ފ.ނިލަންދޫގެ ހިތްގައިމު ތުނޑި ގުރުބާންކޮށް އެތަނުގައި އެއާޕޯޓް އަޅަން ނިންމުމާ ގުޅިގެން އެ ރަށުގެ ރައްޔިތުން ހިތްހަމަނުޖެހުން ފާޅުކުރަން ފަށައިފި އެވެ.

ނިލަންދޫގައި އެއާޕޯޓް އަޅައި ދެއްވާނެކަމަށް ރައީސް ޑރ މުހައްމަދު މުއިއްޒު އެ ރަށުގެ ރައްޔިތުންނަށް ވައުދުވެވަޑައިގަތީ 20 ވަނަ ރައްޔިތުންގެ މަޖިލިސް އިންތިޚާބާ ދިމާކޮށް އެ ރަށް ހިމެނޭ ދާއިރާއަށް އެމަނިކުފާނުގެ ކޮއްކޯފުޅު ފާތިމަތު ސައުދާ ކުރިމަތުލުން، އޭނާއަށް މަޖިލިސް ގޮނޑި ކާމިޔާބުކޮށްދިނުމަށްޓަކައިއެވެ.

އެއާޕޯޓް އަޅަން އެއްްބަސްވުމުގައި ސޮއިކުރި ހިސާބުން ފެށިގެން އެ ރަށުގެ ރައްޔިތުން ވަނީ ސައުދާއަށް ތާއިދުކޮށް އެ ދާއިރާއަށް އޭނާ އިންތިޚާބްކޮށްފައެވެ.

އޭރުވެސް އެއާޕޯޓް އެޅުމުގެ މަސައްކަތް ކުރިޔަށް ގެންދާނެ ވަކި ތަނެއް ރަށުން ފާހަގަކޮށްފައިނުވެއެވެ.

މީސްމީޑިޔާގައިވާ ބައެއް ޕޯސްޓްތަކުން އެނގޭ ގޮތުގައި އެއާޕޯޓް އަޅަން ފަށާފައި ވަނީ އެ ރަށުގެ ހިތްގައިމު ގުދުރަތީ ތުނޑީގައެވެ. އެތަނަކީ އެ ރަށުގެ ކުދި ބޮޑު އެންމެން މޫދަށް އެރުމަށް ބޭނުންކުރަމުން އައި ވަރަށް ދުވަސްވީ ތަނެކެވެ.

ނަމަވެސް އެއާޕޯޓް އަޅަން މަސައްކަތްތައް ފެށިފައިވުމުން އެތަން ވަނީ ވަރަށް ބޮޑަށް ހަލާކުވެފައެވެ. މިކަމާ ގުޅިގެން "ތޭރަ އޮންލައިން"އަށް މައުލޫމާތު ދެމުން ނިލަންދޫގެ ރައްޔިތެއް ބުނީ އެއާޕޯޓެއް ވަރަށް ވެސް ބޭނުންކަމަށެެ. އެހެންނަމެވެސް އެއާޕޯޓަކަށްޓަކައި ރަށުގެ ތުނޑި ގުރުބާންކުރާކަށް ގިނަ ރައްޔިިތުން ނޭދޭކަމަށެވެ.

ނިލަންދޫގެ އެއާޕޯޓް އަޅާ ސަރަހައްދު ކަމު ނުގޮަަސްގެން އެ ވާހަކަ މެމްބަރު ސައުދާއަށް ދެންނެވުމުން ސައުދާ ވިދާޅުވީ އެތަން ނޫން ތަނެއްގައި އެއާޕޯޓް ނޭޅޭނެކަމަށާއި ދެން އެއްވެސް ރައްޔިތަކު ޝަކުވާކޮށްފި ނަމަ އެއާޕޯޓްގެ މަސައްްކަތް ނުކޮށް ހުއްޓާލާނެކަމަށެވެ. ސައުދާ މިފަދައިން އިންޒާރު ދިނުމުން އެ ރަށު ރައްޔިތުން ވަނީ ގޮތްހުސްވެ، ތުނޑި ގުރުބާންކޮށް އެއާޕޯޓް އަޅަން އެތަން ދިނުމަށް މަޖުބޫރުވެފައިކަން ފާހަގަކޮށްލެވެއެވެ.