ސިއްހީ ދާއިރާގައި މަސައްކަތް ކުރާ މާބަނޑު އަންހެނުންނާއި ޅަދަރިމައިންނަށް ފްލެކްސިބަލް ޑިއުޓީ ހަމަޖައްސައިދިނުން ހުއްޓާލުމަށް މިނިސްޓްރީ އޮފް ހެލްތް އިން ނިންމަވައިފިއެވެ.

މިގޮތުން، މިނިސްޓްރީ އޮފް ހެލްތް އަދި އިންދިރާ ގާންދީ މެމޯރިއަލް ހޮސްޕިޓަލްގައި މަސައްކަތް ކުރަމުން އަންނަ އަންހެން މުވައްޒަފުންނަށް ސިވިލް ސަރވިސް އިން ދެމުން އަންނަ "ފްލެކްސިބަލް ޑިއުޓީ" ހުއްޓާލުމަކީ ކަންބޮޑުވާ ކަމެއްގެ ގޮތުގައި ފާހަގަކޮށްމޯލްޑިވްސް ހެލްތް ޕްރޮފެޝަނަލް ޔޫނިއަން އިން ވަނީ ނޫސް ބަޔާނެއް ނެެފައެވެ.

ސިއްހީ ދާއިރާ އަކީ އަންހެނުންގެ ނިސްބަތް ބޮޑު ދާއިރާއަކަށް ވީ ހިނދު އަންހެން މަސައްކަތްތެރީންނަށް ދެމުން އައިސްފައިވާ މިފަދަ ލުއިތައް ކަނޑާލުމަކީ އެމީހުންނަށާއި އެމީހުން ބަލަމުން އަންނަ ތުއްތު ކުދީންނަށް އެތަކެއް ހައްގުތަކެއް ގެއްލިގެންދާނެ ކަމެއް ކަމުގައި މި ނޫސް ބަޔާނުގައި ބުނެފައިވެއެވެ.

މީގެ އިތުުރުން، ރައްކާތެރި ސިއްހީ ޚިދުމަތް ފޯރުކޮށްދިނުމަށްޓަކައި ބައިނަލް އަގްވާމީ މިންގަނޑުތަކާއި އެއްގޮތަވާ ގޮތުގެ މަތިން ޕޭޝަންޓް-ޓު-ސްޓާާފްރޭޝިއޯއަށް ރާއްޖޭގެ ސިއްހީ ދާއިރާގައި ޚިދުމަތްތެރީން ހަމަކުރެވިފައިނުވުމުގެ ސަބަބުން ކަނޑައެޅިފައިވާ ވަގުތަށްވުރެ އިތުރަށްވެސް ދަނީ މަސައްކަތް ކުރަމުންނެވެ.

ސިއްހީ ޚިދުމަތްތެރީން ލައްވާ އިތުރަށް މަސައްކަތް ކުރެވޭނީ އަސާސީ މުސާރައިގެ 10 އިންސައްތަ އަށްވުރެ އިތުރު ނުވާ ގޮތަށް ކަމުގައި މޭ 2023 ގައި ތަންފީޒު ކުރަން ފަށާފައިވާ ސިއްހީ ދާއިރާގެ އައު ޕޭ ފްރޭމް ގައި ބަޔާންކޮށްފައިވީ ނަމަވެސް ހޮސްޕިޓަލްތަކުން އަންނަނީ އެއަށްވުރެ އިތުރަށް މަސައްކަތް ކުރުމަށް މުވައްޒަފުންނަށް ބާރު އަޅަމުންނެވެ.

ސަރުކާރުން މިފަދަ ނިންމެވުމެއް ނިންމެވުމަކީ ސިއްހީ ދާއިރާގެ އިތުރުން، އެހެނިހެން ވަޒީފާގެ މާހައުލުގައި އަންހެނުން ކުރިއަށް ދިޔުމަށް އެޅިގެންދާ ވަރަށް ބޮޑު ހުރަހެކެވެ.

މި މައްސަލައާއި ގުޅިގެން މި ދާއިރާގައި މަސައްކަތްކުރާ ފަރާތްތަކުންނާއި އާންމުން އަންނަނީ ސަރުކާރަށް ވަރަށް ބޮޑަށް ނުރުހުން ފާޅުކުރަމުންނެވެ.