ޣައްޒައަށާއި ލުބުނާނަށް ދެމުންދާ ނިރުބަވެރި ހަމަލާތައް ނުހުއްޓާނެ ކަމަށް ސަހްޔޫނީންގެ ހައްދު ފަހަނަ އަޅާފައިވާ ބޮޑޫ ވަޒީރު ބެންޖަމިން ނަތަންޔާހޫ ބުނެފިއެވެ.

އޭނާ މިފަދައިން ބުނެފައިވަނި އދ ގައި ތަގްރީރު ކުރަމުންނެވެ.

އެގޮތުން އދ ގެ 79 ވަނަ އާންމު މަޖިލީހުގައި ވާހަކަ ދައްކަމުން ނަތަންޔާހޫ ބުނެފައިވަނީ އޭނާ މިއަހަރު އދގެ އާންމު ބައްދަލުވުމަށް ދިއުމަށް ވިސްނުން ނުގެންގުޅޭ ކަމަށެވެ. އެއީ މިވަގުތަކީ އޭނާގެ ގައުމު ދިރި އޮތުމަށް ހަނގުރާމަކުރާ ވަގުތަކަށްވާތީ ކަމަށްވެސް އޭނާ ބުންޏެވެ.

ނަމަވެސް އދ ގައި ވާހަކަ ދެއްކެވި އެކި ގައުމުތަކުގެ ވެރިން ސަހްޔޫނީންނާ މެދު ދޮގު ހަދައި އަސްލެއް ނެތް އިލްޒާމުތައް އަޅުއްވައިފި ކަމުގެ ތުހުމަތުކޮށް ނަތަންޔާހޫ ބުނީ އެހެންކަމުން އެތަނަށް ގޮސް ހަގީގަތް ބުނެދޭން އޭނާ ބޭނުންވީ ކަމަށް ނަތަންޔާހޫ ބުނެފައިވެއެވެ.

އދގެ އާންމު މަޖިލީހާ މުހާތަބު ކުރައްވަމުން ނަތަންޔާހޫ ބުނެފައިވަނީ ހަނގުރާމައަށްފަހު ޣައްޒާ އަލުން އާރާސްތުކުރުމުގައި މިހާރު ޣައްޒާގައި ވެރިކަންކުރާ ހަމާސްގެ އެއްވެސް ދައުރެއް ބައިވެރިވުމެއް އޮވެގެންނުވާނެ ކަމަށެވެ.

އެގޮތުން ހަމާސްއަށް ޣައްޒާގައި އެއްވެސް ބާރެއް އޮވެއްޖެނަމަ އަލުން އެއްވެސް ތަކުރާރުކޮށް އިސްރާއީލަށް ހަމަލާދެމުންދާނެކަމަށާ އެހެންކަމުން ހަމާސް އޮވެގެންނުވާނެކަމަށް ވެސް ނިރުބަވެރި ބޮޑޫ ވަޒީރު ނަތަންޔާހޫ ބުނެފައިވެއެވެ.

ހަނގުރާމައަށް މިހާރުވެސް ނިމުމެއް ގެނެވިދާނެ ގޮތެއް އެބައޮތް ކަމަށާއި، އެއީ ހަމާސްއިން ހަތިޔާރު ބަހައްޓައި އަމާންދީ ހުރިހާ ރަހީނުން މިނިވަންކުރުންކަމަށް ނަތަންޔާހޫ ބުނެފައިވެއެވެ.

ހަމާސް އަމާންނުދޭނަމަ ފުރިހަމަ ނަސްރެެއް ލިބެންދެން ސަހްޔޫނީން ހަނގުރާމަ ކުރާނެ ކަމަށާ އެނޫންވެސް އެއްވެސް ހިޔާރެއް ނެތްކަމުގައި ބުނެ ނަތަންޔާހޫ ފާހަގަކުރީ ހަމާސްގެ ރޮކެޓުތަކުގެ 90 އިންސައްތަ ނައްތާލައި، އެ ޖަމާއަތުގެ އަސްކަރީ ބާރުގެ ދެބައިކުޅަ އެއްބައި އިސްރާއީލުގެ ބެލުމުގެ ދަށަށް ގެނެސްފައިވާ ކަމަށެވެ.

އޭގެ އިތުރަށް ލުބުނާނުގެ ހިޒްބުﷲއާ ދެކޮޅަށް ދެމުންދާ ހަމަލާތައް ހުއްޓައިނުލައްވާނެ ކަމަށާއި އިސްރާއީލާއި ލުބުނާން އެއްވާ ބޯޑަރުގައި އިސްރާއީލުން ހާސިލުކުރަން ބޭނުންވާ އިސްތިރާޖީ އަމާޒުތައް ހާސިލުވަންދެން ހަމަލާތައް ކުރިއަށްގެންދާނެ ކަމުގައި ނަތަންޔާހޫ ބުންޏެވެ.