މިއީ ފަހުގެ ތާރީޚެއްގައި ރާއްޖޭގެ ވެރިޔަކު، ކެމްޕޭން ވަޢުދަކާ މިހާފާޅުގައި ޚިލާފްވި ފުރަތަމަ ފަހަރު ކަމަށް ކުރީގެ ހޯމު މިނިސްޓަރު އުމަރު ނަސީރު ވިދާޅުވެއްޖެއެވެ.

އުމަރު މިފަދައިން ވިދާޅުވެފައިވަނީ ރައީސް ޑރ. މުހައްމަދު މުއިއްޒު މިހާރު އިންޑިއާއަށް ކުރައްވަމުން ގެންދަވާ ދަތުރުފުޅުގެ ތެރެއިން ނިންމަވަމުން ގެންދަވާ ބައެއް ނިންމުންތަކަށް އިޝާރާތްކުރައްވާ ފޭސްބުކްގައި ކުރެއްވި ޕޯސްޓެއްގައެވެ.

ރައީސް މުއިއްޒުގެ ދަތުރުފުޅުގައި މިހާތަނަށް ވަނީ، ގިނަ އެއްބަސްވުންތަކެއް ވަނީ ގާއިމު ކޮށްފައެވެ. އަދި އައްޑޫ ގައި އިންޑިއާގެ ކޮންސިއުލޭޓް އޮފީހެއް ގާއިމު ކުރުން ފަދަ ކަންކަމުގައި މަޝްވަރާ ވެސް ކޮށްފައިވެއެވެ.

މިކަންކަމަށް އިޝާރާތްކުރައްވާ އުމަރު ވިދާޅުވީ، އެމްޑީޕީ ގެ ވެރިކަމާ ޕީއެންސީގެ ވެރިކަމުގައި އެއްވެސް ތަފާތެއްނެތް ކަމަށެވެ. އެގޮތުން މި ސަރުކާރުވެސް ގަދަ ބަސް ބުނެފައި އެންމެ ފަހު ވަގުތު އިންޑިޔާގެ ގޮޑިކޮއްކޮ ސަރުކާރަކަށް ބަދަލުވެ، ބުނި ހުރިހާ ކަމަކަށް އެއްބަސްެއްޖެކަން އުމަރުގެ ޕޯސްޓުގައި ފާހަގަކުރައްވާފައިވެއެވެ.

މިއީ ފަހުގެ ތާރީހެއްގައި ރާއްޖޭގެ ވެރިއަކު ކެމްޕެއިން ވައުދަކާ މިހާ ފާޅުގައި ހިލާފުވި ފުރަތަމަ ފަހަރުކަން ފާހަގަކުރައްވާ އުމަރު ވިދާޅުވީ މި ސަރުކާރަށް ރާއްޖޭގައި ތިބި އިންޑިއާ އަސްކަރިއްޔާގެ މީހުން ފޮނުވާނުލެވުނުތާ ކުރީ ސަރުކާރުތަކުން އެއްބަސް ވެފައި ނެތް ކަންކަމަށް އެއްބަސްވެ އަމާން ވެސް ދީފައިވާ ކަމަށެވެ.

އުމަރު މިފަދައިން ވިދާޅުވެފައިވާއިރު، ރައީސް މުއިއްޒުއަކީ ވެރިކަމަށް ވަޑައިގަތުމަށް އިންޑިއާ ދެކޮޅަށް ވަރުގަދަ ކެމްޕެއިނެއް ޖައްސަވާ އަދި ވެރިކަމަށް ވަޑައިގަތުމަށް ފަހުވެސް އިންޑިއާ ދެކޮޅަށް ވަރުގަދަ ބަސްފުޅު ވިދާޅުވެ އިންޒާރުވެސް ދެއްވާފައެވެ. ނަމަވެސް ފަހުން އިންޑިއާއާ ދެކޮޅަށް ބަހެއް ބުނަން ނުކެރި ފެނިގެން ދިޔައީ ރައީސް މުއިއްޒު އިންޑިއާ ކުރިމަތީ ކުޑަ ކަކޫ ޖެއްސުވި މަންޒަރުކަމަށް ގިނަ ބަޔަކު ބުނަމުން ގެންދެއެވެ. އަދި އޭގެ ސަބަބުން ބައިނަލްއަގްވާމީ ދުނިޔޭގައި ދިވެހިންގެ ލަދު ގަންނުވާލައިފިކަމަށް ވެސް ގިނަ ބަޔަކު ގެންދަނީ ބުނަމުންނެވެ.