އިންޑިއާއެކު ވެފައިވާ އެއްބަސްވުންތައް ދައްކާނެ ހިތްވަރު މި ސަރުކާރުގައި ނުހުންނާނެ ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވެފައިވަނީ، ހޯމަ ދުވަހުގެ ރޭ ބޭއްވި ޕީއެންއެފްގެ ޖަލްސާގައި ވާހަކަފުޅު ދައްކަވަމުންނެވެ.

ރައީސް ޔާމީން ވިދާޅުވީ، މީގެ ކުރިން އިދިކޮޅުގައި ތިބެގެން މިއަދު މަޖިލީހުގެ މެޖޯރިޓީ އޮތް ޕީއެންސީއިން އިންޑިއާގެ އެއްބަސްވުންތައް ހާމަނުކޮށްގެން އަޑު ގަދަކުރި ކަމަށާ އެ ޕާޓިއަށް ވެރިކަން ލިބިއްޖެނަމަ އެ އެއްބަސްވުންތައް ހާމަކުރާނެކަމަށް ވައުދުވުމަށް ފަހު އައިސް މި ސަރުކާރުން އެކަން ކޮށްފައިވަނީ އިހުނަށް ވުރެ ވެސް ގޯސްކޮށް ކަމަށެވެ.

ރައީސް ޔާމީން ވަނީ އުތުރުތިލަފަޅު އިންޑިއާއަށް އަނެއްކާވެސް ދޫކޮށްލުމަށް ކެބިނެޓުގެ މަޝްވަރާ ހޯދިތޯވެސް އައްސަވާ ސުވާލެއް އަމާޒުކުރައްވާފައެވެ.

މީގެ އިތުރުން ޔޫޓީއެފް އެގްރިމަންޓު ހޯދަން މަޖިލީހަކުން ވެސް 241 ކޮމިޓީއަކުންވެސް މަސައްކަތް ނުކުރާކަން ރައީސް ޔާމީން ފާހަގަކުރެއްވިއެވެ.

ރައީސް ޔާމީން ވަނީ، ދިވެހި ރައްޔިތުން ތިމަންނަ ހޮވީ އިންޑިއާ ސިފައިން ބޭރުކުރާނެކަމަށް ބުނުމުންކަމަށް ރައީސް މުއިއްޒު ވިދާޅުވެފައިވާއިރު އެއީ ރައްޔިތުން ހަވާލުކުރި މެންޑޭޓްކަމާ އެއާއި ހިލާފުވެއްޖެނަމަ ވެރިކަމުގައި ހުރުމުގެ އެއްވެސް ބާރެއް ރައީސް މުއިއްޒުއަށް ނެތްކަން ފާހަގަކުރައްވާފައެވެ.

އިންޑިއާއެކު ވެފައިވާ އެއްބަސްވުންތައް ހާމަކުރާނެ ހިތްވަރު މި ސަރުކާރުގައިވެސް ނުހުންނާނެ ކަމަށް ރައީސް ޔާމީން ވިދާޅުވެފައިވާއިރު، ކުރީ ސަރުކާރުން އިންޑިއާއާއެކު ސޮއިކުރި އެއްބަސްވުންތަކުގެ މައްސަލަ ބެލުމަށް ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީ (241 ކޮމިޓީ) އަށް، ހިތަދޫ މެދު ދާއިރާގެ މެންބަރު އަހްމަދު އަޒާން ހުށަހެޅުއްވި މައްސަލަ ކުރިއަށް ނުގެންގޮސް، ބާއްވާފައި އޮންނަތާ ހަތަރު މަހަށް ވުރެ ގިނަ ދުވަސްވަނީ ވެފައެވެ.

މައުލޫމާތު ލިބިފައިވާ ގޮތުގައި އެ މައްސައިގެ އެއްވެސް މަސައްކަތެއް، އިތުރު ބައްދަލުވުމެއް ވެސް ކުރިއަށް ނުގެންގޮސް ބާއްވާފައި އޮތީ، ސަރުކާރުގެ އެންމެ މަތިންނާއި ޕާޓީގެ ލީޑަޝިޕުން އެ މައްސަލަތައް ކުރިއަށް ނުގެންދަން އިރުޝާދު ދީފައި އޮތުމުންނެވެ.