ސަރުކާރަށް އަހަރެއްވާން ކައިރިވެފައިވާއިރު އަދިވެސް ރައީސް ޑޜ މުހައްމަދު މުއިއްޒުގެ އިގްތިޞާދީ ސިޔާސަތު ރައްޔިތުންނަށް ސާފުނުވާކަމަށް ޕީއެންއެފްގެ ސެކެޓްރީ ޖެނެރަލް މުހައްމަދު މަލީހް ޖަމާލް ވިދާޅުވެއްޖެ އެވެ.

މަލީހް މިފަދައިން ވިދާޅުވެފައި ވަނީ އެކްސްގައި ކުރެއްވި ޕޯސްޓެއްގައެވެ.

ރިޔާސީ އިންތިޚާބްގެ ކެމްޕެއިން ދުވަސްވަރު މި ސަރުކާރުން ދެއްކެވި ވާހަކަތަކުގެ ތެރޭގައި ތަކެތީގެ އަގު ކުޑަކުރުން ހިމެނެއެވެ. އެ ވާހަކަތަކަށް އިޝާރާތް ކުރައްވަމުން މަލީހް ޕޯސްޓްގައި ވިދާޅުވީ މި ސަރުކާރު އައިފަހުން އިންފްލޭޝަން ކޮންޓްރޯލް ކުރުމަށް ކުރެވުނު ކަމެއް ނެތްކަމަށެވެ.

ވެރިކަމަށް އައިފަހުން "ޕޭޕަލް" ތައާރަފްކުރައްވާނެ ކަމުގެ ވާހަކަތަކެއް އިކޮނޮމިކް މިނިސްޓާރ މުހައްމަދު ސައީދު އަދި ރައީސް މުއިއްޒު ވެސް ދެއްކެވި ނަމަވެސް ވެރިކަމަށް އަހަރެއްވާން ކައިރިވިއިރު އެކަން ކޮށްފައިނުވާތީ މަލީހް ވަނީ ޕޯސްޓްގައި ވަރަށް ބޮޑަށް ފާޑުވިދާޅުވެފައެވެ.

ރައްޔިތުންނަށް ވައުދުވި އެއްވެސް ކަމެއް ސަރުކާރުން ކޮށްފައިނުވާތީ ގިނަ ބަޔަކު އަންނަނީ ސަރުކާރަށް ފާޑުކިޔަމުންނެވެ. އަދި ދެވަަނަ ދައުރެއް ދޭން ނުޖެހޭކަމަށް ވެސް ބުނަމުންނެވެ.