ފަޅުތަކާއި، ކަނޑުގެ ބަނދަރާއި ގައުމުގެ އެހެނިހެން ތަންތަން ބޭރުގެ މީހުންނަށް ވިއްކަމުންގެންދާތީ ރައީސް އަބްދުﷲ ޔާމީން އަބްދުލްގައްޔޫމް ފާޑުވިދާޅުވެއްޖެ އެވެ.

ރައީސް ޔާމީން މިފަދައިން ވިދާޅުވެފައި ވަނީ ބުރާސްފަތި ދުވަހުގެ ރޭ ފްރޮންޓް އޮފީހުގައި އޮތް ޖަލްސާގައި ވާހަކަދައްކަވަމުންނެވެ.

އެގޮތުން އެމަނިކުފާނު ވިދާޅުވީ ރައީސް މުހައްމަދު ނަޝީދުގެ ވެރިކަމުގައި ބައިނަލްއަގްވާމީ އެއާޕޯޓް ޖީއެމްއާރަށް ދިނުމުގެ ސަބަބުން އެކަމާ އެންމެ ބޮޑަށް މަގުތަކަށް ނިކުމެ އިހުތިޖާޖް ކުރީ އަދުގެ ސަރުކާރުގައި ތިއްބެވި ފަރާތްތަކުންކަމަށެވެ. އެގޮތައް އެއާޕޯޓް ޖީއެމްއާރަށް ވިއްކާލުމުން އެއާޕޯޓް ވާނީ އަނބުރާ ހޯދާފައިކަމަށް ވެސް ރައީސް ޔާމީން ވިދާޅުވިއެވެ.

އަދުގެ ސަރުކާރުން ކަނޑުގެ ބަނދަރު ވިއްކާލަން މަސައްކަތް ކުރާކަމަށް އިޝާރާތްކުރައްވާ ރައީސް ޔާމީން ވަނީ ރައީސް ނަޝީދު ދެއްކެވި ބަސްކޮޅެއްކަމަށްވާ " ވިއްކަމުން ވިއްކަމުން ގޮސް ދެން ވިއްކާލާނީ މަންމަގެ އުނަގަނޑުގައި އޮތް ފަށްޓަރުބައި" ކަމަށް ވިދާޅުވެ ސަރުކާރަށް ވަރަށް ބޮޑަށް ފާޑުވިދާޅުވެފައެވެ.

އަޅުގަނޑުމެން ދިވެހިން ލޯބިން ބިމަށް މަންމަ ކިޔާއިރު މި ސަރުކާރުން އެ ދަނީ ބިންތައް ވިއްކަމުންކަމަށް ރައީސް ޔާމީން ވިދާޅުވިއެވެ.

މީގެ ކުރިން ވެސް ފްރޮންޓް އޮފީހުގައި ކުރިޔަށް ގެންދިޔަ ޖަލްސާތަކުގައި ރައީސް ޔާމީން ވަނީ ޕޯޓު ވިއްކާލަން މި ސަރުކާރުން ކުރަމުންގެންދާ މަސައްކަތް ކުށްވެރިކޮށް އެކަމަށް ވަރަށް ބޮޑަށް ފާޑުވިދާޅުވެފައެވެ.