ރާއްޖޭގައި ދެވަނަ އަށް އެންމެ ބޮޑު ސިޔާސީ ޕާޓީގެ ގޮތުގައި އޮތް ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އުވާލުމުގެ މަސައްކަތް، ސިޔާސީ ޕާޓީތަކުގެ ބެލެނިވެރި ފަރާތްކަމުގައިވާ އިލެކްޝަން ކޮމިޝަންއިން ފަށައިފިއެވެ.

މިކަން ހާމަކޮށްފައިވަނީ އީސީއިން ނެރުނު އިއުލާނެއްގައެއެވެ.

އެ އިއުލާނުގައި ބުނެފައިވަނީ ޕްރޮގްރެސިވް ޕާޓީ އޮފް މޯލްޑިވްސް (ޕީ.ޕީ.އެމް) ގެ އަސާސީ ގަވާއިދުގައިވާ ގޮތުގެމަތިން ޕާޓީ އުވާލުމަށް އެ ޕާޓީގެ ސެނެޓުން ނިންމާފައިވާތީ، ސިޔާސީ ޕާޓީގެ ޤާނޫނުގައިވާ ގޮތުގެމަތީން އެޕާޓީ އުވާލުމުގެ މަސައްކަތް އެ ކޮމިޝަނުން ކުރަމުންދާ ކަމަށެވެ.

އެހެންވެކަމުން، އެ ޕާޓީގެ ނަމުގައި އެއްވެސް ސިޔާސީ ހަރަކާތެއް ހިންގުން މަނާވެފައިވާ ކަމަށް އެ އިއުލާނުގައި ބުނެފައިވެއެވެ.

އިތުރަށް އެ އިއުލާނުގައި ބުނީ އެ ޕާޓީ އުވާލުމަށްޓަކައި ފުރިހަމަ ކުރަންޖެހޭ އިޖުރާއަތުތައް ފުރިހަމަކުރުމަށް ކުރެވޭ މުއާމަލާތްތައް ފިޔަވައި އިތުރު އެއްވެސް މުއާމަލާތެއް ކުރުމުގެ އިހްތިޔާރު ޕީޕީއެމަށް ލިބިގެން ނުވާ ކަމަށެވެ.

ޕާޓީއާ ގުޅިގެން ނިންމަންޖެހޭ އެއްވެސް ކަމެއްވާނަމަ، އުވާލުމުގެ މަރުޙަލާ ނިމުމުގެ ކުރިން އެ ޕާޓީއާ ގުޅިގެން ކުރިއަށް ގެންދިއުމަށް އީސީން އެދިފައިވެއެވެ.

ޕީޕީއެމް އުވާލަން ނިންމާފައިވަނީ މި މަހުގެ ދެވަނަ ދުވަހު ބޭއްވި އެ ޕާޓީގެ ސެނެޓުން ބޭއްވި ބައްދަލުވުމުގަ އެވެ. އެގޮތަށް ނިންމާފައިވަނީ ސެނެޓަށް ވަޑައިގެން ތިއްބެވި 43 މެމްބަރުންގެ އިއްތިފާގުންނެވެ.

މިގޮތަށް ފާސްކުރި ބައްދަލުވުމުގެ ރިޔާސަތުގައި އިންނެވީ އެ ޕާޓީގެ ނައިބު ރައީސުން ކަމަށްވާ ފިޝަރީޒް މިނިސްޓަރު އަހުމަދު ޝިޔާމު އާ ޣައްސާން މައުމޫނުގެ އިތުރުން ޑރ އަބްދުﷲ ޚަލީލުއެވެ.

މި އަހަރުގެ ސެޕްޓެމްބަރު 19 އާ ހަމައަށް ވެސް އެ ޕާޓީގައި 34،694 މެންބަރުން ތިބި ކަމަށް އިލެކްޝަންސް ކޮމިޝަން (އީސީ)ގެ ވެބްސައިޓުން ދައްކައެވެ.

ރައީސް މުއިއްޒު ވެރިކަމަށް ވަޑައިގެންނެވި ފަހުން ޕީޕީއެމްގެ ހަރަކާތްތައް އޮތީ ހުއްޓިފަ އެވެ. އޭގެ ބަދަލުގައި ކުޑަ ޕާޓީއެއްގެ ގޮތުގައި އޮތް ޕީއެންސީ ވަރުގަދަ ކުރުމުގެ މަސައްކަތް ފެށި އެވެ. މި އަހަރު ބޭއްވި ރައްޔިތުންގެ މަޖިލީހުގެ އިންތިހާބަށް ވެސް ހުރިހާ ކެންޑިޑޭޓުން ނެރުނީ ޕީއެންސީގެ ނަމުގަ އެވެ.

ރައީސް ޔާމީން ޕީޕީއެމް އިސްތިއުފާ ދެއްވީ ޖަލުން ގެކޮޅަށް ބަދަލު ކުރެއްވި ފަހުން ރައީސް މުއިއްޒު ވެރިކަމުގެ ހުވާ ކުރެއްވުމުގެ ކުރިންނެވެ.

ޕީޕީއެމް އުވާލުމަށް މަސައްކަތް ފެށުމާއެކު، އުވާލުމަށް ނިންމާ ސިޔާސީ ޕާޓީތަކުގެ ކުލަޔާއި ނަމާއި ނިޝާން، އެ ޕާޓީއެއް އުވާލާތާ ފަސް އަހަރު ވަންދެން ބޭނުން ނުކުރެވޭ ގޮތަށް ގާނޫނު ބަދަލުކޮށްފަ އެވެ. ސަރުކާރުން ހުށަހެޅި މި ބިލު ވެރިކަންކުރާ ޕީއެންސީގެ މަޖިލީހުން ފާސްކޮށް މިހާރު ވަނީ ތަސްދީގުވެސްކޮށްފަ އެވެ.

އެހެންކަމުން ޕީޕީއެމް އުވާލުމާއެކު އެ ޕާޓީގެ ކުލަޔާއި، ނަމާއި، ނިޝާނާއި، ލޯގޯ، އަދި އެހެންވެސް ޕާޓީ ރަމްޒު ކޮށްދޭ އެއްޗެއް ކުރިއަށް އޮތް ފަސް އަހަރު ތެރޭ ސިޔާސީ ޕާޓީއަކަށް ބޭނުމެއް ނުކުރެވޭނެ އެވެ.