ޑްރޯންތައް ބޭނުންކުރޭތޯ ބަލަން ޑިފެންސް މިނިސްޓަރު މަޖިލީހަށް ހާޒިރުކުރަން ނިންމައިފިއެވެ.
އެގޮތުން ބޮޑު އަގުގައި ތުރުކީއިން ގަތް ޑްރޯންތައް ބޭނުންކުރޭތޯ ސާފު ބަލަން ޑިފެންސް މިނިސްޓަރު މުހައްމަދު ޣައްސާން މައުމޫން ރައްޔިތުންގެ މަޖިލީހަށް ހާޒިރު ކުރަން އެދިފައިވަނީ، ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމްއެވެ.
މީކާއިލްގެ ހުށަހެޅުއްވުމުގައި ވަނީ 570 މިލިއަން ރުފިޔާއާ ގާތްކުރާ އަގެއްގައި އެމްއެންޑީއެފްގެ އެއާ ކޯގެ ހިދުމަތަށް ގެނައި ޑްރޯން ބޭނުން ކުރަން ފަށާފައިވޭތޯ ސުވާކުކުރައްވާފައެވެ. އަދި ޑްރޯން މިހާތަނަށް ބޭނުން ކުރެވިފައި ވަނީ ކޮން ބޭނުމެއްގައިކަން ވެސް ޑިފެންސް މިނިސްޓަރު ސާފު ކޮށްދެއްވުމަށް ވެސް އެދިފައިވެއެވެ.
ރާއްޖޭގެ ކަނޑުގެ ސަރަހައްދު ބެލެހެއްޓުމަށް ތުރުކީން ގެނައި ތިން ޑްރޯންގެ ބޭނުން ހިފަމުން ދޭތޯ ބެލުމަށް މިނިސްޓަރު މަޖިލީހަށް ހާޒިރުކުރުމަށް އިދާރާގައި އެދިފައިވާއިރު، ސަރުކާރުން އެންމެ ފުރަތަމަ ބުނީ އެއީ ތުރުކީގެ އެހީއެއް ކަމަށެވެ. ނަމަވެސް ފަހުން ހާމަވީ ގޮތުގައި އެއީ މިދިޔަ އަހަރުގެ ސަޕްލިމެންޓްރީ ބަޖެޓުން 37 މިލިއަން ޑޮލަރު ހޭދަކޮށްގެން ދިވެހި ސަރުކާރުން ގަނެފައިވާ އާލާތްތަކެކެވެ.
ޑްރޯން ބޮޑު އަގުގައި ގަނެފައިވެސް ސަރުކާރުން އޭގެ ބޭނުން ނުހިފާކަން ހާމެވެއެވެ. އެގޮތުން އެ ޑްރޯންތަކުގެ ބޭނުން ހިފާފައިވާ ވަނީ މ. ރަތްމަންދޫ ބޭރުން އެޕްރީލް 20، ގައި ގެއްލުނު ދޯންޏެއް ހޯދުމަށް އެކަންޏެވެ.
