ދިވެހިރާއްޖެއާ އަވައްޓެރި ގައުމު އިންޑިޔާ އަކީ ޒަމާންވީ ރަހުމަތްތެރިންނެވެ. ހުރިހާ ސަރުކާރެއްގައި ވެސް އިންޑިޔާ އާއެކު އޮންނަ ޚާރިޖީ ގުޅުން އަބަދުވެސް ވަރުގަދައެވެ. ރައީސް ޔާމީންގެ ޒައާމަތުގައި ވެސް އިންޑިޔާ އާއެކު އެމަނިކުފާނު ބޭއްވީ އަވައްޓެރި އެހެން ގައުމުތަކަކާ ދޭތެރޭ އެ އޮންނަ ބަދަލެެެއް ނުވާ ގުޅުމެވެ. އެއްވެސް އިރެއްގައި އިންޑިޔާ އާއެކު ގުޅުން ނުބޭއްވުމަށް އެމަނިކުފާނު ވިދާޅުވެފައި ނުވެއެވެ. ވިދާޅުވީ އެ ގައުމުގެ އަސްކަރިއްޔާ މި ގައުމުގައި ފައި ހަރުކޮށްގެން ތިބޭ ތިބުން ބަލައި ނުގަނެވޭތީ އެ ވާހަކައެވެ. އިންޑިޔާ އައުޓް ކެމްޕެއިން ފެއްޓެވީ އެ މަގްސަދުގައެވެ.

މިއަދު ސަރުކާރުގެ އިސް ފަޑީގައި ތިއްބެވި ފަރާތްތަކަކީ އެ ކެމްޕެއިންގައި އެމަނިކުފާނާއެކު މަސައްކަތްކުރެއްވި ބޭފުޅުންނެވެ. މިއަދު ލިބިފައި އެވާ އާރާއި ބާރާ، ޝާނާއި ޝައުކަތު ލިބިވަޑައިގެންފައި އެ ވަނީ އެ ކެމްޕެއިންގެ ވާހަކަތައް ދައްކައިގެންނެވެ. މިކަމަކީ ހުރިހާ އެންމެނަށް ވެސް އެނގޭ ބޮޑު ސިއްރެކެވެ.

ވެރިކަމަށް ދެއްކެވި ހުރިހާ ވާހަކައެއް ވެރިކަމަށް އައުމަށްފަހު ކެންސަލްކޮށްލީ ހިޔާލެއް ފިކުރެއްނެތިއެވެ. ސަރުކާރުގެ 3 ނައިބަކު އިންޑިޔާގެ ޕްރައިމް މިނިސްޓަރ ނަރެންދްރަ މޯދީއަށް މީސްމީޑިޔާގައި ފުރައްސާރަ ކުރުމާއެކު ފެށިގެންދިޔައީ "ރާއްޖެ-އިންޑިޔާ" ކުޑަ ހަނގުރާމައެކެވެ. މީސްމީޑިޔާގައި އިންޑިޔާގެ ރައްޔިތުން ރުޅި ގަދަވެގެން ޕޯސްޓް ކުރަމުން ދިޔަ އިރު ރާއްޖެ މީހުން ދިޔައީ އެ މީހުންގެ ޕޯސްޓްތަކަށް ރައްދު ދެމުންނެވެ. މިކަން މިހެން ހިނގަ ހިނގާ އޮއްވާ ޗައިނާ އަށް ކުރެއްވި ދަތުރުފުޅު ނިންމަވާލެެއްވުމަށްފަހު ރާއްޖެ ވަޑައިގެން ރައީސް ޑރ މުހައްމަދު މުއިއްޒު ވިދާޅުވީ "ވީ މައިޓް ބީ ސްމޯލް ބަޓް ދެޓް ޑަޒެންޓް ގިވް ޔޫ ދަ ރައިޓް ޓު ބުލީ އަޒް" މިފަދައިން އެ ވިދާޅުވީ އިންޑިޔާއަށެވެ. އިންޑިޔާ އަށް ބަރޯސާނުވެ ބޭސްފަރުވާޔާއި ކާޑުގެ ބާވަތްތައް ގެންނާނީ އެހެން ގައުމުތަކުން ކަމަށް ވިދާޅުވެ މޮޅެތި ބޮޑެތި ވާހަކަ ދެެއްކެވިއެވެ.

ދާދި ފަހުން އދ އަށް ކުރެއްވި ދަތުރުފުޅުގައި ޔުނިވަސިޓީއަކަށް ވަޑައިގެން ރައީސް މުއިއްޒު ވިދާޅުވީ އިންޑިޔާގެ ބޮޑު ވަޒީރަށް ފުރައްސާރަ ކުރި ނައިބުންނަށް ފިޔަވަޅު އަޅުއްވާފައި ވާނެކަމަށެވެ. ފިޔަވަޅު އެ މާނަކުރެއްވީ އެމީހުން ސަސްޕެންޝަންގައި ބައިތިއްބައިގެން 9 މަސްވަންދެން ބޮޑު މުސާރަ ދިނުމައް ކަންނޭނގެއެވެ.

މިކަމުގެ ސަބަބުން އިންޑިޔާއާއެކު އޮތް ގުޅުން ހީނަރުވެފައިވަނިކޮށް ރާއްޖޭން ފެށީ އިންޑިޔާގެ ފައިބުޑަށް ވެއްޓި ސަލާންޖަހާށެވެ. އެގޮތުން ކުރީގެ ރައީސް އިބްރާހިމް މުހައްމަދު ޞާލިހްގެ ސަރުކާރުން ބަޖެޓް ސަޕޯޓްގެ ގޮތުގައި ނަގާފައިވާ 50 މިލިއަން އެމެރިކާ ޑޮލަރުގެ ލޯނު ދެއްކުން ފަސްކޮށްދިނެވެ.

މާލޭގައި ހުންނަ ސްޓޭޓް ބޭންކް އޮފް އިންޑިއާ އިން ޓްރެޝަރީ ބިލުގެ ގޮތުގައި ނަގާފައިވާ މި ލޯނު ގެ މުއްދަތު، އޮތީ ސެޕްޓެމްބަރު 19ށް ހަމަވާ ގޮތަށެވެ. އެހެންކަމުން އެއް އަހަރުގެ މުއްދަތެއްް އެެއްވެސް ކަމަކާ ނުލައި ދެއްކުން ފަސްކޮށްދޭނެހެއްޔެވެ.

މިހާރަކަށް އައިސް އިންޑިޔާއިން ވެސް އަދި ރާއްޖޭން ވެސް ދައްކަނީ ޚާރިޖީ ގުޅުން ބަދަހިވެފައިވާ ވާހަކައެވެ. އަޖައިބުވެ އަންތަރީސްވާ ފަދަ ވާހަކަތަކެވެ. ކަންކަން މިހެން އޮއްވާ ސްރީ ލަންކާގެ ކުރީގެ ރައީސް ރަނިލް އިންޓަވިޔުއެއްގައި ވިދާޅުވެއްޖެ، ރައީސް މުއިއްޒު އިންޑިޔާ އައުޓް ޖެއްސެވީ ރައްޔިތުންނަށް އޮޅުވާލާ ވޯޓު ހޯދުމަށްކަމަށެވެ. މިވާހަކަ ރަނިލް ގާތު ވިދާޅުވީ މުއިއްޒު ކަމަށް ވެސް އޭނާ ވިދާޅުވިއެވެ.

ކުރިން ކީހާ ޅެން ފަރިއްސައްވެއްޖެއެވެ. އިންޑިޔާގެ ބޮޑު ދޯސްތައް ރާއްޖެ ވެއްޖެއެވެ. އިންޑިޔާގެ ފައިބުޑަށް ނާށިގަނޑު ހިފައިގެން ގޮސް ސަލާންޖެހުމަށް މި ވެރިން މިކިޔަނީ ޚާރިޖީ ގުޅުން ބަދަހި ކުރުންކަމަށް ވަންޏާ އަޅުގަނޑު ހުންނާނީ ހަނެވެ.