"ޣައްދާރު" މި ލަފުޒަކީ ބައެއް ސިޔާސީ ލީޑަރުންނަށް ވަރަށް އުނދަގޫވާ ލަފުޒެކެވެ. ނަމަވެސް މިއަދު ބަޔަކު ކިތަންމެ ހިތް ނުރުހުނަސް މިވާހަކަ ދައްކަން އެބަ ޖެހެއެވެ. އެހެނީ މިއަދު ވެރިކަމުގައި ތިއްބެވީ ބޭފުޅުން ގައުމަށް ޣައްދާރުވެފައިކަމަށް ގިނަ ބަޔަކަސް ގަބޫލުވެސް ކުރެވޭތީއާ އެކުއެވެ.

2023 ގެ ރިޔާސީ އިންތިހާބާ ހަމައަށް ނަޒަރު ހިންގާލާއިރު އޭރު ދިޔައީ ސިޔާސީ ބޮޑު ތަޅާފޮޅުމެއްގެ ތެރޭގައެވެ. އެއްބަޔަކު އަނެއް ބަޔަކަށް އިލްޒާމުތައް އަޅުވާ އެކަންކަން ރަގަޅުކޮށް ގައުމު ސަލާމާތްކުރާނީ ތިމަންނާ މެންނޭ ބުނެ ކޮންމެ ބަޔަކުވެސް ދިޔައި އަޑު ގަދަކުރަމުންނެވެ.

އެގޮތުން އޭރުގެ އިދިކޮޅު ޕީޕިއެމް/ޕީއެންސީިން އެންމެ ގަދައަށް ދެއްކި އެއް ވާހަކައަކީ އިންޑިއާ ސިފައިން ތިބެގެން ގައުމުގެ އިސްތިގުލާލާ މިނިވަންކަން ގެއްލޭ ވާހަަކައާ ސިއްރު ސިޓީއަކުން ގައުމުގެ ކަނޑު ވިއްކާލި ވާހަކައާ ގައުމުގެ ދަރަނި އިތުރުވެ ގައުމު ސޮވޮރިން ޑިފޯލްޓަކަށް ދިޔަ ވާހަކައާ ގައުމުގައި އާމްދަނީ ވަންނާނެ ގޮތް ހުސްވެ ގައުމު ހަފުސްވެފައިވާ ވާހަކައާ އަދިވެސް މިފަދަ ކިތަންމެ ކިތަންމެ ވާހަަކައެވެ. އަދި އެންމެ ބޮޑު އެއް ވާހަަކައަކަށް ދެއްކީ ރައީސް އަބްދުﷲ ޔާމީނަށް އަނިޔާވެރިވަމުން ދިޔަ ވާހަކަ އެހެންނޫންތޯއެވެ.

އެހެންކަމުން މިކަންކަން ރަގަޅުކޮށް ގައުމު ހަމަ މަގަށް އެޅުވޭނީ ޕީޕީއެމް/ޕީއެންސީގެ ވެރިކަމެއް ރާއްޖޭގައި ގާއިމުވެގެން ކަމަށާ އެހެންކަމުން ދިވެހީންގެ ރާއްޖެ އަނބުރާ ދިވެހީންނަށް ހޯދުމަށް ޕީޕީއެމް/ޕީއެންސީ ކެންޑިޑޭޓަށް ވޯޓު ދޭން ޖެހޭ ކަމަށް ބުނަމުން ދިޔައެވެ.

އެ ވާހަކަތަކަށް އިޖާބަދީ ދިވެހީން ޑރ މުހައްމަދު މުއިއްޒަށް ވޯޓުދީ ގައުމުގެ ތަޚުތަށް ރެނދަލި ކުރީ ނުހަނު ފޮނި އުއްމީދާއެކުއެވެ. އިންޑިއާ ސިފައިން ގައުމުން ބޭރުކޮށް އިންޑިއާގެ އުނގަށް ވެއްޓިފައި އޮތް ގައުމުގެ މިނިވަންކަމާ އިސްތިގުލާލު އެ އުނގުން ނަގާ ދިވެހީންގެ މުށުތެރެއަށް ގެނައުމުގެ އުއްމީދާއެކުއެވެ. އަދި ނުހައްގުން ޖަލުގައި އަނިޔާ ލިބެމުންދިޔަ ދިވެހީންގެ ގައުމީ ބަޠަލު ރައީސް ޔާމީން މިނިވަންކޮށް އެ އަނިޔާވެރިކަމުން ސަލާމަތްވެސް ކުރުމަށެވެ.

ނަމަވެސް ކަންވެގެން ދިޔައި އެހެން ނޫންކަން މިއަދު ދިވެހި އެންމެހާ ލޮބުވެތި ރައްޔިތުންނަށް ވާނީ ހާމަވެފައެވެ. އިންޑިއާ އައުޓު ޓީ.ޝާރޓު ތުރުކުރައްވައިގެން ކުޅުއްވީ ޑްރާމާއެއް ކަމަށާ އެއީ އޭރުގެ ހާލަތަށް މަޖްބޫރުވެގެން ކުރެއްވި ކަމެއް ކަމަށް ވިދާޅުވެފައިވާއިރު، އެހެން އެކަން ކުރީ ރިޔާސީ އިންތިހާބަށް ރައްޔިތުން ބޮލަށް ޗިޕު ޖަހަން މަޖްބޫރުވެގެން ކަމަށްވެސް ރައީސް މުއިއްޒު ވިދާޅުވެފައިވެއެވެ.

ރައްޔިތުންގެ އިހްސާސުތަކާ ކުޅެލީ ދޮން ކަޅުވެސް އަންގާ ނުލައްވާކަން އެމަނިކުފާނު ވަނީ އިއުތިރާފުވެފައެވެ. ވެރިކަމުގެ ކުރީގެ ކޮޅު އިންޑިއާއަށް ބަހުގެ ހަމަލާތަކެއް ފޮނުވި ނަމަވެސް އެއީ ވެސް ޖަމަލު ފޮޑިއަކަށް ވެގެން ދިޔައީ ދިވެހީން ބަލަ ބަލާ ތިއްބައެވެ.

ވެރިކަމަށް އައިސް ފުރަތަމަ 100 ދުވަހުގެ ތެރޭގައި ހާމަކުރަން ވައުދުވީ އެއްބަސްވުންތައް އެ ހުރި ގޮތަށް ބެހެއްޓުމަށްފަހު މިހާރު އަލުން އެގްރިމަންޓްތަކެއް އިންޑިއާ އާއެކު އެކުލަވާލާ ސޮއިކޮށް ނިންމާލީ އެއްބަސްވުންތައް ހާމަކުރަން ވީ ވައުދާ ޚިލާފުވަމުންނެވެ. އިންޑިއާގެ އަސްކަރީ އުޅަނދުތައް މި ގައުމަށް ސިފައިންނާ އެކު ގެނައުމަށް އެއްބަސްވީވެސް ހަމަ އެއްކަލަ އިންޑިއާ އައުޓު ގޮވި ރައީސެވެ.

އިންޑިއާގެ ދަރަނީގެ ދަންތުރައިން ގައުމު ސަލާމަތްކުރާނެ ވައުދާވެސް ޚިލާފުވެ މިހާރު މިވަނީ ދަރަނި ދަންތުރައިގެ ވާފަށަށް އިހިނަށް ވުރެ ބާރަށް ދަމާލާފައެވެ. ދިވެހީންނަށް ކިރިޔާ ނޭވާ ލެވި ނުލެވޭ ހިސާބުގައެވެ. ބައެއް ފަހަރު ނޭވާ ތާށީވެ ކޮށިވެސް އަރައެވެ.

ދެން އޮތީ ވިއްކާލި ކަނޑުގެ ވާހަކައެވެ. ދިވެހިންގެ ކަނޑު ވަގު ސިޓީއަކުން ވިއްކާލައި ޤައުމަށް ޣައްދާރު ވުމުގެ ކުށުގައި ރައީސް ސޯލިހު ޖަލުގައި އޮންނަތަން ފެނޭ ކަމަށް ވިދާޅުވި ބޭފުޅުން މިއަދު މަޖިލީހުގެ އެންމެ އަޑުގަދަ މައިކުތައް ކައިރީ ތިއްބެވިއިރު އެ ސިޓީގެ އަޑެއް ބަޑެއް ނެތެވެ. ކުޑަ މިނުން އެ ސިޓީވެސް ހާމަވެސް ނުކުރެވުނެވެ.

އިންޑިއާ ސިފައިން ބޭލުމުގެ ބަދަލުގައި އެމީހުންގެ ޔުނިފޯމު ގަންޖުފަރާހަށް ބަދަލުކުރުމަށް ފަހު އަލުން އަނެއްކާވެސް ޔުނިފޯމު އެޅި މީހުން އެތެރެ ކުރަނީއެވެ. އަސްކަރީ އުޅަނދުތައް ބޭނުން ނުކުރާނެ ކަމަށް ބުނެ ޑްރާމާ ކުޅުމަށް ފަހު އިތުރު އަސްކަރީ އުޅަނދުތައް އިންޑިއާއިން ގެންނަނީއެވެ. ކަނޑު ވިއްކާލި ސިޓީއާ އިންޑިއާއާއެކު ކުރީ ސަރުކާރުން ވި ކަމަށް އޭރު މިއަދުގެ ވެރިން ވިދާޅުވި އެއްބަސްވުންތައް ހާމަނުކޮށް އިތުރު އެއްބަސްވުންތައް އެކުލަވާލާ ނިންމައިފިއެވެ.

މިވާހަކަަތައް ދެއްކުމުން ވަނީ ފިތުނަ އުފައްދަނީ ކަމަށެވެ. ހަގީގަތް ހާމަކުރުމުން ހަޖަމްނުކުރެވި ފިތުނައޭ ބުނުމަކުން ނުފުދޭނެއެވެ.

މިހާރު ގައުމުގެ ކަންކަން ގޮސްފައިވާ ހިސާބަށް ބަލާއިރު ދޭހަ ވަނީ ދެ ގޮތެކެވެ. އެއް ގޮތަކީ ރައީސް މުއިއްޒު، ވެރިކަމުގެ ދަހިވެތިކަމުގައި ކުރިން ރައްޔިތުންނަށް ދޮގު ހެދީއެވެ. އަނެއް ގޮތަކީ ރައީސް މުއިއްޒު، ވެރިކަމުގެ ދަހިވެތިކަމުގައި ފަހުން ރައްޔިތުންނަށާ ގައުމަށް ޣައްދާރުވީއެވެ.

އިންޑިއާ އައުޓު ނުކުރެވި އިންޑިއާގެ ގޮނޑިކޮއްކޮއަަކަށްވެ ނިމިއްޖެއެވެ. ބާރަށު ދާއިރާގެ މައިކުން މިއިން ވާހަކައެއް ދައްކާލަން ކެރޭނެ ބާއެވެ؟