ޕީޕަލްސް ނެޝަނަލް ކޮންގްރެސް (ޕީއެންސީ) ތެރޭގައި ދެ ފެކްޝަނެއް އުފެދިފައިވާކަމަށް ރައީސް ޔާމީން އަބްދުލްގައްޔޫމް ވިދާޅުވެެއްޖެ އެވެ.

ރައީސް ޔާމީން މިިފަދައިން ވިދާޅުވެފައި ވަނީ ހޯމަ ދުވަހުގެ ރޭ ފްރޮންޓް އޮފީހުގައި އޮތް ޖަލްސާގައި ވާހަކަދައްކަވަމުންނެވެ.

އެގޮތުން އެމަނިކުފާނު ވިދާޅުވީ ރައީސް ޑރ. މުހައްމަދު މުއިއްޒުގެ ފެކްޝަނަކާއި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲގެ (އަދުރޭގެ) ފެކްޝަނެއް އެބައޮތް ކަމަށެވެ.

ރައީސް ޔާމީން ވިދާޅުވީ މަޖިލީހުގެ ރައީސް ދިރިއުޅުއްވާ މުރައިދޫގޭގައި މަސައްކަތްކުރާ މުވައްޒަފުންގެ މައުލޫމާތު ދިނުމަކީ މަޖިލީހުގެ ރައީސަށް އޮތް ނުރައްކަލެއް ކަމަށް ކަނޑައެޅީ އަދުރޭ ރާއްޖޭގައި ހުންނަވަނިކޮށް ކަމަށެވެ.

އެހެންނަމަވެސް އޭނާ ރާއްްޖެއިން ފުރާވަޑައިގަތުމުން ރައީސް މުއިއްޒުގެ އެންގެވުމަށް އެ ނިންމުން ބަދަލުކޮށްފައިވާ ކަމަށް ރައީސް ޔާމީން ވިދާޅުވި އެވެ.

މަޖިލީހުގެ ރައީސް ދިރިއުޅުއްވާ މުރައިދޫގެއަށް މުވައްޒަފުން ނަގާފައިވާތީ ޔާމީން ވަނީ އެކަމަށް ފާޑުވިދާޅުވެފަ އެވެ. އެމަނިކުފާނު ވިދާޅުވީ އެތަނަކީ އޮފީހެއް ނޫން ކަމަށާއި އެހެންކަމުން އެތަނަށް މުވައްޒަފުން ނަގަން ނުޖެހޭ ކަމަށެވެ.

އަދުރޭއަށް ރައީސް މުއިއްޒުގެ ނިންމުން ކަމުނުދާ ކަމަށާ ރައީސް މުއިއްޒަށް އަދުރޭގެ ނިންމުންތައް ކަމުނުދާކަމަށް ރައީސް ޔާމީން ވިދާޅުވިއެވެ.