އެއްވެސް ބާވަތެއްގެ ޓެކްސް ރޭޓަށް އެއްވެސް ބަދަލެއް ނުގެންނަވާނެ ކަމުގެ ވައުދު ވެ ވަޑައިގެން، އެ ވައުދާއި ޚިލާފަށް މި އަހަރުގެ ޑިސެމްބަރު މަހުން ފެށިގެން ޓެކްސްތައް ބޮޑުކުރުމަށް ސަރުކާރުން ނިންމައިފިއެވެ.

މިގޮތުން، ޓެކްސްތައް ބޮޑުކުރުމުން 2.7 ބިލިއަން ރުފިޔާގެ އާމްދަނީއެއް ދައުލަތަށް އިތުރަށް ލިބޭނެ ކަމަށް ފިނޭންސް މިނިސްޓްރީން ވަނީ ބުނެފައެވެ.

މިގޮތުން، ޕީއެންސީގެ ގެމަނަފުށި ދާއިރާގެ މެންބަރު އަސަދުﷲ ޝިހާބް ރައްޔިތުންގެ މަޖިލީހަށް މިއަދު ވަނީ އެއާޕޯޓް ޑެވެލޮޕްމަންޓް ފީއާއި ޑިޕާޗާ ޓެކްސް، ގްރީން ޓެކްސް އަދި ޓީޖީއެސްޓީ ބޮޑުކުރަން ހުށަހަޅާފަ އެވެ.

ސަރުކާރުގެ ޚަރަދު ކުޑަ ކުރުމުގެ ސިޔާސަތުގެ ދަށުން ރައްޔިތުންނަށް ދަތިވާނެ ފަދަ އުސޫލުތައް ކަނޑަނާޅާނެ ކަމަށް ރައީސް ޑރ މުއިއްޒު ވިދާޅުވި ނަމަވެސް ޑިސެމްބަރު މަހުން ފެށިގެން ގެންނަ ބަދަލުގެ ސަބަބުން ރާއްޖޭފެ އެއާޕޯޓަކުން ބޭރުގެ ގައުމަކަށް ފުރާ ކޮންމެ މީހެއްގެ އަތުން ނަގަމުން އަންނަ އެއާޕޯޓް ޑެވަލޮޕްމަންޓް ފީ އާއި ޑިޕާޗާ ޓެކުހަށް ބޮޑެތި ބަދަލުތައް އަންނާނެއެވެ.

މީގެ އިތުރުން 100 ޕަސަންޓަށް ބޮޑުކުރުމަށް ނިންމާފައިވާ ގްރީން ޓެކްސްގެ ސަބަބުން 964 މިލިއަން ރުފިޔާގެ އާމްދަނީއެއް ލިބޭނެކަމަށް ލަފާކުރެވޭކަމަށްވެސް ފިނޭންސް މިނިސްޓްރީން ބުނެ އެވެ. އަދި ޓީޖީއެސްޓީ އިން ނަގާ އިތުރު އެއް ޕަސަންޓުގެ ސަބަބުން 202 މިލިއަން ރުފިޔާ އާމްދަނީއަށް އިތުރުވާނެ ކަމަށްވެސް ފިނޭންސް މިނިސްޓްރީން ބުނެ އެވެ.

ގައުމުގެ ޚަރަދުތައް ބޮއްސުންލާފައިވާ މި ސަރުކާރުގައި މާލިއްޔަތާއި މެހޭ ވުޒާރާއަށް އާ ވަޒީރަކު އައްޔަނުކުރުމުންވެސް ޚަރަދުތައް މެނޭޖްކުރަން ނޭގޭ ކަން މިކަމުން ހާމަވެއެވެ.

އަދި ސަރުކާރު ހިންގަމުންދަނީ ރައްޔިތުންގެ ލާރިން ކަމާއި، އާމްދަނީ އިތުރުކުރާނެ އެއްވެސް ސިޔާސަތެއް މި ވެރިކަމުން ނުގެންގުޅޭކަން ހާމަވެގެންދެއެވެ.