ސެޕްޓެމްބަރު 30 ވަނަ ދުވަހުގެ ހަވީރުގެ ވަގުތެއްގައި އުސް ފަސްގަނޑާ ދިމާލުން މޫދުން މަރުވެފައި އޮއްވާ ފެނުނު ހ. ވެލަސްފަރުގެ، އިބްރާހީމް ޖައުހަރީ (62 އ) މަރުވެފައި އޮއްވާ ފެނުމުގެ ކުރިން މަސްބާނަން މޫދަށް ފައިބައިގެން އުޅުނު ކަމަށް ފުލުހުން ހާމަކޮށްފިއެވެ.

އިއްޔެ ހަވީރު 5:06 ހާއިރު، އުސް ފަސްގަނޑާ ދިމާއަށް މޫދުން މީހަކު އޮޔާދާ ކަމުގެ މައުލޫމާތު ފުލުހުންނަށް ރިޕޯޓުކުރުމުން އެ ސަރަހައްދަށް ގޮސް އެމީހާ މޫދުން ނަގައިގެން ހޮސްޕިޓަލަށް ގެންދިޔަކަމަށާ ގެންދިޔައިރުވެސް އެމީހާ ވަނީ ނިޔާވެފައިކަމަށް ފުލުހުން ހާމަކޮށްފައިވެއެވެ.

އެ މީހަކީ ޖައުހަރީ ކަމަށާ އެކަން ތަހުގީގުކުރަމުން ގެންދާކަމަށް ފުލުހުން އިއްޔެ ހާމަކޮށްފައިވެއެވެ. އެ މައްސަލައިގެ އަދާހަމަ ދެމުން ފުލުހުން މިއަދު ބުނެފައިވަނީ، ބްރިޖާ ދިމާލުން އޭނާ މަސްބާނަން މޫދަށް ފައިބާ އުޅުނު ކަން މިހާތަނަސް ބެލި ބެލުމުން ހާމަވެފައިވާ ކަމަށެވެ.

އުމުރުން 62 އަހަރުގެ ޖައުހަރީ އަކީ  ރާއްޖޭގައި މިހާރު މި އޮތް ވެރިކަމުގެ ނިޒާމު ގެންނަން، ކުރީގެ އިދިކޮޅު ފަރާތްތަކުން ހިންގި "އިސްލާހީ ހަރަކާތް" ފޮޓޯ ނަގައި، އެ ހަރަކާތުގައި ވަރަށް ގަދައަށް އުޅުނު އެކްޓިވިސްޓެއްގެ ގޮތުގައި ފާހަގަވެފައިވާ މީހެކެވެ.