އޮގަސްޓު މަހުގެ 14 ވަނަ ދުވަހު މާފަންނު ހަސޯވާ ގޭގެ ނުވަ ވަނަ ފަންގިފިލާއިން 25 އަހަރުގެ، ގއ. މާމެންދޫ، ބީޗްވިލާ، ވިފާގް އިބްރާހިމް އަދުނާނު ފުންމާލައިގެން ނިޔާވި ހާދިސާގެ ފަހަތުގައިވާ ކަންތައްތަކެއް ދިވެހި ފުލުހުންގެ ހިދުމަތުން ގެންދަނީ ފޮރުވަމުންކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެެއްޖެ އެވެ.

ވިފާގްގެ މަރާ ގުޅުންހުރި ކަންތައްތަކެއް ހާމަވާ ޑޮކިޔުމެންޓަރީއެއް "ޗެނަލް 13" ގެ ފަރާތުން ހާމަކުރިއިރު ދޮންބައްޕަގެ ޖިންސީ ޝިކާރައަކަށް ވިފާގް ވެފައިވާ ވާހަކަ ވެސްވެއެވެ. އެ ވާހަކަތަކަކީ ދޮގެއްކަމަށް ދެއްކުމަށް އާދިއްތަ ދުވަހު ފުލުހުންގެ ހިދުމަތުން ބޭއްވި ނޫސްވެރިންގެ ބައްދަލުވުމުގައި ފުލުހުން ވިދާޅުވީ ވިފާގް އަށް އެއްވެސް ފަރާތަކުން ޖިންސީ ގޯނާ އެއް ނުކުރާކަން ކަށަވަރުކުރެވިފައިވާ ކަމަށާއި، އެ މަރުގައި ޝައްކު އުފެދޭ ކަމެއް ނެތްކަމަށެވެ.

ފުލުހުން ވިފާގްގެ މަރާ ގުޅިގެން އެގޮތައް ވާހަކަދެއްކެވުމުން ހޯމަ ދުވަހުގެ ރޭ ފްރޮންްޓް އޮފީހުގައި ކުރިޔަށްދިޔަ ޖަލްސާގައި ރައީސް ޔާމީން ވިދާޅުވީ ޗެނަލް 13 އިން ވިފާގްގެ މަރާއި ގުޅިގެން ތައްޔަރުކޮށްފައިވާ ޑޮކިޔުމެންޓަރީއަކީ ވަރަށް ވަރުގަދަ އެއްޗެއްކަމަށާއި އޭގައި ވިފާގް ނަފްސާނީ ބައްޔަށް ފަރުވާކުރަމުންދިޔަ ވާހަކަ އޮތް އިރު އެ ވާހަކައިގެ އެއްވެސް ތަހުގީގެއް ފުލުހުން ނުކޮށް މުޅި ޑޮކިޔުމެންޓަރީ އިން ވެސް ފާހަގަކުރީ ޖިންސީ ޝިކާރައަކަށް ވިފާގުވެފައިވާ ވާހަަކަ ކަމަށް ވިދާޅުވެ ރައީސް ޔާމީން ވަނީ ފުލުހުންގެ ހިދުމަތައް ވަރަށް ބޮޑަަށް ފާޑުވިދާޅުވެފައެވެ.

ރައީސް ޔާމީން އިތުރަށް ވިދާޅުވީ ޖިންސީ ގޯނާ ކުރުމާއި ޖިންސީ ފުރައްސާރަކުރިކަމަށް ރިޕޯޓްގައި އޮތުމުން ފުލުހުން މިހާރު އެ މަސައްކަތް ކުރަނީ އެކަން ކުރިކަމަށް ޗެނަލް 13 ގެ ޑޮކިޔުމަންޓަރީގައިވާ އޭނާގެ ދޮން ބައްޕަ، ދިއްގަރު ދާއިރާގެ މެމްބަރު އަދި ރައްޔިތުންގެ މަޖިލީހުގެ ނައިބު ރައީސް ނާޒިމް ސަލާމަތްކުރުމަށްޓަކައި އެ މައްސަލަ އޮއްބާލުމަށެވެ.

ވިފާގްގެ މަރުގެ ތަހުގީގު ފުރިހަމަޔަށްކޮށް އެކަމުގެ ފަހަތުގައި ތިބި ފަރާތްތަކަށް ހައްގު އަދަބު ދިނުމަށް ރައީސް ޔާމީން ވަނީ ފުލުހުންނަށް ގޮވާލާފައެވެ.