހުމާލުވާނަމަ އިތުރަށް މުޒާހަރާތައް ފުޅާކޮށް ސަރުކާރާ ދެކޮޅަށް ނުކުންނާނެ ކަމަށެވެ.

އެއްވުމުގައި މާލޭގެ ރައްޔިތުން ތަމްސީލުކުރާ 13 ރައްޔިތުންގެ މަޖިލީހުގެ މެންބަރުންގެ އިސްތިއުފާއަށް ވެސް ވަނީ ގޮވާލާފައެވެ. އަދި މިއަދު އެމެންބަރުން ރައްޔިތުންގެ ހައްގުގައި ވަކާލާތު ނުކުރާ ކަމަށް މުޒާހަރާގެ ބައިވެރިން ބުނެފައިވެއެވެ.

ގޯއްޗާއި ފްލެޓު މައްސަލާގައި ހައްލު ލިބެންދެން ސިލްސިލާ މުޒާހަރާތައް ކުރިއަށް ގެންދާނެ ކަމަށްވެސް ރޭގެ އެއްވުމުގައި ރައްޔިތުން ވަނީ ހާމަކޮށްފައެވެ.