‏ގއ.ވިލިނގިލިން އިތުރު ހޯއްގޮވާ ކެއްސުމުގެ (ޕަރޓޫސިސް) ވޭދަނަ އެއް ފެނިފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އާންމު ކުރި ތަފާސް ހިސާބުތަކަށް ބަލާއިރު، ފައްސިވެފައިވާ ކުދިންނާއި ގާތުން އެއްތަންވި މީހުންގެ އަދަދު މިހާތަނަށް 177 އަށް ވަނީ އަރައިފައެވެ.

މީގެ ތެރެއިން 25 މީހުންނަކީ އަލާމާތްތައް ހުރި މީހުން ކަމަށްވެސް އެޗްޕީއޭގެ ތަފާސް ހިސާބުތަކުން ހާމަކުރެއެވެ.

އަލާމާތްހުރި 46 މީހަކު ޓެސްޓު ކޮށްފައިވާކަމަށް ދައްކާއިރު، މި ބައްޔަށް 27 މީހަކު ވަނީ ވެކްސިން ޖަހައިފައެވެ.

އެޗްޕީއޭއިން ބުނީ އެރަށުގައި ބަލި ފެތުރުން، މަދު ކުރުމަށް ގއ.އަތޮޅު ހޮސްޕިޓަލްގައި ޓާސްކް ފޯހެއް އެކުލަވާލައި، ރަށުގެ އެހެނިހެން ސެކްޓަރުތަކުގެ ފަރާތްތަކުގެ އެއްބާރުލުމާއެކު ބަލި ފެތުރުން ކޮންޓްރޯލް ކުރުމުގެ މަސައްކަތް ކުރެވެމެންދާ ކަމަށެވެ.

މި ބަލި ފެތުރެނީ ނޭލާވާ ނިޒާމުގެ ޒަރިއްޔާއިންނެވެ. ބަލި ޖެހުމުން ފުރަތަމަ ފެންނާނީ އާންމު ރޯގާތަކުގައި ވެސް ފެންނަ އަލާމަތްތަކެވެ. މީގެ އިތުރުން ހަފްތާއެއްހާ ދުވަސް ފަހުން ވަރަށް ބޮޑަށް ކެއްސާ މި ކެއްސުން ދިގުލައިގެން ދެއެވެ. ތުއްތު ކުދިންނަށް މީގެއިތުރުން ވެސް އެހެން އަލާމާތްތައް ފެނިދާނެއެވެ. އަދި ދި ވެކްސިން ފުރިހަމަ ކޮށްފައިވާ ކުއްޖަކަށް ނުވަތަ ބޮޑު މީހަކަށް މި ބަލި ޖެހިއްޖެނަމަ ބަލީގައި މާބޮޑެތި އަލާމަތްތަކެއް ނުފެނިދާނެއެވެ.

ބަލި ޖެހުުމުން ނުރައްކާ ބޮޑީ ވަރަށް ތުއްތު ކުދީންނަށެވެ. އެހެން ކަމުން ހަތް އަހަތު ނުވާ ކުދީންގެ ތެރެއިން މި ވެކްސިންގެ ޑޯޒްތައް ފުރިހަމަ ނުކޮށް ހުރި ނަމަ ވީހާވެސް އަވަހަކަށް ވެކްސިން ފުރިހަަމަ ކުރަން އެޗްޕީއޭ އިން ވަނީ އިރުޝާދު ދީފައެވެ.