ޝަރީއަތް ނިމެންދެން ބަންދުކޮށްފައި ހުއްޓާ ޖަލުގައި ދަންޖެހި މަރުވި މީހާގެ ހަށިގަނޑު ޕޯސްޓްމޯޓަށް ފޮނުވައިފިއެވެ.

މި މަހުގެ 24 ވަަނަ ދުވަހު ޖަލު ގޮޅީގައި މަރުވެފައި އޮއްވާ ފެނުނީ ގ. އެތްތެޔޮމާގެ، ޢަބްދުލް ޣަނީ އިސްމާއިލްއެވެ. އުމުރުން 62 އަހަރުގެ މި މީހާ ދަންޖެހިގެން މަރުވެފައި ހުއްޓާ ފެނުނީ ހެނދުނު ސައި ހިފައިގެން ދިޔަ ކަރެކްޝަންސްގެ އޮފިސަރަކަށެވެ.

ފުލުހުން ބުނީ އެ މީހާގެ ހަށިގަނޑު، ޕޯސްޓްމޯޓަށް އިންޑިއާއަށް އިއްޔެ ފޮނުވާފައިވާ ކަމަށެވެ.

މައުލޫމާޓު ލިބިފައިވާ ގޮތުގައި ޣަނީ އަކީ ކުޑަކުއްޖަކަށް ގަދަ ކަމުން ޖިންސީ ހާނީއްކަ ކަމުގެ ތުހުމަތުގައި ޝަރީއަތް ނިމެންދެން ބަންދުކޮށްފައި ހުރި މީހެކެވެ. ޣަނީއަކީ މީގެ ކުރިން މަގުމަތިން އަންހެނަކަށް ފޮށި، ޖިންސީ ގުޅުން ހިންގަން ދައުވަތުދިން މައްސަލައިގެ ކުށް ސާބިތުވެ ޖަލު ހުކުމެއް ވެސް ކޮށްފައިވާ މީހެކެވެ.