މިދިޔަ މަހުގެ 24 ވަނަ ދުވަހު މާފުށި ޖަލުގައި ދަންޖެހިގެން މަރުވި ފިރިހެން މީހާގެ ހަށިގަނޑު ޕޯސްޓްމޯޓަމް ހެދުމަށް ފަހު، ރާއްޖެ ގެނެސް ވަޅުލައިފިއެވެ.

ދަންޖެހިގެން މަރުވެފައިވަނީ މާލެ، ގ. އެއްތެޔޮމާގޭ އުމުރުން 62 އަހަރުގެ އަބްދުލް ޣަނީ އިސްމާއީލެވެ.

އޭނާ އަކީ 15 އަހަރުގެ ކުޑަކުއްޖަކަށް ޖިންސީ ގޯނާ ކުރި މައްސަލައެއްގައި ޝަރީއަތް ނިމެންދެން ބަންދުކޮށްފައި ހުރި މީހެކެވެ. އޭނާގެ ހަށިގަނޑު ޕޯސްޓްމޯޓަމް ހަދަން ރާއްޖޭން ބޭރަށް ފޮނުވީ މިދިޔަ މަހުގެ 28 ގައެވެ.

ފުލުހުން މީޑިޔާތަކަށް ފޮނުވި މެސެޖުގައި ވިދާޅުވީ، ޕޯސްޓްމޯޓަމް ހެދުމަށް ފަހު އިއްޔެ އޭނާގެ ހަށިގަނޑު މާލެ ގެނެސް އާއިލާއާ ހަވާލުކޮށްފައިވާ ކަމަށާ އަދި، އިއްޔެ އެ މީހާގެ ހަށިގަނޑު ވަޅުލާފައިވާ ކަމަށެވެ.

ނަމަވެސް، ޕޯސްޓްމޯޓަމްގެ ނަތީޖާ ނުލިބޭ ކަމަށާއި، ނަތީޖާ ލިބުމުން އެ މައުލޫމާތު ހިއްސާކުރާނެ ކަމަށް ވެސް ފުލުހުން ވަނީ ވިދާޅުވެފައެވެ.

ކަރެކްޝަންސްއިން މިދިޔަ މަހުގެ 24 ވަނަ ދުވަހު ބުނީ، އެ ދުވަހު ހެނދުނު 6:52 ގައި އަބްދުލް ޣަނީ އިސްމާއީލްގެ ގޮޅީގައި ދަންޖެހިފައި ހުއްޓާ ފެނުމުން، ވަގުތުން އޭނާ މާފުށީ ހޮސްޕިޓަލަށް ގެންދިޔަ ކަމަށެވެ. އޭނާ މަރުވެފައިވާ ކަމަށް ޑޮކްޓަރު ކަނޑައެޅީ 7:21 ގައި ކަމަށް ކަރެކްޝަންސްއިން ބުންޏެވެ.

އެ މީހާއަކީ މީގެ ކުރިން ވެސް ކުށުގެ ރިކޯޑު އޮތް މީހެއް ކަމަށްވާއިރު، މި މައްސަލަ ކަރެކްޝަންސްގެ ޕްރޮފެޝަނަލް ސްޓޭންޑަޑުން އަންނަނީ ތަހުގީގުކުރަމުންނެވެ.

މި ހާދިސާއާ ގުޅިގެން އިދިކޮޅު ޕާޓީ އެމްޑީޕީން ވަނީ ސަރުކާރުގެ ކަމާ ބެހޭ ފަރާތްތަކުގެ އިހުމާލު އޮތް ކަމަށް ބެލުމުގެ ޖާގަ އޮތް ކަމަށް ތުހުމަތުކޮށް، އެ މައްސަލައިގެ މިނިވަން ތަހުގީގެއް ހިންގުމަށް ގޮވާލާފައެވެ.