ފަލަސްތީނަށް ދޭން ކަމަށް ބުނެ ރައްޔިތުން އަތުން ނެގި 19 މިލިއަން ރުފިޔާ ޖަމާކުރިކަމަށް ބުނާ ރިސިޕްޓް ދޭން ސަރުކާރު (ޕީއެސްއެމް)އިން ދެކޮޅު ހަދައިފިއެވެ.

ސަރުކާރު (ޕީއެސްއެމް)އިން މިކަމަށް ދެކޮޅު ހަދާފައިވަނީ މައުލޫމާތު ހޯދާ ލިބިގަތުމުގެ ގާނޫނުގެ ދަށުން އެ މައުލޫމާތު ހޯދަން، ނޫސްވެރިޔާ އާއިދު އެދިފައިވާ ވުމާ ގުޅިގެން މައުލޫމާތު ހިއްސާނުކުރުމުން އިންފޯމޭޝަން ކޮމިޝަނަރގެ އޮފީހުން ބޭއްވި އަޑުއެހުމުގައެވެ.

ސަރުކާރުގެ ފަރާތުން ބުނެފައިވާ ގޮތުގައި އެ ރަސީދު ހިއްސާ ނުކުރެވޭނީ ތިން ވަނަ ފަރާތެއްގެ މައުލޫމާތު އޭގައި ހިމެނޭތީއެވެ. އެގޮތުން ފައިސާ ޖަމާކުރި އެކައުންޓު ނަމްބަރާ އެ އެކައުންޓުގެ ނަން ފައިސާގައި ހިމެނިފައިވާތީ އެ ރަސީދު ހިއްސާނުކުރެވޭނެ ކަމަށް ބުނެ ސަރުކާރުން ވަނީ އެ ރަސީދު ހިއްސާކުރުމާ ދެކޮޅު ހަދާފައެވެ.

މިކަމާ ގުޅިގެން އިންފޯމޭޝަން ކޮމިޝނަރުގެ އޮފީހުން ހާމަކޮށްފައިވާ ގޮތުގައި، އިސްތިސްނާ މައުލޫމާތު ހިމެނޭ ނަމަ އެ މައުލޫމާތެއް އުނިކުރުމަށް ފަހު ވެސް އެދިފައިވާ މައުލޫމާތު ހިއްސާކުރަން މައުލޫމާތު ހޯދާ ލިބިގަތުމުގެ ގާނޫނުގެ ތެރެއިން ލާޒިމްކުރާ ކަމަށާ އެހެންކަމުން އެކަން އެހެން ސަރުކާރު(ޕީއެސްއެމް) އިން ހާމަކުރަން ޖެހޭނެ ކަމަށެވެ.

މި ވާހަކަތަކަށް ރައްދު ދެއްވާ ސަރުކާރު (ޕީއެސްއެމް)ގެ ފަރާތުން ޑިރެކްޓަރ ލީގަލް މަރިޔަމް ހަނީފާ ޚަލިދު ވިދާޅުވީ، މައުލޫމާތު ހޯދަން އެިދފައިވަނި އަމިއްލަ ފަރާތަކުން ކަމަށާ އެކަމުގައި އޭނާގެ މަސްލަހަތު ހިމެނޭތޯ އެއީ ބަލަން ޖެހޭ ކަމެއް ކަމަށެވެ. އެ ވާހަކައަށް ރައްދު ދެއްވާ އައިކޮމް އިން ބުނެފައިވަނީ އެއީ ގާނޫނު ލާޒިމުކުރާ ޝަރުތުތަކުގެ ތެރޭގައި އެ ޝަރުތު ނުހިމެނޭ ކަމަށެވެ. އަދި އައިކޮމް އިން ވަނީ ހޯދަން އެދިފައިވާ މައުލޫމާތަކީ ޕީއެސްއެމުން ބަލަހައްޓާ މައުލޫމާތެއްތޯވެސް ސުވާލުކޮށްފައެވެ.

އެ ސުވާލުގެ ޖަވާބުގައި ޕީއެސްއެމުން ބުނެފައިވަނީ އެ ސުވާލަަށް ޖަވާބު ދެވެން ނެތް ކަމަށެވެ. އެ ޖަވާބާ އެކު އައިކޮމް އިން އަޑު އެހުން ނިންމަވާލެއްވީ މައުލޫމާތު ހާމަކުރަން ގާނޫނުގައި އޮތް މުއްދަތުވެސް ފަހަނަ އަޅާ ދިޔައިރުވެސް އެ މައުލޫމާތު ހާމަކޮށްފައިނުވާތީ އެކަމުގައި ގޮތެއް ނިންމަން އިތުރު އަޑު އެހުމެއް ބާއްވަން އިއުލާންކުރެއްވުމަށް ފަހުއެވެ.

ޕީއެސްއެމުން އިސްނަގައިގެން ޕަލަސްތީނަށް އެހީވުމަށް ކަމަށް ބުނެ މީޑިޔާތައް ބައިވެރިކޮށްގެން ބޭއްވި ޓެލެތޯނު ބާއްވާފައިވަނީ ޖޫން މަހުގެ ތެރޭގައެވެ. ޗެނަލް13 ބައިވެރިނުކުރުމަށް ނިންމާ ސަރުކާރާ ޕީއެސްއެމުން ބޭއްވި އެ ޓެލެތޯނުގައި 19,186,851.5 ރުފިޔާ ލިބިފައިވާ ކަމަށް ހާމަކޮށްފައިވެއެވެ.

ފަލަސްތީނަށް އެހީވުމުގެ ނަމުގައި ބޭއްވި ޓެލެތޯނުން ލިބުނު ފައިސާ ހަވާލުކުރިތޯ ޔަގީންކުރުމަށް ފޮރިން މިނިސްޓަރު މަޖިލީހަށް ހާޒިރުކުރުމަށް ވެސް ވަނީ ނިންމާފައެވެ.