ސަރުކާރަކުން ކުރާ ރަގަޅު ކަންކަމަކީ އެކަމެއް ފާހަގަކުރަން ޖެހޭ ކަމެކެވެ. ހަމަ އެއާ އެކު ނުކޮށް ދޫކޮށްލާ ނުވަތަ ލަސްކުރާ ކަންކަމުގެ ވާހަކަވެސް ދެއްކުމަކީ ކުރަން ޖެހޭ ކަމެކެވެ. އާދެ މި ރިޕޯޓުގައި ބަލާލާނީ އެފަދަ ދެ ކަމަކަށެވެ.

އެގޮތުން އިއްޔެ މުޅި ގައުމު ގުގުމާލ ވޭޕު މަނާކުރަން ރައީސް މުހައްމަދު މުއިއްޒު ނިންމެވުމާ ގުޅިގެން މަރުހަބާ އާ ޝުކުރުގެ ޖިޒީތަކުންނެވެ. އެއީ ކޮންމެހެން ވެސް ކުރަން ވެއްޖެ ކަމެއް ކަމަށާ އެކަން މަނާނުކޮށް މިހާރު މާ ލަސްވެއްޖެ ކަމަށް ބުނެ ގިނަ ބަޔަކު ޝުއޫރު ފާޅުކުރިއެވެ.

ތެދެކެވެ. އެއީ ކުރަން މުހިއްމު އަދި ރަގަޅު ކަމެކެވެ. ބެލެނިވެރިއެއްގެ ހައިސިއްޔަތުން ބުނާ ނަމަ ޖީލެއް ހަލާކުގެ ތެރެއަށް ވެއްޓިގެން ނުދިއުމަށް އެޅުއްވި މުހިއްމު ފިޔަވަޅެކެވެ. ނަމަވެސް މިއާއެކު ދެން ހިތުގައި އުފެދުނު ސުވާލަކީ މިއީ ކިހާ ދުވަހެއްގެ ކަމެއް ބާވައެވެ. މިހެން ހިތަށް އަރަން މިޖެހުނީ ސަރުކާރުގެ ގިނަ ނިންމުންތަކެއް މި ފަހަކަށް އައިސް އުނބަށް ޖަހަމުންދާ މަންޒަރު ފެންނާތީއެވެ. މިކަމުގައި ސަރުކާރުގެ ނިޔަތް އޮތް ގޮތާ މެދު ސުވާލު އުފެދެނީ މިހެންވެއެވެ. އެހެނީ ވެރިކަމަށް އައުމަށް ގެންގުޅުއްވި އެންމެ މުހިއްމު އަސާ ކަމަށްވާ އިންޑިއާ އައުޓު އަކީ ވެސް ކެމްޕެއިނާ ދިމާކޮށް ޖެއްސެވި މަކަރުވެރި ޗިޕެއް ކަމަށް ރައީސް މުއިއްޒު އަމިއްލަފުޅަށް ބައިނަލްއަގްވާމީ ވެރިން އަރިހު އިއުތިރާފުވެފައިވެސް ވުމުންނާ އެކުއެވެ.

ހެޔޮ ނިޔަތަކާ އެކު ކުރާ ކޮންމެ ކަމަކީ ބަލައިގަންނަން ޖެހޭ ކަމަކަށްވާއިރު ވޭޕު މަނާކުރަން އިއްޔެ ރައީސް ނިންމެވި ނިންމުމަކީ އޭގެ މުގާބިލަށް ބަލާނަމަ ރަގަޅު އަދި ތައުރީފު ހައްގު ކަމެކެވެ. ނަމަވެސް އަޅުގަޑު ކުރިން ވެސް ދެންނެވި ފަދައިން މި ވިޔަފާރިތައް ކުރާ ވިޔަފާރިވެރިންގެ ޕްރެޝަރ ބޮޑުވެ ރައީސް މީހާ ކުރިން ބުނި އެތި ކެންސަލް ނުކޮށްފިއްޔާ ކިތަންމެހާ ވެސް ރަގަޅެވެ.

ދެން އޮތް އަނެއް ކަމަކީ ވޭޕު މަނާކުރީ އަޅުގަޑުމެންގެ ޅަދަރިންގެ ޖީލެއް ހަލާކުގެ ތެރެއަށް ވެއްޓެމުންދާތީ އެކަން ހުއްޓުވައިދިނުމަށް އެދި އެތައް މައިންބަފައިންނެއް ވެސް ތައުލީމީ ނިޒާމުގެ ތެރެއިން ވުޒާރާއާ ހަމައަށް ހުށަހެޅި ހުށަހެޅުމަކަށްވާއިރު ހަމަ އެފަދަ މައިންބަފައިންތަކެއްގެ ތުއްތު މައުސޫމު ޅަދަރިންތަކެއް ހަފުސްކޮށް ނައްތާލަން ހަމަލާ ދެމުންދާ ޒަޔަނިސްޓުން ރާއްޖެ އެތެރެވުން ނުހުއްޓުވިގެން އުޅެ އުޅުމެވެ.

ނަސްލު ހޭދައެއް ނުވަތަ ނަސްލެއް ނައްތާލުމަށް، ހަމާސްއާ ޖާމިނުކުރުމަށް ފަހު ޔަހޫދީން ފަލަސްތީނުގެ އެތަން މިތަނަށް ގަސްތުގައި ބޮން އަޅާ ބޮޑު ބަޑީގެ ހަމަލާތައް ދެމުންދާއިރު އެކަމުންވެސް ރާއްޖޭގެ ރައީސް ނާޖާއިޒު ފައިދާ ނަންގަވަމުން ގެންދާ ގެންދިއުމަކީ ދިވެއްްސެއްގެ ހައިސިއްޔަތުން މައެއްގެ ހަސިއްޔަތުން ނުހަނު އަސަރު ކުރާ ކަމެކެވެ.

އަޅުގަޑުމެންގެ ބަޑުގައި ގަރުބަ ގަނެ ވިހެއި ދަރިންތަކަކަށް ޣައްޒާގައި ޝަހީދުވަމުންދާ ކުށެއް ނެތް ތުއްތު ފުރާނަތައް ނުވީ ކަމުގައިވިޔަސް އެއީ ވެސް މަންމައިންތަކެއްގެ ބަނޑުގައި ގަރުބަގަނެ އެ މަންމައިން ނުހަނު ވޭނާ ތަދު ތަހައްމަލުކޮށް ދުނިޔެއަށް އުފަންކުރާ ދަރިންތަކެކެވެ. ނަމަވެސް ހަމަ ހިތަށް އެރުމާ އެކު ސަހްޔޫނީންގެ ނިރުބަވެރިން އެ ގެންދަނީ އެ ތުއްތު ޅަދަރިންތައް ގޮއްވާ ބިންގަޑު ދަށުލައި އެކުދިންގެ ދިރިހުރުމުގެ ހައްގަށް އަރައިގަންނަމުންނެވެ.

މިކަންކަމަކީ ހަމައެކަނި ނިރުބަވެރި ނަތަންޔާހޫ ތަގުރީރުކުރަން ފެށުމުން މާލަމުން ނުކުމެ މެޑަލް ޖަހައިގެން ތިބެވޭނެ ވަރުގެ ކަންކަމެއް ނޫނެވެ. އަދި ޕޯޑިއަމްގެ ކައިރީ ހުއްޓި ހުރެ އިސްކޮޅާ ނުބައްދަލު ވާހަކަފުޅު ދައްކަވައިގެން ދުނިޔޭގެ ސުރުހީތަކަށް އެރިނަމަވެސް އަދި ދިވެހި ސަރުކާރުން މިކަމަށް ފިޔަވަޅެއް އެޅިކަމަކަށް ވެސް ނުވާނެއެވެ.

ސަހްޔޫނީންގެ ޕާސްޕޯޓު މަނާކުރާނީ މި ސަރުކާރުންނޭ ކިޔާ އެކަމުގެ ކްރެޑިޓްވެސް ނަގަން މަޖިލީހަށް އަލުން ބިލެއް ފޮނުވިތާ 128 ދުވަސް ފަހަނަ އަޅާ ދިޔައިރު އެ ބިލުގައި އަތްލަން ސަރުކާރުގެ މެޖޯރިޓީ އޮތް މަޖިލީހަށް ނުކެރިގެން އުޅެނީތޯ ނުވަތަ ގަސްތުގައި އަތްނުލާ ބާއްވާފައި އޮތީތޯ މިއީ އުފެދޭ ސުވާލެކެވެ.

ރާއްޖެއިން ސަހްޔޫނީންގެ ޕާސްޕޯޓު މަނާކުރިކަމަށް ބުރެ ބޮޓު ކުދިން ކޮޅު ލައްވާ ޓްވީޓުކޮށް މުޅި ދުނިޔެއަށް ދޮގު ޚަބަރު ފެތުރުވުމަށް ފަހު ސަރުކާރުން އެ ބިލު ޕާކުކޮށްފައި ބާއްވާފައި އޮތް އޮތުމަކީ ގިނަ ދިވެހިންގެ ކަންބޮޑުވުމެކެވެ.

ސަރުކާރުން ބޭނުން ނަމަ އެ ބިލަކީ މަޖިލީހުން ގޮތެއް ނުނިންމި ނަމަވެެސް ރައީސްގެ ގަރާރަކުންވެސް ނިންމޭނެ ކަމަކަށްވާއިރު މި ކަމުގައި ރައީސް މުއިއްޒާ ސަރުކާރު ފަހަތު ފަޔަށް ބުރަވަނީ ކޮން މަޖްބޫރެއް އޮވެގެންބާއެވެ.

ރައީސް މުއިއްޒެވެ. ގާނޫނު އަސާސީން ލިބިދޭ ބާރުގެ ދަށުން މިވެނި ދުވަހަކުން ފެށިގެން ރާއްޖެއަށް ސަހްޔޫނީންގެ ޕާސްޕޯޓުގައި މީހުން އެތެރެނުވެވޭނެ ގޮތް ހަދައިދޭން "ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް" ރައީސް އަންގާލެއްވުން ކިހިނެތް ވާނެތޯއެވެ.

ރައީސް މުއިއްޒެވެ. ސަހްޔޫނީންގެ ޕާސްޕޯޓު މަނާ ކޮށްފި ކަމަށާ ދިވެހި ސަރުކާރު އަބަދުވެސް ދެމި އޮންނާނީ ފަލަސްތީނުގެ ރައްޔިތުންނާ އެކު ކަމަށް ބުނެ ޑްރާމާ ކުޅެ ބައިސާ ކެނޑުމުގެ ބަދަލުގައި އެކަމަށް އަމަލީ ސިފައެއް ގެނައުން ކިހިނެއްވާނެ ތޯއެވެ؟

ރައީސް މުއިއްޒެވެ. ފަލަސްތީނު ރައްޔިތުންނަށް ހަމަލާދީ ހިންގަމުންދާ ގަލްތުއާންމުގެ ތެރެއިން ސަހްޔޫނީންގެ ސިފައިން ޗުއްޓީ ހޭދަ ކުރަން އަންނަ "ރެގިއުލާ" މަންޒިލަކަށް ރާއްޖެ ހަދާފައިވާއިރު އެވެރިންގެ ޕާސްޕޯޓު ހަގީގީ މާނައިގައި ރައީސް މުއިއްޒުގެ ގަރާރަކުން މަނާ ކޮށްލުން ކިހިނެއް ވާނެތޯއެވެ؟

ރައީސް މުއިއްޒެވެ. ފަލަސްތީނަށް ނަސްރު ލިބެން އެދޭ ކަމަށާ ފަލަސްތީނުގެ ހައްގުގައި ހަނގުރާމައަށް ނުކުންނަން ވެސް ތައްޔާރަށް ތިބި ކަމަށް ބުނެ އދގެ އާންމު މަޖިލީހުގައި ތަގްރީރުކުރެއްވި ކުރެއްވުމަށް އަމަލީ ސިފައެއް ގެންނެވުން ކިހިނެއް ވާނެތޯއެވެ؟