2023 ވަނައަހަރުގެ މިދުވަސްވަރަކީ އަދުގެ ސަރުކާރަށް ވެރިކަން ލިބިގެން ހޭބޯ ނާރައިން މޮޅެތި ވާހަކަތައް ދައްކަމުންދިޔަ ދުވަސްވަރެވެ. ސަރުކާރަށް އަހަރެއް ވާން އުޅޭއިރު އަދިވެސް ހީވަނީ އެއީ އިއްޔެގެ ވަގުތެއްހެންނެވެ.

އާދެ! ދައްކަން މިއުޅެނީ މިއަދު ސަރުކާރުގައި ތިއްބެވި ރައީސް މުއިއްޒާ، މަޖިލިސް ރައީސް އަދުރޭއާ، ވަޒީރު ޝިޔާމްއާ، ސައީދާ، ޣައްސާނާ މިހެންގޮސް އެތައް ވެރިންނެއް އިންތިޚާބް ކާމިޔާބުކޮށްގެން ދެއްކެވި އެތައް ވާހަކަތަކުގެ ވާހަކައެވެ. ނުދެއްކިޔާ ވެސް ގޯސްވާނީ އަޅުގަނޑުމެންތާއެވެ.

އިންތިގާލީ މަރުހަލާތެރޭ ބާއްވަމުންދިޔަ ނޫސްވެރިންގެ ބައްދަލުވުންތަކުގައި ވެސް ފާހަގަކުރެއްވީ ނިމިދިޔަ ރައީސް އިބްރާހިމްގެ ސަރުކާރުގައި ހަދާފަ ހުރި ގޯސްތަކުގެ ވާހަކަތަކެވެ. ތިމަންނާމެން ހުވާކުރާ ހިސާބުން ހުރިހާ މައްސަލައެއް ބަލާނެކަމަށް ވެސް ބުންޏެވެ.

ނޮވެމްބަރު 17،2023 ގައި ހުވާ ކުރުމަށްފަހުވެސް މައްސަލަތައް ބައްލަވަން އުޅުއްވި މަންޒަރެއް ނުފެނުނެވެ. އެބޭފުޅެއްގެ ފޮޓޯފުޅާ ހުސްގޮނޑި ބަހައްޓައިގެން، ވެރިކަމަށް އައީ ކުރީ ސަރުކާރުން އެމަނިކުފާނަށް ދިން އަނިޔާއަށް އިންސާފު ހޯދައިދެއްވާނެކަމުގެ ވެސް ވައުދާއެކުގައެވެ. ނަމަވެސް އެމަނިކުފާނަށް ސިޔާސީ ހުކުމް އިއްވެވި ޣާޒީގެ މައްސަލަ ވެސް މި ސަރުކާރަށް ނުބެލުނެވެ.

އޭގެއިތުރުން ކޮވިޑް 19 ގެ ހާލަތުގައި ވެންޓިލޭޓަރުތައް ވަގަށް ނެގި މައްސަލަ ވެސް ނުބެލިތާގައި، އިސްލާމް ދީނަށް ހަޖޫޖަހައި ކީރިތި ރަސޫލާއަށް ފުރައްސާރަކޮށް މޯލްޑިވިއަން ޑިމޮކްރެސީ ނެޓްވޯކް އިން ނެރުނު ރިޕޯޓް ލިޔުނު ފަރާތްތައް ހޯދައި ފިޔަވަޅު އަޅުއްވާނެކަމަށް ވެސް ވިދާޅުވިއިރު އެ ވާހަކަ މިހާރު އެެއްވެސް ޕޯޑިއަމެއްގައި ދައްކާނުލައެވެ.

ކުރީގެ ރައީސް އިބްރާހިމްގެ ސިއްރު ސިޓީފުޅަކުން މޮރީޝަސްއަށް ރާއްޖޭގެ ދެކުނުގެ ކަނޑުގެ ސަރަހައްދު ވިއްކާލި މައްސަލަ ވެސް ބައްލަވާނެކަމަށް އަދުގެ ރައީސް މުއިއްޒު ވިދާޅުވީ އަޑަށް ނިކަން ބާރުލައިފައެވެ. 14 ހަފްތާ ތެރޭ ފުއްދަވާނެކަމަށް ވިދާޅުވި ވައުދުތަކުގެ ތެރޭގައި އެކަން އޮތް އިރު އެކަމުގެ އެއްވެސް ތަފްސީލެއް ވެސް ހާމަނުކުރެއެވެ.

ރޯޑް ޑިވެލޮޕްމެން ކޯޕަރޭޝަން (އާރްޑީސީ) ގެ ތިޖޫރީ އެމްޑީޕީ ސަރުކާރުގައި ފަޅާލި ވާހަކަތައް އަޑަށް ބާރުލައިފަ ދެއްކި ނަމަވެސް މިއަދު އެ ތިޖޫރީ ވަގުން ވެސް ތިބީ މިނިވަންކަންމަތީ، އެމީހުންގެ މައްސަލައެއް ވެސް ބެލެނީކީ ނޫނެވެ.

ވެރިކަމަށް އައުމުގެ ކުރިން އަދި ވެރިކަމުގެ ހުވާ ކުރުމުގެ ކުރީން ދެއްކެވީ ހުސް މޮޅެތި ވާހަކަތަކެވެ. ރައްޔިތުންނަށް ދެއްކެވީ ހިޔާލީ ފޮލާއެވެ. ވީ އެއްކަމެއް ވެސް ހަރާމެވެ. ވެރިކަމުގެ ދަހިވެތިކަމުގައި ރައްޔިތުންނަށް ބޭވަފާތެރިވީއެވެ.

ދެން ވެސް ކޮރަޕްޝަން ނުހިންގަވާ ކޮރަޕްޝަންގެ މައްސަލަތައް ބައްލަވަން އުޅުއްވާށެވެ.