ހުޅުމާލޭގައި ޤުރުއާން ހިތު ދަސްކުރާ ދަރިވަރުންގެ މަރުކަޒުގެ ކަރަންޓު ކަނޑާ މައްސަލަ ބޮޑުވެއްޖެއެވެ.
މިކަން ހާމަކުރައްވާ އިސްލާމިކު މިނިސްޓަރު ޑރ. މުހައްމަދު ޝަހީމް އަލީ ސައީދު ފޭސްބުކްގައި ކުރެއްވި ޕޯސްޓެއްގައި ވިދާޅުވީ، ހުޅުމާލެގައި ކީރިތި ޤުރުއާން ހިތު ދަސްކުރާ އިލްމް އިންސްޓިޓިއުޓްގެ ކަރަންޓް ކޭބަލްތައް މީގެ ދެ ދުވަސް ކުރިން ބުރިކޮށްލުމުން ކޭބަލްތައް ރަނގަޅު ކޮށް ބޭނުންކުރަން ފެށުމާ އެކު އަނެއްކާވެސް ކޭބަލްތައް ބުރިކޮށްލައިފި ކަމަށެވެ.
އެކަމުގެ ކަންބޮޑުވުމާ އެކު ޑރ. ޝަހީމު ވަނީ ފުލުހުން އެކަން ތަޙުޤީޤުކޮށްދެއްވުމަށް އެދިވަޑައިގެންފައެވެ. އެގޮތުން އެ އިންސްޓިޓިއުޓް ވަށާ ހުރި ސީސީޓީވީ ކެމެރާތަކުން ބަލައި، އެ ސެންޓަރަށް ޓާގެޓްކޮށްގެން އެކަން ކުރަމުން ދަނީ ކޮން ބައެއްކަން ހޯދާ ފިޔަވަޅު އެޅުމަށް ޑރ. ޝަހީމު ވަނީ އެދިވަޑައިގެންފައެވެ.
