ޒުވާން ޖީލެއް ދުންފަތުގެ އިސްތިއުމާލު ކުރުމުން ސަލާމަތް ކުރުމުގެ ނަމުގައި ސަރުކާރުން ފެށީ ބޮޑު ސްކޭމެކެވެ. މިކަމުގެ ތެރެޔަށް ކުޑަކޮށް ފީނާލިއިރު، ކަމަކުދާކަށް ނެތެވެ. މީގެން ގެެއްލުންވާ ބަޔަކަށް ބޮޑެތި ގެއްލުމެވެ. ފައިދާވާ ބަޔަކަށް ހެސްކިޔާފަ ފައިދާއެވެ. ސަރުކާރުގައި މިހާރު މިތިބި ވެރިންނަކީ އެދުމެއް ނެތި ވެދުމެއް ކުރާނެ ބައެއް ނޫނެވެ.

ވޭޕް މަނާކުރަން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ނިންމެވުމުން، އެމަނިކުފާނުގެ ނިންމެވުމަށް ތައުރީފުކުރެވުނެވެ. ހީކުރީ އެގޮތައް އެމަނިކުފާނު ނިންމެވީ ހަގީގަތުގައި ވެސް ޒުވާން ޖީލެއް ދުންފަތުން ސަލާމަތްކުރުމަށްޓަކައި ކަމަށެވެ. ނަމަވެސް ހަގީގަތަކީ އެޔެއްނޫންކަން އެނގުނު ހިސާބުން ހައިރާންވެ އަންތަރީސްވީމެވެ.

އާދެ، ވޭޕް މަނާކުރި އިރު ސުވާލު އުފެދުނީ "ސިނގިރޭޓު" މަނާ ނުކުރީ ކީއްވެބާއެވެ. ސިނގިރޭޓު މަނާނުކޮށް ވޭޕް މަނާކުރި އިރު، ސިނގިރޭޓުންވާ ގެއްލުން ބޮޑުކަމުން ގިނަ މީހުން ކުރަނީ ވޭޕެވެ. ޒުވާން އާބާދީގެ ބޮޑުބައެއް ސިނގިރޭޓަށް ނުގޮސް ވޭޕް ބޭނުންކުރުމުން ސިނގިރޭޓްގެ ވިޔަފާރި ދަށްވުން ސަބަބަކަށްވުން ގާތެވެ. އެގޮތައް ކަންތައް ކުރުމުން ވޭޕް ކުރާ ފަރާތްތަކުން ސިނގިރޭޓް ގަނެގެން ބޯން ފަށާނެތާއެވެ.

އާދެ، ތޭރަ އޮންލައިން އަށް ލިބުނު މައުލޫމާތުގައި ވާގޮތުން، ސިނގިރޭޓުގެ ވިޔަފާރި ކުރާ ފަރާތެއް ސަރުކާރަށް 300 މިލިއަން ރުފިޔާގެ އެހީއެއް ވަނީ ދީފައެވެ. އެ ވިޔަފާރިވެރިޔާ އަށް ސަރުކާރަށް އެހީ ދިނީ ވޭޕް މަނާކޮށްދިނުމަށް ޝަރުތުކޮށްފައެވެ. ސަބަބެއް ވެސް ނެތި ނޫނެވެ. ވޭޕް މަނާކުރުމުން، ގޮތް ހުސްވެ ސިނގިރޭޓު ބުއިމަށް މީހުންތައް ފަށާނެތީއެވެ. އޭރުން ސިނގިރޭޓުގެ ވިޔަފާރި ކުރާ ފަރާތައް ހުސްނުވާހާ ފައިދާއެވެ.

ސިނގިރޭޓުގެ ވިޔަފާރި ކުރާ އެހެން ފަރާތެއްގެ އަންހެނުން މި ސަރުކާރުގެ ހެލްތް މިނިސްޓްރީގެ އިސް މަގާމެއްގައި ހުރެ ވޭޕް މަނާކުރުމުގައި އިސް ދައުރެއް އަދާކޮށްފައިވާކަމަށް ވެސް ތޭރަ އޮންލައިނަށް ވަނީ ކަށަވަރުވެފައެވެ. މިކަން ދެން ކިތަންމެ ވަރަކަށް އޮޅުވާލަން އުޅުނަސް މިއޮތީ ބުޅާ ގޯނިން ބޭރުވެފައެވެ.

ދެން އޮތީ މިކަމުން ސަރުކާރަށް ފައިދާވުމެވެ. ސިނގިރޭޓުން ޓެކުހާއި ޑިއުޓީ ބޮޑުކޮށްގެން ސަރުކާރަށް ލިބޭ އާމްދަނީ އިތުރުކުރުމެވެ. ދުންފަތާއި ސިނގިރެޓް މަނާކޮށްފިނަމަ ކޮންމެ އަހަރަކު ސަރުކާރަށް ދުންފަތުން ޓެކުހާއި ޑިއުޓީ ގޮތުގައި ލިބެމުންދާ އެތައް މިލިޔަނެއްގެ އާމްދަނީ އެކީ އެކައްޗަކަށް ހުއްޓިދާނެތީ އެކަން ކުރަން ޖެހިލުންވީއެވެ. ކަން މިހެން ހުރުމުން ސިއްހީގޮތުން ކިތަންމެ ބޮޑު ގެއްލުމެއް ލިބުނަސް ދުންފަތް ރާއްޖެއަކު މަނައެއް ނުކުރާނެއެވެ. އެހެން ކަމުން ދުންފަތް ކޮންޓްރޯލް ކުރުމުގެ ނަމުގައި ވެސް ސަރުކާރުން މި ބަލަނީ ރައްޔިތުންނަށް އޮޅުވާލެވޭތޯއެވެ.

ވޭޕް މަނާކޮށްފައި ސިނގިރޭޓްގެ އަގު ބޮޑު ކުރިޔަސް ވޭޕް ބޭނުންކުރާ މީހުންގެ ތެރެއިން އެތައްބަޔަކު ސިނގިރޭޓު ބޯން ފަށާނެއެވެ. އޭރުން އެމީހުންގެ ސިއްހަތައް ވާނެ އެއްްޗެއް ވިޔަސް ހެވެއެވެ. ވާނީވެސް އެހެންތާއެވެ. ސަރުކާރަށް ބިލިއަނުން ފައިދާވަނިކޮށް އެމީހުން ވިސްނާ އިތުރުކަމެއް ނޯންނާނެއެވެ.