މިދިޔަ އަހަރުގެ ފަހު ކުއާޓަރާއި އަޅާބަލާއިރު މި އަހަރުގެ ފުރަތަމަ ކުއާޓަރުގައި ސަރުކާރު ކުންފުނިތަކުގެ މުވައްޒަފުންގެ އަދަދު މަދުވެފައިވާ ކަމަށް ވިދާޅުވެ ރައީސް އޮފީހުގެ އިސް ތަރުޖަމާނު ހީނާ ވަލީދު އިތުރުފުޅު ހައްދަވައިފިއެވެ.

ސިޔާސި މަގާމްތަކުގައި 7000 އަށްވުރެ ގިނަ މީހުންތިބި ކަމަށް ބުނެ "އަދަދު" ނޫހުން ޚަބަރެއް ޝާއިއު ކުރުމާއެކު އެއީ ދޮގު ޚަބަރެއްކަމަށްބުނެ ހީނާ ވަނީ އެކްސްްގައި ޕޯސްޓެއް ކުަރައްވާފައެވެ.

އެގޮތުން ހީނާ ވިދާޅުވީ 2023 ވަނަ އަހަރުގެ ފަހު ކުއާޓަރއަށް ވުރެ 2024 ވަނަ އަހަރުގެ ފުރަތަމަ ކުއާޓަރގައި ސަރުކާރު ކުންފުނިތަކުގެ މުވައްޒަފުންގެ އަދަދުން 1000 އަށްވުރެ ގިނަ މުވައްޒަފުން މަދުވެފައިވާކަން ޕީސީބީއިން ހާމަކޮށްފައިވާ ހިސާބުތަކުން އެނގޭ ކަމަށެވެ.

ހީނާ މިފަދައިން ވިދަޅުވެފައިވާއިރު ޕީސީބީން ނެރުނު މި އަހަރުގެ ފުރަތަމަ ކުއާޓާގެ ރިޕޯޓުގައިވާ އަދަދުތަކާއި ހީނާގެ ހިސާބު ދިމާނުވާކަން ފާހަގަކޮށްލެވެ އެވެ.

ޕީސީބީގެ ރިޕޯޓުގައިވާ ގޮތުން މިދިޔަ އަހަރުގެ ފަހު ކުއާޓަރު (އޮކްޓޫބަރު-ޑިސެމްބަރު) ނިމުނުއިރު ސަރުކާރު ކުންފުނިތަކުގައި ތިބި މުވައްޒަފުންގެ ޖުމްލަ އަދަދު ހުރީ 30،739 އެވެ. އަދި، މި އަހަރު ފުރަތަމަ ކުއާޓަރު (ޖެނުއަރީ-މާޗު) ނިމުނުއިރު ސަރުކާރުން ކުންފުނިތަކުގައި 33،284 މުވައްޒަފުން ތިބިކަމަށްވެސް އެ ރިޕޯޓުން ހާމަވެއެވެ. އެއީ 2،545 މުވައްޒަފުންގެ އިތުރުވުމެއްކަން ފާހަގަކޮށްލެވެއެވެ.

އެހެން ނަމަވެސް ހީނާ ވަނީ އިތުރުފުޅު ހައްދަވާފައެވެ. މި ސަރުކާރުން ވެރިކަމަށް އައީ ހާމަކަންބޮޑު ސަރުކާރެއްގެ ގޮތުގައި ދައުވާކުރުމަށްފަހުގައެވެ. އެހެން ނަމަވެސް ސަރުކާރަށް އަހަރެއް ވާން ކައިރިވެފައިވާއިރު އަދިވެސް ސަރުކާރުގެ ސިޔާސީ މުވައްޒަފުންގެ ޖުމްލަ އަަދަދު ހާމަކޮށްފައިނުވެއެވެ.