ޚަރަދު ކުޑަ ކުރުމުގެ ނަމުގައި ވަޒީފާތަކުން މީހުންތަކެއް ވަކިކުރަން ނިންމައިފިއެވެ.
އެގޮތުން ރައީސް މުހައްމަދު މުއިއްޒު ވިދާޅުވެފައިވަނީ ސަރުކާރުގެ ޚަރަދު ކުޑަކުރަން ކުރިއަށް 15 ދުވަހުގެ ތެރޭގައި 228 ސިޔާސީ މުވައްޒަފުން މަގާމުން ވަކިކުރަން ނިންމަވާފައިވާ ކަމަށެވެ. އޭގެ ތެރޭގައި ހިމެނެނީ ހަތް ސްޓޭޓް މިނިސްޓަރުންނާއި 43 ޑެޕިއުޓީ މިނިސްޓަރުންނާއި، 109 ސީނިއާ ޕޮލިޓިކަލް ޑިރެކްޓަރުންގެ އިތުރުން 69 ޕޮލިޓިކަލް ޑިރެކްޓަރުންނެވެ.
އިގްތިޞާދީ ސިޔާސަތު އިސްލާހުކުރުމުގެ ތެރެއިން ޚަރަދުކުޑަކުރުމުގެ ގޮތުން އަޅަން ނިންމެވި ފިޔަވަޅެއްގެ ގޮތުން ކަމަށް ވެސް ރައީސް މުއިއްޒު ވިދާޅުވެފައިވެއެވެ.
މި މުވައްޒަފުން ވަކިކުރުމުން ސަރުކާރުގެ ރިކަރެންޓު ޚަރަދުން މަހަކު 5.714 މިލިއަން ރުފިޔާ ސަލާމަތްކުރެވޭނެ ކަމަށް ރައީސް ވިދާޅުވިއެވެ.
މި ސަރުކާރު ވެރިކަމަށް އައީ 700 އަށްވުރެ ސިޔާސީ މުވައްޒަފުންގެ އަދަދު ގިނަ ނުކުރާނެ ކަމުގެ ވައުދާއެކު އެވެ. ނަމަވެސް، އެ އަދަދު 2,000 އާ ގާތްކުރާނެ ކަމަށް އެކި މަސްދަރުތަކުން ހޯދި މައުލޫމާތުތަކުން ވަނީ އެނގިފަ އެވެ.
ނޮވެމްބަރު 17، 2023 ގައި ރައީސް ވެރިކަމާ ހަވާލުވެވަޑައިގަތުމަށް ފަހު މިނިސްޓްރީތަކަށް ނުތަކާ ވަރަށް މުވައްޒަފުން ވަނީ އައްޔަނުކޮށްފަ އެވެ. މިއަދާ ހަމައަށް އައިއިރު ވެސް މި ސަރުކާރުގައި ތިބި ޖުމުލަ ސިޔާސީ މުވައްޒަފުންގެ އަދަދެއް ނޭނގެ އެވެ.
ކުރިއަށް އޮތް 15 ދުވަހުގެ ތެރޭގައި ވަކިކުރާ 228 މުވައްޒަފުންނާ އެކު ވެސް ސަރުކާރުގެ ވައުދަށް ވާސިލެއް ނުވެވޭނެކަން ފާހަގަކޮށްލެވެއެވެ.
