އުނބަށް ޖަހާ ޖަހާ މި ސަރުކާރާ މެދު ދިވެހި ރައްޔިތުންގެ އިތުބާރު ގެއްލިފައިވާ ކަމަށް ގަލޮޅު ދެކުނު ދާއިރާގެ މެމްބަރުނ މީކާއިލް އަހުމަދު ނަސީމު ވިދާޅުވެއްޖެއެވެ.

މީކާއިލް މިފަދައިން ވިދާޅުވީ މިއަދު އޮތް ރައްޔިތުންގެ މަޖިލީހުގެ މި ދައުރުގެ ދެ ވަނަ ޖަލްސާގައި ޓޫރިސްޓުން އަތުން ނަގާ ގްރީން ޓެކްސް ދެ ގުނަކޮށް، ފަތުރުވެރިކަމުގެ މުދަލާއި ޚިދުމަތުން ނަގާ، ޓީޖީއެސްޓީއާއި އެއާޕޯޓް ޓެކްސް ބޮޑުކުރަން ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ބިލަށް ބަހުސްކުރައްވަމުންނެވެ.

މީކާއިލް ވިދާޅުވީ، ރުކާރުން ނިންމާ ނިންމުންތަކަކީ ހަރުދަނާ ގޮތެއްގައި ނިންމާފައިވާ ނިންމުންތަކެއް ނޫން ކަމަށެވެ. އެގޮތުން ހުށަހަޅާ އިސްލާހުތަކަކީ ވެސް އެއްވެސް ޕްލޭނެއް ނެތި ހުށަހަޅާފައިވާ އިސްލާޙުތަކެއް ކަމަށް މީކާއިލް ވިދާޅުވިއެވެ.

މީކާއީލް ވިދާޅުވީ، މި ހަފުތާގައި ޓީޖީއެސްޓީ ބޮޑުކުރުމަށް ހުށަހަޅައިފައި ވަނިކޮށް، ގެސްޓު ހައުސްތަކުގެ އޯނަރުންނާއި ކަމާ ގުޅުން ހުރި އެހެނިހެން ފަރާތްތަކުން ރައީސުލްޖުމްހޫރިއްޔާގެ އަރިހަށް ގޮސް އެކަމާ ގުޅޭ ގޮތުން ކަންބޮޑުވުން ފާޅުކުރުމުން ނިންމުން ބަދަލު ކުރައްވަފާނެ ކަމަށެވެ.

މީގެ އިތުރުން އޭނާ ވަނީ ސަހްޔޫނީންގެ ޕާސްޕޯޓު މަނާނުކޮށް ކޮމިޓީ މަރުހަލާގައި ބިލު ތާށިކޮށްފައި އޮތް އޮތުމާ މެދު ނުރުހުން ފާޅުކޮށްފައެވެ. އެގޮތުން މީކާއިލް ވިދާޅުވީ، ސަރުކާރަށް ނިސްބަތްވާ މެންބަރުން އެއީ ވީހާވެސް އަވަހަށް ކުރަންޖެހޭ ކަމެއްކަމަށް ވިދާޅުވެ ރަނގަޅަށް ބަހުސް ވެސް ކުރުމެއްނެތި، ކޮމިޓީއަށް އެ މައްސަލަ ގެންގޮސް މިއަދު އެ މައްސަލަ ކުރިއަށް ނުގޮސް އޮތް ފާހަގަކުރެވޭ ކަމަށެވެ. އަދި މަޖިލީހުގެ ރައީސްއަށް އެކަމާ ގުޅިގެން ސިޓީއެއް ފޮނުވުމުން އެއަށް ވެސް ޖަވާބު ނުލިބޭކަމަށް މީކާއިލް ވިދާޅުވިއެވެ.

މީކާއިލް ވިދާޅުވީ އެގޮތަށް މި ސަރުކާރުން އެތައް ނިންމުމެއް ބަދަލުކޮށްފި ކަމަށެވެ.

އެގޮތުން ފާހަގަކުރެއްވީ ބޭންކް އޮފް މޯލްޑިވްސް (ބީއެމްއެލް)އިން ޑޮލަރު ލިމިޓް އެއްކޮށް ކަނޑާލުމަށްފަހު، ހަމަ އެ ދުވަހު އެ ނިންމުން އަނބުރާ ގެންދިޔަ ގެންދިޔުމެވެ. އެއީ ސަރުކާރުން އެންގި އެންގުމާ ޚިލާފަށް ބޭންކުން ނިންމު ނިންމުމެއް ކަމަށް ފަހުން ވިދާޅުވެފައިވާކަން މީކާއީލް ފާހަގަކުރެއްވިއެވެ.

ހަމައެގޮތަށް ރާއްޖޭގެ ޚާރިޖީ ސިޔާސަތު ވެސް އެފަދައިން ބަދަލުވަމުންދާކަމަށް މީކާއިލް ވިދާޅުވިއެވެ. އެގޮތުން "އިންޑިއާ އައުޓް" އަށް ގޮވާލަމުން ދިޔަ ބަޔަކު މިހާއި "އިންޑިއާ އިން" ކޮށްފައިވާކަމަށް މީކާއިލް ވިދާޅުވެ ވަރަށް ބޮޑަށް ފާޑުވިދާޅުވިއެވެ.