ވެރިއެއްގެ ކިބައިގައި ހުންނަޖެހޭ އެއްވެސް ސިފައެއް ރައީސް ޑރ. މުހައްމަދު މުއިއްޒުގެ ކިބައިގައި ނެތްކަމަށް ކުރީގެ ދާހިލީ ވަޒީރު އުމަރު ނަސީރު ވިދާޅުވެއްޖެ އެވެ.
އުމަރު މިފަދައިން ވިދާޅުވެފައި ވަނީ އޮންލައިން ނޫސް "އަދަދު" އަށް ދެއްވި ހާއްސަ އިންޓަވިއުއެއްގަ އެވެ.
އެގޮތުން އުމަރު ވިދާޅުވީ ރައީސް މުއިއްޒު އިންޑިއާއެކު ސޮއި ކުރެއްވި އެއްބަސްވުންތަކާއި ކުރެއްވި މަޝްވަރާތަކަކީ ކެމްޕޭނު ތެރޭގައި ދެއްކެވި ވާހަކައާ މުޅިން ހިލާފަށް ކުރެއްވި ކަންކަން ކަމަށާއި މި ނެންގެވި "ޔޫ ޓާން" އަކީ ގައުމަށް ވީ ހިޔާނާތެއް ކަމަށެވެ.
އޭގެއިތުރުން އުމަރު ވިދާޅުވީ ރައީސް މުއިއްޒު ނެންގެވީ މީގެ ކުރިން ރާއްޖޭގެ އެއްވެސް ވެރިއަކު ނުނަންގަވާ ވަރުގެ "ޔޫ ޓާން" އެއް ކަމަށެވެ.
އެއާއެކު މިހާރު ރައީސް މުއިއްޒު އެ ހުންނެވީ އިންޑިއާގެ "ގޮނޑި ކޮއްކޮ" އަކަށް ވެފައި ކަމަށް ވިދާޅުވެ އުމަރު ވަނީ ރައީސް މުއިއްޒަށް ފާޑުވިދާޅުވެފައެވެ.
މީގެ އިތުރުން މިފަދަ ޔޫޓާނެއް ނެންގެވީ ވެރިއެއްގެ ކިބައިގައި ހުންނަޖެހޭ ސިފަތަކުގެ ތެރެއިން އެއްވެސް ސިފައެއް ރައީސް މުއިއްޒުގެ ކިބައިގައި ނެތުން ކަމަށް އުމަރު ވިދާޅުވި އެވެ
