އެތައް ހާސް މެމްބަރުންނެއް ތިބި، ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އުވާލަން ސަރުކާރުން މަސައްކަތް ފަށައިފިއެވެ.

"ތޭރަ އޮންލައިން"އަށް މައުލޫމާތު ލިބިފައިވާ ގޮތުގައި އެ ޕާޓީ އުވާލަން ހުށަހެޅުމަށް މިއަދުގެ ވަގުތެއްގައި ޕީޕީއެމްގެ ސެނެޓު ބައްދަލުވުމެއް ބާއްވަން ނިންމާ ހުރިހާ ސެނެޓަރުންނަށް ވަނީ އަންގާފައެވެ. އަދި ޕާޓީ އުވާލަން ހުށަހެޅުމުން އެކަމަށް ތާއީދުކުރުމަށް ރައީސް މުހައްމަދު މުއިއްޒު އަންގަވާފައިވާ ކަމަށް ވެސް ނަން ހާމަ ނުކުރުމަށް އެދި ޕީޕީއެމްގެ ސެނެޓު މެމްބަރަކު ވަނީ "ތޭރަ އޮންލައިން"އަށް މައުލޫމާތު ދީފައެވެ.

މިކަމާ ގުޅިގެން އެ ޕާޓީގެ ދެ ނައިބުން ކަމުގައިވާ ފިޝަރީޒްޒ މިނިސްޓަރު އަހުމަދު ޝިޔާމްއަށާ ޑިފެންސް މިނިސްޓަރު މުހައްމަދު ޣައްސާން މައުމޫނަށް ގުޅުމަށް ފަހު ފޯނަށް ޖަވާބު ނުދެއްވުމުން މެސެޖު ކުރުމުންވެސް ޖަވާބެއް ދެއްވާފައި ނުވެއެވެ.

ހަމައެހެންމެ ޕީޕީއެމް އިން އުފައްދާފައިވާ މީޑިޔާ ގްރޫޕުގައި ސުވާލުކުރުމުން ވެސް ޖަވާބެއް ލިބިފައިނުވެއެވެ.

އިލެކްޝަން ކޮމިޝަނުގެ ވެބްސައިޓުން ފެންނަ ހުރި މައުލޫމާތަށް ބަލާއިރު ޕީޕީއެމްގައި މިވަގުތު 34698 މެމްބަރުން އެބަ ތިއްބެވެ.

ޕީޕީއެމް އުވާލުމަށް ހުށަހެޅުމަށް ސެނެޓު ބައްދަލުވުމެއް ބާއްވަން މިއަދު އެ ޕާޓީއިން ނިންމާފައިވާއިރު އެ ޕާޓީ އުވާލަނީ ކީއްވެކަމެއް، ޕާޓީގެ އިސް ބޭފުޅުން ޖަވާބު ނުދެއްވާތީ ވަނީ ސާފުވާ ގޮތް ނުވެފައެވެ.