ޑޯނިއާ އަސްކަރީ މަތިންދާބޯޓު ދުއްވަން ތަމުރީނުކުރި ދިވެހި ސިފައިން އެ އުޅަނދު ނުދުއްވާ ސަބަބު ހާމަކޮށްފި ނަމަ ގައުމީ ސަލާމަތަށް ނުރައްކާވެދާނެ ކަމަށް ބުނެ އެ މައުލޫމާތު ސިއްރު ކުރަން އެމްއެންޑީއެފް އިން ހައި ކޯޓަށް ހިނގައްޖެ އެވެ.
މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން އެ މައުލޫމާތު ހޯދުމަށް ޑިފެންސް މިނިސްޓްރީގައި އެދުނީ އޮންލައިން ނޫހެއްކަމަށްވާ "މިހާރު" ނޫހުގެ ފަރާތުންނެވެ.
އެހެންނަމަވެސް ދިފާއީ ވުޒާރާއިން ވަނީ މި މައުލޫމާތު ހާމަކޮށްފި ނަމަ ގައުމީ ސަލާމަތަށް ނުރައްކާވެދާނެ ކަމަށް ބުނެ އެ މައުލޫމާތު ސިއްރުކޮށްފައެވެ.
އެގޮތުން މައުލޫމާތު ސިއްރުކުރުމުން އާރުޓީއައި ހުށަހެޅި ފަރާތުން މި މައްސަލަ އެންމެ ފުރަތަމަ ހުށަހެޅީ އިންފޮމޭޝަން ކޮމިޝަނަރުގެ އޮފީސް (އައިކޮމް) އަށެވެ. މި މައްސަލާގައި ހަތަރު އަޑުއެހުމެއް ބޭއްވުމަށްފަހު ސިއްރުކުރި މައުލޫމާތު ހާމަކުރުމަށް އައިކޮމް އިން ޑިފެންސަށް އެންގީ ސެޕްޓެމްބަރު 9 ވަނަ ދުވަހުއެވެ. އެ މައުލޫމާތު ދިނުމަށް އައިކޮމް އިން ދިނީ ރަސްމީ ފަސް ދުވަހުގެ މުހުލަތެއްކަން ފާހަގަކޮށްލެވެއެވެ.
އެހެންނަމަވެސް ދިފާއީ ވުޒާރާއިން ވަނީ މައުލޫމާތު ހާމަކުރުމުގެ ބަދަލުގައި އައިކޮމްގެ ނިންމުން ހައި ކޯޓުގައި އިސްތިއުނާފުކޮށްފަ އެވެ. އެ ކޯޓުގައި ވެބްސައިޓުން އެނގޭ ގޮތުގައި މި މައްސަލަ ކޯޓަށް ހުށަހެޅީ އޮކްޓޯބަރު 8 ވަނަ ދުވަހު ގައެވެ.
ރާއްޖޭގައި ތިބި އިންޑިއާ ސިފައިން ވަނީ ޑޯނިޔާ ދުއްވުމަށް އެމްއެންޑީއެފްގެ ޖުމްލަ ހަ އޮފިސަރަކު ތަމްރީނުކޮށްފަ އެވެ. އެ ހުރިހާ އޮފިސަރުން ވެސް ތަމްރީނުވީ 2021 ގެ ފަހުންނެވެ. އެހެންނަމަވެސް ދިވެހި ސިފައިންގެ ބަދަލުގައި އިންޑިޔާގެ އަސްކަރިއްޔާގެ ބަޔަކު އެ އުޅަނދުތައް ދުއްވަމުން އަންނާތީ ގިނަ ބަޔަކު އަަންނަނީ ސަރުކާރަށް ފާޑުކިޔުން އަމާޒުކުރަމުންނެވެ.
