މި ސަރުކާރުން 22 ވުޒާރާ އުފައްދައިގެން ވެސް ތަރައްގީގެ އެއްވެސް މަޝްރޫއުއެއް ފައްޓައިން ކުރިޔަށްގެންދާ މަންޒަރު ނުފެންނަކަމަށް ބުނެ، ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެމްބަރު މުހައްމަދު ވަހީދު (ވައްޑެ) ފާޑު ވިދާޅުވެެއްޖެ އެވެ.
ވައްޑެ މިފަދައިން ވިދާޅުވެފައި ވަނީ އެކްސްގައި ކުރެއްވި ޕޯސްޓެއްގައެވެ.
ރައީސް ޑރ މުހައްމަދު މުއިއްޒު ވެރިކަމަށް އައީ 24 ގަޑި އިރު ހޭލާ ތިބެ ރައްޔިތުންނަށް ހިދުމަތްކޮށްދެއްވާނެކަމުގެ ވައުދާއެކުގައެވެ. އެހެންކަމުން އެ ވާހަކައަށް އިޝާރާތް ކުރައްވާ ވައްޑެ ވިދާޅުވީ މި ސަރުކާރު އައިސް 22 އައު ވުޒާރާ އުފައްދަވާފައިވާ ކަމަށެވެ. އަދި އެތަންތަނަށް 100 އަށްވުރެ ގިނަ މުވައްޒަފުން އައްޔަންކޮށްފައިވާ އިރު އެއްވެސް މަސައްކަތެއް ކުރާ މަންޒަރު ނުފެންނަކަމަށެވެ.
24 ގަޑި އިރު ރައްޔިތުންނަށް ހިދުމަތް ކޮށްދެއްވާނެކަމަށް މީގެ ކުރިން ވިދާޅުވި ނަމަވެސް މިހާތަނަށް އެއްވެސް ތަރައްގީގެ މަޝްރޫއެއް ފަށައިގެން އެއްވެސް ނަތީޖާއެއް އެންމެ ވުޒާރާއަކުން ވެސް ފެނިފައިނުވާކަމަށް ވިދާޅުވެ ވައްޑެ ވަނީ ވަރަށް ބޮޑަށް ފާޑުވިދާޅުވެފައެވެ.
މި ސަރުކާރު އައީ އެތައް ކަމެއް ކޮށްދެއްވާނެ ކަމުގެ ވައުދާއެކުގައެވެ. ނަމަވެސް ސަރުކާރަަށް އަހަރެއް ވާން ކައިރިވި އިރުވެސް ފުއްދުނު ވައުދެއް ނެތްކަމަށް ބުނެ ގިނަ ބަޔަކު އަންނަނީ ސަރުކާރަށް ފާޑުކިޔަމުންނެވެ.
