ފިޝަރީޒް މިނިސްޓްރީގެ ޓީމު ރަށްރަށުން ބޭރުކުރަން ފެށީ މި ސަރުކާރުގެ ބަހާއި އަމަލު ދިމާނުވުމުން ކަމަށް އެމްޑީއޭ އަށް ނިސްބަތްވާ ވެލިދޫ ދާއިރާ މެންބަރު މުހައްމަދު އައްބާސް ވިދާޅުވެއްޖެ އެވެ.

އައްބާސް މިފަދައިން ވިދާޅުވީ ފިޝަރީޒު މިނިސްޓްރީގެ ޓީމު ގއ. ދެއްވަދޫން ބޭރުކުރާ ވީޑިއޯއާއެކު އެކްސްގައި ކުރެއްވި ޕޯސްޓެއްގައެވެ.

އެގޮތުން އައްބާސް ވިދާޅުވީ ރާއްޖޭގެ މަސްވެރިންގެ ހާލަތު މިހާ ހިސާބަށް ދިޔައީ ފާއިތުވަމުން މިދާ އަހަރު ދުވަހުގެ ތެރޭގައި ސަރުކާރުގެ ބަހާއި އަމަލު ދިމާނުވުމުގެ ސަބަބުންކަމަަށެވެ. މަސްވެރިންގެ އަތްމަތި ދަތިވެ، ދަރަނިވެރިވެ، އެބައި މީހުންގެ އާއިލާތައް މަގުމަތިވާ ހިސާބަށް ދިޔައީމަ ކަމަށް ވެސް އައްބާސް ވިދާޅުވިއެވެ.

މެމްބަރު އައްބާސް މިފަދައިން ވިދާޅުވެފައިވާއިރު މެމްބަރު ޝަމްހީދު ވެސް ވަނީ މި ސަރުކާރުން މަސްވެރިން ބިކަކޮށްފި ކަމަށް ތުހުމަތުކުރައްވާފައެވެ.

48 ގަޑިއިރު ތެރޭ މަސްކިރާފަ ފައިސާ ދޭނެކަމުގެ ވައުދާއެކު ވެރިކަމަށް އައިސް ސަރުކާރުން ވަނީ މަސްވެރިންނަށް ފައިސާ ދިނުމުގައި ވަރަށް ބޮޑަށް އިހުމާލުވެފައެވެ. މިކަމުގެ ސަބަބުން ގިނަ މަސްވެރި އާއިލާތަކަކުން އަންނަނީ ސަރުކާރާ ދެކޮޅަށް މުޒާހަރާތައް ކުރަމުންނެވެ.