ސަރުކާރަށް ނިސްބަތްވާ މަޖިލިސް މެމްބަރުންނަށް ވަނީ ސަރުކާރުން ހަދާ ގޯހުގެ ޑިފެންސަށް ކޮންމެ ދުވަހަކު ކުޅެން ޖެހިފައިކަމަށް ކެންދޫ ދާއިރާގެ މެމްބަރު މައުރޫފު ޒާކިރު ވިދާޅުވެއްޖެއެވެ.

އޭނާ މިފަދައިން ވިދާޅުވެފައިވަނީ ރާއްޖެ ޓީވީގެ ޕްރޮގްރާމެއްގައި ވާހަކަ ދައްކަވަމުންނެވެ.

ޒާކިރު ވިދާޅުވީ ފެންނަމުން ދަނީ ވެރިކަމެއްގެ ވަރަށް ކުރީ ކޮޅު ރައްޔިތުން ބިކަވަމުން ދާ މަންޒަރު ކަމަށާ އެއާއެކު އެ ރައްޔިތުން، ރައްޔިތުންގެ މަންދޫބުންނާ އެ ޝަކުވާ ކުރާ ކަމަށާ އޭގެ ބަދަލުގައި މެމްބަރުންނަށް ޖެހިފައިވަނީ ސަރުކާރު ދިފާއުކޮށް އެތައް ދޮގެއް ހަދަންކަން ޒާކިރު ފާހަގަކުރެއްވިއެވެ.

އެގޮތުން ކަރަންޓު ބިލުތައް ބޮޑުވެ ތަކެތީގެ އަގު އިންތިހާއަށް މައްޗަށް އަރައިގެން ދިއުމާ އެކު ޑޮލަރުގެ އަގު ބޮޑުވެ ރައްޔިތުން ހަނާވާން ފެށުމުން އެ ރައްޔިތުން މިއަދު ތިބީ ނުހަނު ރުޅިގަދަވެފައި ކަމަށްވެސް ޒާކިރު ވިދާޅުވިއެވެ.

މީގެ ސަބަބުން މެމްބަރުންވެސް ކޮންމެ ވަރަކަށް މިޙާރު ސަރުކާރު ދިފާއުކުރަން ފަސްޖެހޭ ކަމަށް މައުރޫފު އިޝާރާތްކުރެއްވިއެވެ. އެގޮތުން މައުރޫފު ވިދާޅުވީ، މެމްބަރުންނަށް ފައިސާ ދީގެން އަބަދު އެ މެމްބަރުން ކޮންޓްރޯލް ކުރެވޭނެކަމަށް ފެނިވަޑައިނުގަންނަވާކަމަށްވެސް މައުރޫފް ވިދާޅުވިއެވެ.

ޤައުމު އަނދަވަޅަކަށް ވެއްޓުމުގެ ނުރައްކަލާއި ގެއްލުން ހުރިހާ ރައްޔިތުންވެސް ކުރިމަތިލާން ޖެހޭނެކަން ފާހަގަކުރައްވާ މައުރޫފުވަނީ އެކަމުގައި އެންމެން އެކުގައި މަސައްކަތް ކުރަން ގޮވާލައްވާފައެވެ.