ރާއްޖޭގެ އިގްތިސާދީ ކަނޑުގެ ސަރަހައްދުން ބޭރުގެ ދެ މަސްބޯޓަކުން ވަގަށް މަސްވެރިކަން ކުރާކަން ހާމަވެއްޖެ އެވެ.

މީސްމީޑިޔާގައި ދައުރުވެފައިވާ ވީޑިޔޯތަކުން އެނގޭ ގޮތުގައި މި ދެ މަސްބޯޓު ދަނީ ރާއްޖޭގެ އިގްތިސާދީ ސަރަަހައްދުން ވަގަށް މަސްވެރިކަން ކުރަމުންނެވެ. އަދި ދެ މަސްބޯޓު ރާއްޖޭގެ އިގްތިސާދީ ސަރަހައްދުން މަސްވެރިކަން ކުރަމުންދާކަން އެނގި މިދެބޯޓު ހަރަކާތްތެރިވަމުންދާ ސަރަައްދުން މަސްވެރިންވަނީ މި މައުލޫމާތު އެމްއެންޑީއެފްއަށް ހާމަކޮށްފައެވެ. އެހެންނަމަވެސް އެމްއެންޑީއެފްއިން އެއްވެސް ފިޔަވަޅެއް އަދި އަޅާފައި ނުވެއެވެ.

މި ދެ މަސް ބޯޓަކީ އަވައްޓެރި އިންޑިއާއާއި ސްރީލަންކާގެ މަސް ބޯޓުތަކެކެވެ. މީސްމީޑިޔާގައިވާ ގޮތުން މި ދެ މަސް ބޯޓު، މަސްވެރިކަން ކުރަމުން ދަނީ ރާއްޖޭގެ އިގްތިސާދީ ސަރަހައްދުގެ ތެރެއިން ހއ. އިންނަފިނޮޅުގެ 25 މޭލު ބޭރުންނެވެ.

ރައީސް މުއިއްޒު ވިދާޅުވެފައިވަނީ 500 މިލިއަން ރުފިޔާ ޚަރަދު ކޮށްގެން ގަނެފައިވާ ޑްރޯންތަކުގެ ބޭނުންކޮށްގެން 24 ގަޑިއިރު ރާއްޖޭގެ މުޅި އިގްތިސާދީ ސަރަހައްދު ބެލެހެއްޓެމުންދާނެ ކަމަށެވެ. އެހެންކަމުން މީސްމީޑިޔާގައި ރައްޔިތުން އަންނަނީ ތަފާތު ސުވާލުތައް އުފައްދަމުންނެެވެ. އެގޮތުން ޑްރޯންގެ ބޭނުން ކުރާ ނަމަ އެހެން ގައުމެއްގެ މަސް ބޯޓުތަކުން ރާއްޖޭގެ ކަނޑުން މަސްވެރިކަން ކުރާކަން އެނގޭނެކަމަށްވެސް ގިނަ ފަރާތްތަކުން ބުނެއެވެ.

މިކަމުން ވެސް ދޭހަވަނީ ޑްރޯންތައް ބޭނުން ނުކުރާކަމެވެ. މި ވާހަކަ ފެންމަތިވެފައިމިވާ ދަނޑިވަޅުގައި ޑްރޯންތައް ބޭނުންކުރޭތޯ ބަލަން ޑިފެންސް މިނިސްޓަރު މަޖިލީހަށް ހާޒިރުކުރަން ވެސް ވަނީ ނިންމާފައެވެ.