އިންޑިއާ އާއެކު އެއްބަސްވުންތައް ގާއިމުކުރުމަށް ފަހު މިހާރުގެ ވެރިން ތިބީ ޗުކީ ކިޔައިގެން ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.
ރައީސް ޔާމީން މިފަދައިން ވިދާޅުވެފައިވަނީ ޕީއެންއެފުން ބުރާސްފަތި ދުވަހުގެރޭ ބޭއްވި ޖަލްސާގައި ވާހަަކަފުޅު ދައްކަވަމުންނެވެ.
ރައީސް ޔާމީން ވިދާޅުވީ، ނިމިދިޔަ ސަރުކާރުން ގޮތް ނޭނގޭ އެއްބަސްވުންތައް އިންޑިއާއެކު ވެފައިވާ ކަމަށް އަޑުގަދަކޮށް އެ އެގްރިމަންޓުތައް ހާމަކުރުމަށް ގޮވާލި މީހުން މިއަދު ވެރިކަމުގައި ތިބެ އިންޑިއާއާ އެކު، ފާޅުގައި ރާއްޖޭގެ މިނިވަންކަމާ ސިޔާދަތު އަޅުވެތިކުރުމަށް ފަހު އެގްރިމަންޓުތައް އެކުލަވާލައިފި ކަމަށެވެ. އެގޮތުން އެމަނިކުފާނު ވަނީ އުތުރުތިލަފަޅުގެ އެއްބަސްވުންވެސް ކުރިން އޮތް ގޮތަށްވުރެ ވަރުގަދަކޮށް މި ސަރުކާރުން އިންޑިއާއެކު ގާއިމުކޮށްފިކަން ފާހަގަކުރައްވާފައެވެ.
ނަމަވެސް އޭގެ އެއްވެސް ތަފްސީލެއް ސަރުކާރުން ރައްޔިތުންނަށް ހާމަނުކުރާކަން ފާހަގަކުރައްވާ ރައީސް ޔާމީން ވިދާޅުވީ، މިއަދު ހުރިހާ ވެރިން ތިބީ ހަނުކަމަށެވެ.
އިންޑިއާ އާއެކު އެއްބަސްވުންތައް ގާއިމުކުރުމަށް ފަހު ވެރިން ތިބީ ޗުކީ ކިޔައިގެން. އެއްބަސްވުންތައް ފޮރުވައިގެން މި ސަރުކާރުން ވެސް ތިބީ. ކުރިން މިކަމާ އަޑުގަދަ ކުރި މީހުން އެކަމަކު މިތިބީ.
ރައީސް ޔާމީން
ރައީސް ޔާމީން އިތުރަށް ވިދާޅުވީ، އިންޑިއާ އައުޓު ގަރާރު ބާތިލްކުރަން ނުކެރުނު ބަޔަކަށް އެގްރިމަންޓުތައް ހާމަކުރަންވެސް ކެރިދާނެ ކަމަށް ގަބޫލުނުކުރައްވާ ކަމަށެވެ.
