ވަޒީރުންނަށް ރުހުން ދިނުމަށް އާދީއްތަ ދުވަހު ދައުރުން ބޭރުން ބޭއްވުނު ޖަލްސާގައި މަޖިލިސް ތަޅުމުގައި ހަމަނުޖެހުން ހިންގައި މާރާމާރީ ހިންގި މައްސަލަ ބަލަން ފުލުހުން ނިންމައިފިއެވެ.

ފުލުހުން ބޭއްވި ނޫސްވެރިންގެ ބައްދަލުވުމުގައި ވިދާޅުވީ މި މައްސަލަ މަޖިލީހުން ފުލުހަށް ހުށަހަޅާފައިވާ ކަމަށާއި މި މައްސަލަ ތަހުޤީގު ކުރަން ފަށާފައިވާ ކަމަށެވެ.

އޭގެއިތުރުން މި މާރާމާރީ ގައި އަނިޔާ ލިބުނު މެންބަރުންނަށްވެސް ފުލުހަށް މައްސަލަ ހުށަހެޅިދާނެ ކަމަށްވެސް ފުލުހުން ވަނީ ހާމަކޮށްފައެވެ.

އިތުރަށް ފުލުހުން ވިދާޅުވީ އަނިޔާވުމުގެ މައްސަލަތަކުގެ އިތުރުން ބައެއް މެންބަރުންނަށް އެކި ކަހަލަ އިންޒާރުތައް ލިބުމުންދާތީ އެ ބޭފުޅުންގެ ރައްކާތެރިކަމާއި މެދު ކަންބޮޑުވެ ފުލުހަށް ހުށަހެޅި މައްސަލަތައް ވެސް ހިމެނޭ ކަމަށެވެ.

މަޖިލީހުގެ ތަޅުމުގައި މާރާމާރީ ހިންގި މެންބަރުންގެ ތެރޭގައި ކެނދިކުޅުދޫ ދާއިރާގެ މެންބަރު އަހުމަދު އީސަ އަދި މެންބަރު ޝަހީމް ހިމެނެއެވެ.

ދެ މެންބަރުން ޗެމްބަރު ކައިރިއަށް ވެއްޓުމުގެ ތެރޭގައި ޝަހީމްގެ ބޮލަށް ވެސް ވަނީ އަނިޔާވެފައެވެ.

އެކަން ހުއްޓުވުމަށް މައިނޯރިޓީ ލީޑަރު މޫސާ ސިރާޖު މަސައްކަތް ކުރައްވާފައިވެއެވެ. މި މާރާމާރީގެ ވީޑީޔޯ މީސްމީޑިޔާގައި ދަނީ ދައުރުވަމުންނެވެ.