ގާނޫނު ދަމަހައްޓާ ކަމަށްވަންޏާ، ސެނެޓުން ނިންމާ ނިންމުމަކަށް ޕާޓީއެއް އުވާނުލެވޭނެކަން އިލެކްޝަން ކޮމިޝަން (އީސީ)އަށް އެނގެންވާނެ ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވެފައިވަނީ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ރަސްމީކޮށް އުވާލާ ސިޔާސީ ޕާޓިތަކުގެ ދަފްތަރުން އުނިކޮށްފައިވާ ވުމަށް އިޝާރާތްކުރައްވާ، ޕީޕަލްސް ނެޝަނަލް ފްރޮންޓް (ޕީއެންއެފް)ގެ ޖަލްސާގައި ވާހަކަ ދައްކަވަމުންނެވެ.

ރައީސް ޔާމީން ވިދާޅުވީ ޕާޓީއެއް އުފައްދަނީ އެތައް ބައެއްގެ މަސައްކަތުން އެތައް ބަޔަކު ޕާޓީއަށް ސޮއިކޮށްގެން ކަމަށާ އެހެންކަމުން ޕާޓީ އުވާލުމުގައި ވެސް އެ ޕާޓީއެއްގެ މެމްބަރުންގެ ބަސް އޮންނަން ވާނެ ކަމަށެވެ.

ނަމަވެސް ޕީޕީއެމް އުވާލުމަށް ރައީސް މުހައްމަދު މުއިއްޒުގެ ރޭވުމުގެ ތެރެއިން ވަނީ ޕީޕިއެމްއިން އަސާސީ ގަވާއިދުވެސް ބަދަލުކޮށް އެކަމަށް މަގު ފަހިކޮށްފައި ކަމަށާ އެއީ ވެގެންވާނެ ގޮތެއް ނޫން ކަމަށްވެސް ރައީސް ޔާމީން ފާހަގަކުރެއްވިއެވެ.

ރައީސް ޔާމީން އިތުރަށް ވިދާޅުވީ، ޕީޕީއެމް އުވާލަން ނިންމީ ޕާޓީ މެމްބަރުންގެ ހައްގުތަކެއް ސެނެޓުން ވަގަށް ދަމައިގަނެގެން ކަމަށެވެ.