އިންޑިޔާ އައުޓް ގޮވި ސަރުކާރުން އިންޑިޔާގެ ފައިބުޑަށް ވެއްޓި ސަލާންޖެހުމުން 760 މިލިއަން ޑޮލަރުގެ އެހީއެއް ދީފައިވާނެކަމަށް އެ ގައުމުގެ ބޮޑު ވަޒީރު ނަރެންދްރަ މޯދީ އިއުލާންކޮށްފި އެވެ.

މޯދީ މިފަދައިން އިއުލާންކޮށްފައި ވަނީ ހޯމަ ދުވަހު ނިއު ދިއްލީގައި ރާއްޖޭގެ ރައީސް ޑރ. މުހައްމަދު މުއިއްޒު އާއި އިންޑިއާގެ ބޮޑު ވަޒީރު ނަރެންދްރަ މޯދީ ބައްދަލުކުރުމަށްފަހުއެވެ.

އެގޮތުން އޭނާ ވިދާޅުވީ އިންޑިއާއިން ފައިސާގެ ދަތިކަން ދިމާވެފައިވާ ދިވެހިރާއްޖެއަށް 100 މިލިއަން ޑޮލަރުގެ ޓްރެޝަރީ ބިލްސް ދެއްކުން ފަސްކޮށްދިނުމުގެ ތެރެއިން މާލީ އެހީތެރިކަން ފޯރުކޮށްދެވޭނެ ކަމަށެވެ.

އަދި އޭގެ އިތުރުން 400 މިލިއަން ޑޮލަރާއި 30 ބިލިއަން އިންޑިއަން ރުޕީސްގެ ކަރަންސީ ސްވޮޕް އެއްބަސްވުމެއްގައިވެސް ދެ ގައުމުން ވަނީ ސޮއިކޮށްފައެވެ.

މިކަމާ ބެހޭގޮތުން އިތުރު މައުލޫމާތު ދެއްވަމުން ހާރިޖީ ވަޒީރު ޑރ. އަބްދުالله ހަލީލް ވިދާޅުވީ ދެގައުމުގެ ފައިސާ ބޭނުންކޮށްގެން ވިޔަފާރީގެ ގުޅުންތައް ވަރުގަދަ ކުރުމާބެހޭ ގޮތުންވެސް މަޝްވަރާ ކުރެވުނު ކަމަށެވެ. އެ ގޮތުން އިންޑިއާ އާއެކު ފްރީ ޓްރޭޑް އެގްރީމެންޓް (އެފްޓީއޭ) އެއްގެ މަސައްކަތް ފެށުމަށް ވާހަކަ ދެކެވުނު ކަމަށް އޭނާ ވިދާޅުވިއެވެ.

މި އެހީތެރިކަން ރާއްޖޭގެ ރައްޔިތުންނަށާއި ރާއްޖޭގެ އިގްތިސާދަށާއި ދެގައުމުގެ ވިޔަފާރިވެރިންނަށް ވަރަށް ބޮޑަށް ފަސޭހަ ވުމަށް ލިބޭ ވަރަށް ބޮޑު ފުރުސަތަކަށް ވެގެން ދާނެ ކަމަށްވެސް ޚަލީލް ވިދާޅުވިއެވެ.

އިންޑިޔާ އަށް އެއްވެސް ކަމެއްގައި ބަރޯސާނުވާނެކަމަށް ވިދާޅުވި ނަމަވެސް މި ސަރުކާރުން އަންނަނީ އިންޑިޔާގެ ފައިބުޑަށް ވެއްޓި ސަލާންޖަހަމުންނެވެ.