ސަހްޔޫނީންގެ ޕާސްޕޯޓް ދިވެހިރާއްޖޭގައި މަނާކުރުމުގެ ބިލު މަޖިލިސް ތަޅުމުގައި އޮންނަތާ 135 ދުވަސްވެފައިވާ މައްސަލައިގައި ދިވެހި ޒުވާނުންގެ ބަޔަކު މަޖިލިސް އިދާރާގެ ކުރިމަތީގައި މިއަދު މުޒާހަރާކޮށްފިއެވެ.

ވޭޕް އަދި ސިނގިރޭޓް ފަދަ ތަކެތި މަނާ ކުރުމުގެ ބިލުތައް ފާސްކުރެވޭއިރު ސަހްޔޫނީންގެ ޕާސްޕޯޓް މަނާކުރުމުގެ ބިލު ފާސްނުކޮށް ހަތަރު މަސްވެގެން ދިޔުމާއި ގުޅިގެން އާންމުން އަންނަނީ ކަންބޮޑުވުން ފާޅުކުރަމުންނެވެ.

މިއަދު ހެނދުނު ބޭއްވުމަށް ހަމަޖެހުނު މި އިހުތިޖާޖު ހުއްޓާލާ އެ ސަރަހައްދު ދޫކޮށް ދިޔުމަށް މަޖުބޫރުކޮށްފައިވާ ކަމަށް އިހުތިޖާޖުގެ މެންބަރުން ވަނީ ބުނެފައެވެ.

މިފަދައިން ބާއްވާ އެއްވުންތަކަށް ސަރުކާރުން އަންނަނީ ފުލުހުންގެ ބާރު ބޭނުންކޮށް އެއްވުންތައް ރޫޅާ، އަދި ޝުއޫރު ފާޅުކުރާ މެންބަރުން ހައްޔަރުކުރަމުންކަން ފާހަގަކުރެވެއެވެ.

ސަހްޔޫނީން އަންނަނީ ފަލަސްތީނުގެ އިތުރުން ލުބްނާން އަދި އިރާން އަށް ވެސް ގިނަ ހަމަލާތަކެއް އަމާޒުކުރަމުންނެވެ.