ހަނދާނަށް އަންނަނީ މިއަހަރުގެ މެއި މަހުގެ 22 ވަނަ ދުވަހެވެ. 20 ވަނަ ރައްޔިތުންގެ މަޖިލީހަށް އަލަށް ހޮވިވަޑައިގެން ސަރުކާރުގެ މެމްބަރުންނާ ބައްދަލުކުރެއްވުމަށް ރައީސުލްޖުމްހޫރިއްޔާއަށް ހާއްސަ ކުރައްވާފައިވާ ގެކޮޅުކަމުގައިވާ މުލިއާގެއަށް މެމްބަރުން ހާޒިރުކުރުވިއެވެ. އެ ދުވަހުގެ ބައްދަލުވުމުގައި ހާއްސަ ނިންމުންތަކެއް ވަނީ ނިންމަވާފައެވެ.

އެގޮތުން 20 ވަނަ ރައްޔިތުންގެ މަޖިލީހުގެ ޕީޖީ ގްރޫޕްގެ ލީޑަރާ، މަޖިލީހުގެ ރައީސްގެ އިތުރުން ނައިބު ރައީސްކަމުގެ މަގާމްތަކަށް ވެސް މެމްބަރުން އައްޔަން ކުރެއްވީ އެދުވަހުއެވެ. މުލިއާގޭގައި ދިގުލައިގެންދިޔަ އެ ބައްދަލުވުމުގައި އެ ދުވަހު ރައީސުލްޖުމްހޫރިއްޔާ ޑރ މުހައްމަދު މުއިއްޒު ނިންމެވީ ކޮންމެ މަހަކު އެމަނިކުފާނުގެ ފަރާތްޕުޅުން ސަރުކާރު ތަމްސީލު ކުރާ މެމްބަރުންނަށް އެއް ލައްކަ ރުފިޔާ ދިނުމަށެވެ. ނަމަވެސް މާލީ ހާލަތު ގޯސްވެފައިވާ ދަނޑިވަޅެއްކަމުން، އެކަމުން އަރައިގަނެވެންދެން ކޮންމެ މެމްބަރަކަށް ބައި ލައްކަ ރުފިޔާގެ ނަގުދު ފައިސާ ދެއްވާނެ ކަމަށް ރައީސް މުއިއްޒު ވައުދުވެވަޑައިގަތެވެ.

ތެދަށް ބުނަންޏާ، އެއީކަންނޭނގެ މިހާތަނަށް ރައީސް މުއިއްޒަށް ފުއްދުނު ހަމައެކަނި ވައުދަކީވެސް، މެމްބަރުންނަށް ފައިސާ ދިނުމުގެ އެ ފަލްސަފާ ފެށުނީ މުލިއާގެއިންނެވެ. މި ވާހަކަ އަނެއްވާ ވެސް ދައްކަން މި ޖެހުނީ މިއަދު ދިމާވި ކަމަކާ ގުޅިގެންނެވެ.

މެންދުރުގެ ވަގުތެވެ. ތޭރައޮންލައިނަށް ސަރުކާރުގެ މަޖިލިސް މެމްބަރަކު ގުޅައިގެން ވިދާޅުވީ މުލިއާގެއިން ދައުވަތު ލިބުނު ވާހަކައެވެ. މިއަދު ރައީސް މުއިއްޒު ބައްދަލު ކުރައްވަން އުޅެނީ ހަމައެކަނި މެމްބަރުންނާ ނޫންކަމަށާ މެމްބަރުންގެ އިތުރުން ސަރުކާރު ހިންގާ ކުންފުނިތަކުގެ އިސްވެރިންނާ ވެސް ބައްދަލު ކުރައްވާނެކަމަށެވެ. ބައްދަލުވުން ނިމިގެންދިޔަ ގޮތެއް ނޭނގިގެން އިންދާ ލިބުނީ އާދައިގެ މައުލޫމާތެއް ނޫނެވެ.

އަނެއްކާވެސް ރައީސް މުއިއްޒުގެ ހުށަހެޅުމެކެވެ. ވިދާޅުވީ ތަންކޮޅެއް ރަނގަޅަށް ސަރުކާރު ޕްރޮމޯޓް ކޮށްދިނުމަށެވެ. އޭގެތެރޭގައި "ވޭޕް މަނާކުރުމުން" އެކަން ވީހާވެސް ބޮޑަށް ޕްރޮމޯޓްކޮށް ދުންފަތުގެ އިސްތިއުމާލު ކުރުން ހުއްޓާލެއްވުމަށް ދެންނެވިކަމަށް ވެސް "ތޭރަ އޮންލައިން" އަށް ވަނީ ކަށަވަރުވެފައެވެ. އެކަން އެގޮތައް ކުރާ ކޮންމެ މެމްބަރަކަށާ އެމްޑީއިންނަށް އެމަނިކުފާނުގެ ފަރާތުން އަގުހުރި އިނާމެއް ދެއްވާނެކަމަށް ވެސް ވަނީ ވިދާޅުވެފައެވެ.

މުލިއާގެއިން ބައްދަލު ކުރާ ވާހަކަ އަޑުއިވުމުން ވެސް ހިތައް އެރީ މިއުޅެނީ ކޮންމެވެސް ނުބައެކެވެ. ކުރިން ފަހަރު ބައްދަލުކޮށް ބައި ލައްކަ ދެއްވީމާ، މިފަހަރު ވެސް އެފަދަ ކަމެއް ނުކުރާނެކަމެއް ނޭނގޭނެއެވެ. ކަންވެ ނިމުނީ ވެސް ހަމަ އެފަދައިންނެވެ. ނަމަވެސް އެ ވިދާޅުވި އަގުހުރި އިނާމަކީ ކޯއްޗެއްބާއެވެ.