ރާއްޖެ އިސްލާމްވިތާ 898 ވަނަ އަހަރު ފުރުން ފާހަގަ ކުރަން ބޭއްވި ޖަލްސާގައި ވާހަކަ ދައްކަވަމުން ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވީ ދޮގާއި ދޮގު ހަބަރު ފެތުރުން އޮތީ ދިވެހި މުޖްތަމައުގައި މޫލާފައި ކަމަށެވެ. ފަތުރާ ދޮގު ހަބަރުތަކުގެ ސަބަބުން ދައުލަތަށް ވެސް ގެއްލުންވެފައިވާ ކަމަށް ރައީސް ވިދާޅުވުމުން އަޅުގަނޑުގެ ގާތައް އައީ ހިންޏެވެ. ވާނީވެސް އެހެެންތާއެވެ. ތެދު ދޮގޭ ވިދާޅުވެ ވާހަކަ ދައްކަވަން އަރައި ވަޑައިގެން ހުންނެވީ ތެދުހަދަން އެނގިވަޑައިނުގަންނަވާ ބޭފުޅެއްކަމުންނެވެ.

އެމަނިކުފާނު 27 މިނެޓްގެ ބޮޑު ތަގްރީރެއް ކުރެއްވިއިރު، ތަގްރީރުގައި ދެ ނޭވާ ދޭތެރެއިން ވިދާޅުވަމުން ގެންދެވީ "ދޮގު" ހެދުމުގެ ވާހަކައެވެ. މާތްކަލާކޯ، އެމަނިކުފާނު އެހެން މީހުން ދޮގު ހަދައިގެން އެހާ ކަންބޮޑުވެފައި ވާހަކަ ދެއްކެވި އިރު އެމަނިކުފާނު މިހާތަނަށް ހަދާފައިވާ ދޮގުތަކުގެ މަތިން ހަނދުމަފުޅުނެތުނީބާއެވެ. ދޮގު ހަދަން ވަކި ކަމެއް އެމަނިކުފާނުގެ ނޯންނައިރު މި ވިދާޅުވަނީ އެހެން މީހުން ހަދަނީ އަބަދުވެސް ދޮގުކަމަށެވެ.

ސަރުކާރު ޖަވާބުދާރީ ކުރުވަން މަސައްކަތްކުރާ ދެތިން ނޫހަކަށް ދިނީ ބަހުގެ ހަމަލާއެކެވެ. ނުސީދާކޮށް އިންޒާރެކޭ ބުންޏަސް ދޮގަކަށްވެ ނުދާނެއެވެ. ވިދާޅުވީ ދޮގު ޚަބަރުފެތުރުމުން ދައުލަތައް ގެއްލުންވާ ވާހަކައެވެ. ހަގީގަތުގައި އެ ވިދާޅުވީ، ސަރުކާރުން ކުރާ ނޭދެވޭ ނުރަނގަޅު ކަންކަން ނޫސްވެރިން ރައްޔިތުންނާ ހަމަޔަށް ގެނެސް ފަޅައިައރުވަމުން ގެންދާތީ އެކަމުގެ ސަބަބުން އެބޭފުޅުންނަށް ގެއްލުންވާ ވާހަކައެވެ.

އެގޮތުން މިސާލެއް ދައްކާ ކަމުގައިވާނަަމަ ރައްޔިތުންގެ މަޖިލީހުގެ ސަރުކާރު ތަމްސީލު ކުރާ 75 މެމްބަރުންނަށް ރައީސް މުއިއްޒުގެ ފަރާތްޕުޅުން ކޮންމެ މަހަކު ބައި ލައްކަ ރުފިޔާދޭކަމަށް ބުނެ ނޫސްތަކުން ޚަބަރު ޝާއިއުކުރުމުން ސަރުކާރުން އެކަން ދޮގުކުރިއެވެ. އެހެންކަމުން އޮންލައިން ނޫހެއްކަމަށްވާ "އަދަދު" ނޫހުން ވަނީ ފައިސާ ބެހިކަމުގެ ހެކިހުރި ވީޑިޔޯއެއް ތައްޔާރުކޮށްފައެވެ. އަދި ޑޮކިޔުމެންޓަރީއެއް ވެސް އާންމުކޮށްފައެވެ. އަދަދު ނޫހުން ތައްޔާރުކޮށްފައިވާ ވީޑިޔޯގައި ސާފުކޮށް މެމްބަރުން ކަޅު ދަބަސްތައް ހިފައިގެން އުޅުނު މަންޒަރު ފެނިގެންދިޔައެވެ. މަންޒަރު ލޯކުރިމަތީ އޮއްވާ އެކަން ވެސް ސަރުކާރުން ދޮގުކުރިއެވެ. އަދި އެ ނޫހަށް ގާނޫނީ ފިޔަވަޅު އަޅާނެކަމަށް ބުނެ އިންޒާރުވެސް ދިނެވެ.

ދޮގުހަދަނީ ރައީސް މުއިއްޒު އިސްވެ ހުންނަވާ ސަރުކާރުގެ ވެރިންނެވެ. ނަން ވަނީ އާންމު ރައްޔިތު މީހާއާއި ސަރުކާރު ޖަވާބުދާރީކުރުމަށް މަސައްކަތްކުރާ ނޫސްތަކުގެ ނޫސްވެރިންނެވެ. ރައީސް މުއިއްޒު ދޮގު ހެދުމުގެ ވާހަކަ ޕޯޑިއަމަކަށް އަރައިވަޑައިގެން ދައްކަވަން ލަދުގަންނަން ޖެހޭނެއެވެ. 2023 ވަނަ އަހަރުގެ ރިޔާސީ އިންތިޚާބް ކާމިޔާބު ކުރެއްވީވެސް އެތައް ދޮގެއް ހަދައިގެންނެވެ. ރައްޔިތުންނަށް އޮޅުވާލައިގެންނެވެ. ރައީސް މުއިއްޒު އަކީ އެ ވެރިއެއްގެ ހުސްގޮނޑިއާއި ފޮޓޯ ފުޅާ ބަހައްޓައިގެން ވެރިކަން ލިބުމުން އެ ވެރިޔާއަށް ވެސް ދޮގު ހަދާ ހިޔާނާތްތެރިވި ވެރިއެކެވެ.

ރައްޔިތުންނަށް ދޮގު ހެދީ މޫނުމައްޗައް ރުލެއްވެސް އަރުވާނުލައެވެ. ގައުމުގައި ގާއިމްވެފައި ތިބި އިންޑިޔާގެ ސިފައިން ބާލާނެކަމަށާ، ކުރީ ސަރުކާރުން އެ ގައުމާއެކު ހަދާފައިވާ ގޮތް ނޭނގޭ އެއްބަސްވުންތައް ހާމަކުރައްވާނެކަމަށް ވެސް ވިދާޅުވިއެވެ. ގެއްލުނު ކަނޑުގެ ސަރަހައްދު ހޯދައިދެއްވާނެކަމަށް ވެސް ވިދާޅުވިއިރު ވެރިކަމަށް 10 މަސްވީއެވެ. ގެއްލުނު ކަނޑުގެ ސަރަހައްދު ހޯދަން މަސައްކަތެއް ނުކޮށް ތިއްބާ އިނގިރޭސިވިލާތުން މޮރީޝަސްއަށް ކަނޑުގެ ސަރަހައްދު ދީ ނިންމާލީއެވެ. ކަންޖޫސީ ވަކިވަރަކަށް ނޫނެވެ. ކަމެއް ނުވާނެކަން އެނގިހުރެ ރައްޔިތުންގެ ވޯޓު ހޯދުމަށް ދޮގުތަކެއް ހެއްދެވީއެވެ. އެއް ދޮގު ފޮރުވުމަށް އެެއް ހާހަށް ވުރެ ގިނައިން ދޮގު ހަދާކަށް ރައީސް މުއިއްޒު ޖެހިލުމެއް ނުވާނެއެވެ.

ވެރިކަމަށް 10 މަސްވީއިރު ރައްޔިތުން ރައީސް މުއިއްޒަށް ކިޔަނީ "ޑރ ކައްޒާބު" އެވެ. ކައްޒާބަކީ ކޮބައިކަން އެންމެނަަށް ވެސް އެނގޭނެކަމީ ޝައްކެއް އޮތްކަމެއްނޫނެވެ. ކައްޒާބަކީ އަރަބި ބަހުން ދޮގުވެރިޔާއެވެ. މިހާއަވަހަށް ރައްޔިތުންގެ ނަފްރަތު މި އަމާޒުވީ ސަބަބެއް ވެސް ނެތި ނޫންކަން ޔަގީންތާއެވެ. އާދެ ހަގީގަތުގައި ވެސް އެމަނިކުފާނަށް ދޮގު ހެދުނީއެވެ. އެކަމަކު އެމަނިކުފާނު ދޮގެއް ނުހައްދަވަމޯ، އެހެންކަމުން އެމަނިކުފާނު ހައްދަވަނީ އިތުރުފުޅުތޯއެވެ.