ޕްރޮގްރެސިވް ޕާޓީ އޮފް މޯލްޑިވްސް ޕީޕީއެމް އަދި ޕީޕަލްސް ނޭޝަނަލް ކޮންގްރެސް ޕީއެންސީއަކީވެސް ރައީސް ޑރ މުހައްމަދު މުއިއްޒާއި ގުޅުން ހުރި އެމަނިކުފާނުގެ ސިޔާސީ ފިކުރާއި ގުޅޭ ދެޕާޓީއެއް ނޫންކަމަށް ޕީޕަލްސް ނޭޝަނަލް ފްރަންޓް ޕީއެންއެފްގެ ސެކްރެޓަރި ޖެނެރަލް މުހައްމަދު މަލީހު ޖަމާލު ވިދާޅުވެއްޖެއެވެ.

މަލީޙު މިފަދައިން ވިދާޅުވެފައިވަނީ ކުރެއްވި އެކްސް ޕޯސްޓެއްގައެވެ.

އެގޮތުން ރައީސް މުއިއްޒަކީ ޓްރާންސިޓް ޕެސެންޖަރެއްގެ ގޮތުގައި މަލީހުވަނީ ސިފަ ކުރައްވާފައެވެ.

މިހާރުވެސް ވަގުތު ފަހަނައަޅާ ގޮސްފި ކަމަށާއި ޕީޕީއެމްވެސް ޕީއެންސީއަކީވެސް މުއިއްޒާއި ގުޅުންހުރި، އެމަނިކުފާނުގެ ސިޔާސީ ފިކުރާއި ގުޅޭ ދެޕާޓީއެއް ނޫންކަމަށް މަލީހުވަނީ ވިދާޅުވެފައެވެ.

ރައީސް މުއިއްޒު ޕީއެންސީވެސް އުވާލާނެ ކަމަށް ވިދާޅުވެ ސިޔާސީ މިފަޅި ތަމްސީލުކުރަނީ ރައީސް އަބްދުﷲ ޔާމީންގެ ޕީއެންއެފުންކަން މަލީހުވަނީ ފާހަގަ ކުރައްވާފައެވެ.

ޕީޕިއެމް އުފެދިގެން އައީ ޑީއާރުޕީ ތެރޭގައި ދެ ފެކްޝަނެއް އުފެދި، ކުރީގެ ރައީސް މައުމޫން އަބްދުލްގައްޔޫމްގެ ފެކްޝަނުން ޑީއާރުޕީ އިން ވަކިވެގެންްނެވެ. ޕާޓީ އުފެއްދުމަށްފަހު އެ ޕާޓީން 2013 ވަނަ އަހަރުގެ ރިޔާސީ އިންތިހާބުގައި ރައީސް ޔާމިން ވާދަކުރައްވާ ޕީޕިއެމްގެ ފުރަތަމަ ވެރިކަން ގާއިމްކުރިއެވެ.